[Phnom Penh Post] - ក្រុងភ្នំពេញដាក់ឱ្យដំណើរការ សាខាច្រកចេញចូលតែមួយសម្រាប់ផ្តល់បណ្ណបើកបរ
2021-08-12
Go to the website published Phnom Penh Post
ភ្នំពេញៈ មន្ទីរសាធារណការ និងដឹកជញ្ជូនរាជធានីភ្នំពេញបានដាក់ឱ្យដំណើរការសាខាច្រកចេញចូលតែមួយនៃរដ្ឋបាលរាជធានីភ្នំពេញនៅសាខាខណ្ឌជ្រោយចង្វារសម្រាប់ផ្តល់សេវាផ្នែកផ្តល់បណ្ណបើកបរ និងប្តូរទុតិយតាបណ្ណបើកបរយានយន្តចាប់ពីថ្ងៃទី ១០ ខែ សីហា ឆ្នាំ ២០២១ តទៅ ដើម្បីបង្កលក្ខណៈងាយស្រួលដល់ពលរដ្ឋ។
មន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងថា ការផ្តល់សេវានេះនឹងត្រូវធ្វើឡើងរៀងរាល់ម៉ោងធ្វើការចាប់ពីម៉ោង ៧:៣០ ព្រឹកដល់ម៉ោង ១១:៣០ ថ្ងៃត្រង់ និងម៉ោង ១៣:០០ ដល់ម៉ោង ១៧:០០ រសៀលនៅក្នុងបរិវេណមន្ទីរសាធារណការ និងដឹកជញ្ជូនរាជធានីភ្នំពេញ ដែលមានទីតាំងនៅផ្លូវជាតិលេខ ៦ ជាប់របងវិទ្យាល័យព្រែកលៀប សង្កាត់ព្រែកលៀប ខណ្ឌជ្រោយចង្វារ ។
ជាមួយនឹងការដាក់ឱ្យដំណើរការនេះ មន្ទីរសាធារណការបានស្នើឱ្យអ្នកមកទទួលបណ្ណបើកបរប្តូរទុតិយតាបណ្ណបើកបរយានយន្តត្រូវចូលរួមអនុវត្តវិធានការ ៣កុំ ៣ការពារ និងវិធានការក្រសួងសុខាភិបាលឱ្យបានម៉ឺងម៉ាត់ ដើម្បីធានាសុវត្ថិភាពទាំងអស់គ្នា។
ប្រធាននាយកដ្ឋានព័ត៌មាន និងទំនាក់ទំនងសាធារណៈនៃក្រសួងសាធារណការ និងដឹកជញ្ជូនលោក ហ៊ាង សុទ្ធាយុត្តិ ប្រាប់ភ្នំពេញប៉ុស្តិ៍ថា ការបង្កើនកន្លែងផ្តល់សេវាបណ្ណបើកបរនេះដើម្បីសម្រួល និងដោះស្រាយបញ្ហាប្រជាពលរដ្ឋក្នុងអំឡុងពេលរីករាលដាលនៃជំងឺកូវីដ ១៩។
លោកថា៖ «ការរៀបចំនេះដើម្បីឆ្លើយតបទៅនឹងតម្រូវការនៃការសម្រួលដល់បងប្អូនប្រជាពលរដ្ឋ ដែលក្រសួងមានទីតាំងមន្ទីរហើយសមស្រប តាមការធ្វើប្រតិភូកម្មនៃការផ្ទេរមុខងារទៅរដ្ឋបាលថ្នាក់ក្រោមជាតិ។
លោកបញ្ជាក់ថា៖ «មន្ត្រីមន្ទីរដែលគាត់ជាសេនាធិការរបស់រដ្ឋបាលថ្នាក់ក្រោមជាតិ គឺគាត់ចូលរួមក្នុងការផ្តល់ និងការប្រើទីតាំងនេះ គឺជារឿងល្អ ហើយយើងសង្ឃឹមថា ការបង្កើតនូវទីកន្លែងផ្តល់សេវាសាធារណៈឱ្យបានច្រើននេះនឹងជួយដោះស្រាយបញ្ហាប្រឈមរបស់ប្រជាពលរដ្ឋបានកាន់តែល្អប្រសើរ»។
លោកបន្តទៀតថា ការរៀបចំបន្ថែមកន្លែងផ្តល់សេវាបណ្ណបើកបរនេះដែរ គឺជាការរៀបចំស្របតាមអនុក្រឹត្យរបស់រាជរដ្ឋាភិបាល និងតាមប្រកាសរបស់ក្រសួងមហាផ្ទៃស្តីពីការរៀបចំ និងប្រព្រឹត្តទៅរបស់អង្គភាព ការិយាល័យច្រកចេញចូលតែមួយហើយស្របតាមប្រកាសនៃការធ្វើប្រតិភូកម្ម សេវាសាធារណៈនៅក្នុងវិស័យសាធារណការ និងដឹកជញ្ជូន។
ក្រសួងសាធារណការឱ្យដឹងថា យោងការកើនឡើងនៃការប្រើប្រាស់សេវាបណ្ណបើកបរយានយន្តយ៉ាងច្រើនសន្ធឹកសន្ធាប់ក្នុងរយៈពេលថ្មីៗនេះ ក្រសួងបានអនុញ្ញាតឱ្យពលរដ្ឋអាចប្រឡងយកបណ្ណបើកបរយានយន្ត (ទោចក្រត្រីចក្រយានយន្ត និងរថយន្ត) នៅតាមគ្រប់មន្ទីរសាធារណការ និងដឹកជញ្ជូន ទូទាំង ២៥ រាជធានី-ខេត្ត ទាំងការប្រឡងទ្រឹស្តី និងដៃចង្កូត។
សម្រាប់នៅភ្នំពេញវិញអង្គភាពផ្តល់បណ្ណបើកបររបស់មន្ទីរសាធារណការ និងដឹកជញ្ជូនរាជធានីភ្នំពេញ ស្ថិតនៅផ្លូវ ៥៩៨ (ផ្លូវឯកឧត្តម ជា សុផារ៉ា) ខណ្ឌឫស្សីកែវ រាជធានីភ្នំពេញ។ ចំណែកឯមណ្ឌលផ្តល់បណ្ណបើកបរយានយន្ត មាននៅ ផ្សារទំនើបអ៊ីអន ១ និង ២ និងផ្សារជីបម៉ុងណូរ៉ូម៉ល សម្រាប់តែការផ្តល់សេវាប្តូរ និងពន្យារបណ្ណបើកបរប៉ុណ្ណោះ៕
