[Business Cambodia] - អ្នកមានដីអាចត្រូវប៉ាន់! ឯ.ឧ ស៊ុន ចាន់ថុល នឹងផ្តល់អាទិភាពស្ថាបនាផ្លូវជាតិធំ៣ខ្សែនេះមុនគេ នៅដើមឆ្នាំក្រោយ
ឆ្លើយតបសំណួររបស់បងប្អូនប្រជាពលរដ្នៅក្នុងកម្មវិធី MPWT Live Show ដែលជាកម្មវិធីផ្សាយផ្ទាល់ទាក់ទងនឹង“វឌ្ឍនភាពការងារវិស័យសាធារណការ និងដឹកជញ្ជូន ជាកម្មវិធីធ្វើការផ្សាយផ្ទាល់លើទំព័រហ្វេសប៊ុកផ្លូវការរបស់ក្រសួង ដើម្បីបង្ហាញជូនអំពីវឌ្ឍនភាព សមិទ្ធផល និងកិច្ចខិតខំប្រឹងប្រែងរបស់ក្រសួង ក៏ដូចជារាជរដ្ឋាភិបាលលើការងារស្តារ និងស្ថាបនាហេដ្ឋារចនាសម្ព័ន្ធផ្លូវថ្នល់នៅកម្ពុជា ឯកឧត្តមទេសរដ្ឋមន្ត្រី ស៊ុន ចាន់ថុលបានឱ្យដឹងថា៖ រដ្ឋាភិបាលបានផ្តល់អាទិភាព ក្នុងបើកការដ្ឋានស្តារពង្រីកនិងលើកកម្រិតផ្លូវជាតិចំនួន ០៣ ខ្សែនៅដើមឆ្នាំ២០២២។
ឯកឧត្តមទេសរដ្ឋមន្ត្រីបានបញ្ជាក់ថា៖ ផ្លូវជាតិទាំង ៣ ខ្សែ ដែលនឹងត្រូវបើកការដ្ឋាននោះមានដូចជា៖ ផ្លូវជាតិលេខ ៤១ ដែលតភ្ជាប់ពីផ្លូវជាតិលេខ ៤ មកលេខ ៣ ចាប់ពីចំណុចប្រសព្វថ្នល់ទទឹងក្នុងខេត្តកំពង់ស្ពឺដល់ស្រុកជុំគិរី ខេត្តកំពត ប្រវែងជិត១០០គីឡូម៉ែត្រ។ ផ្លូវជាតិលេខ ៣១ ពីបែកគូស ទៅកំពង់ត្រាច និងផ្លូវជាតិលេខ ៣៣ ពីកែបមកកំពង់ត្រាច។
ឯកឧត្តមបានបន្តថា៖ ការដែលផ្តល់អាទិភាពលើផ្លូវជាតិទាំង៣ខ្សែនេះ មុនគេនោះ គឺដោយសារយើងចង់អភិវឌ្ឍន៍តំបន់ឆ្នេររបស់យើង។ ដូច្នេះហើយ ទើបរដ្ឋាភិបាលខិតខំស្តារផ្លូវនៅក្រុងព្រះសីហនុ ៣៤ខ្សែបានធ្វើចប់សព្វគ្រប់ បច្ចុប្បន្នកំពុងធ្វើផ្លូវល្បឿនលឿន បន្តិចទៀតនេះ ខេត្តព្រះសីហនុ នឹងក្លាយទៅជាខេត្ត ទៅជាតំបន់សេដ្ឋកិច្ចពិសេស។ ដូចនេះសំខាន់ណាស់ ដើម្បីឱ្យខេត្តព្រះសីហនុក្លាយទៅជាតំបន់សេដ្ឋកិច្ចពិសេស យើងត្រូវតែមានផ្លូវតភ្ជាប់ ពីកែប កំពត និងកំពង់ស្ពឺ ទើបឈានទៅរកការតភ្ជាប់ទៅខេត្តព្រះសីហនុតែម្តង។
ដូច្នេះហើយមានអ្នកជំនួញជាច្រើនរំពឹងថា នៅពេលផ្លូវនេះសាងសង់រួចនោះ តម្លៃដីធ្លីអាចនឹងកើនឡើងមួយកម្រិតទៀជាមិនខានឡើយ។
