ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលថ្ងៃទី២៦ ខែកក្កដា កន្លងមកនេះ បានស្នើទៅកាន់មន្ត្រីពាក់ព័ន្ធទាំងអស់ឱ្យជួយគ្នាពន្លឿនបញ្ចប់សេចក្តីព្រាងច្បាប់ស្ដីពីកំពង់ផែ គោលដៅដើម្បីដាក់ឱ្យប្រើប្រាស់ក្នុងពេលឆាប់ៗខាងមុននេះ។ ឯកឧត្តម បានឱ្យដឹងថា បច្ចុប្បន្ន ក្រសួងកំពុងពិភាក្សាលើការប្រមូលធាតុចូល ក៏ដូចជាកែសម្រួលអត្ថន័យ ពាក្យពេចន៍ ឃ្លាប្រយោគ អក្ខរាវិរុទ្ធនៃសេចក្តីព្រាងច្បាប់នេះ ដើម្បីធ្វើឱ្យច្បាប់នេះមានលក្ខណៈគ្រប់ជ្រុងជ្រោយ។ «កម្ពុជាបង្កើតច្បាប់នេះឡើង ដើម្បីធានាដល់ការអភិវឌ្ឍន៍វិស័យកំពង់ផែ និងធានាផ្ដល់សេវាដល់អ្នកប្រើប្រាស់ប្រកបដោយទំនុកចិត្ត ងាយស្រួល ឆាប់រហ័ស តម្លៃសមស្រប និងមានសុវត្ថិភាព» ឯកឧត្តមបានបន្ដ។ ឯកឧត្តម សង្ឈឹមថាសេចក្តីព្រាងច្បាប់នឹងបញ្ចប់ឆាប់ៗ ដើម្បីដាក់ឆ្លងកិច្ចប្រជុំអន្តរក្រសួងនាពេលខាងមុខ។ គួរបញ្ជាក់ផងដែរថា មកទល់បច្ចុប្បន្ន កម្ពុជាមានកំពង់ផែទន្លេមានសរុប ៧៨ និងកំពង់ផែសមុទ្រមាន ចំនួន២៧។ កំពង់ផែទាំងនោះ មានតួនាទីជំរុញសកម្មភាពពាណិជ្ជកម្មគ្រប់ប្រភេទក្នុងដំណើរការអភិវឌ្ឍ សេដ្ឋកិច្ចជាតិ តំបន់ និង អន្តរជាតិ៕