(ភ្នំពេញ)៖​ នៅក្នុងព្រះរាជាណាចក្រកម្ពុជា កំពង់ផែទន្លេ មានសរុប ៧៨កំពង់ផែ ឋិតនៅតាមដងទន្លេមេគង្គ ទន្លេសាប ទន្លេបាសាក់ និងបណ្ដាខេត្តនានា ដោយឡែកកំពង់ផែសមុទ្រមាន ចំនួន២៧។ នេះជារបាយការណ៍មួយ ត្រូវបានផ្សព្វផ្សាយ ក្នុងកិច្ចប្រជុំពិភាក្សា លើសេចក្តីព្រាងច្បាប់ស្ដីពីកំពង់ផែ តាមប្រព័ន្ធវីដេអូពីចម្ងាយ ដឹកនាំដោយ ឯកឧត្តមទេសរដ្ឋមន្ត្រី ស៊ុន ចាន់ថុល។មុខងារកំពង់ផែទាំងនោះ ត្រូវបានបែងចែកចេញជាកំពង់ផែពាណិជ្ជកម្ម ឧស្សាហកម្ម ទេសចរណ៍ និងផែប្រេងជាដើម និងត្រូវបានគ្រប់គ្រងដោយរដ្ឋផង និងឯកជនផង។ កំពង់ផែទាំងនោះ មានតួនាទីជំរុញសកម្មភាពពាណិជ្ជកម្ម​​​គ្រប់ប្រភេទក្នុងដំណើរការអភិវឌ្ឍ សេដ្ឋកិច្ចជាតិ តំបន់ និង អន្តរជាតិ។ សូមជំរាបថា កិច្ចប្រជុំខាងលើ ធ្វើឡើងក្នុងគោលបំណងពិភាក្សា លើការប្រមូលធាតុចូល ក៏ដូចជាកែសម្រួលអត្ថន័យ ពាក្យពេចន៍ ឃ្លាប្រយោគ អក្ខរាវិរុទ្ធនៃសេចក្តីព្រាងច្បាប់ស្ដីពីកំពង់ផែ ដើម្បីឱ្យការរៀបចំច្បាប់នេះមានលក្ខណៈ​​​​គ្រប់ជ្រុងជ្រោយបម្រើឱ្យឧត្ដមប្រយោជន៍ជាតិ។ អង្គប្រជុំបានពិភាក្សា កែសម្រួលលើមាត្រា១ វាក្យសព្ទ មាត្រា៨ និងមាត្រា៩ និងបានឯកភាពលើ ខ្លឹមសារនៃគោលបំណងរបស់ច្បាប់នេះថា៖ «ច្បាប់នេះមានគោលបំណងគ្រប់គ្រងនិងអភិវឌ្ឍកំពង់ផែ ក្នុងគោលដៅរក្សាសណ្ដាប់ធ្នាប់ ផ្ដល់ភាពងាយស្រួលដល់អ្នកប្រើសេវាកំពង់ផែ ផ្ដល់កាលានុវត្តភាពវិនិយោគកំពង់ផែ និងប្រកួតប្រជែងប្រកបដោយសមធម៌ ធានាសុវត្ថិភាពសន្តិសុខកំពង់ផែ រួមចំណែកការពារបរិស្ថានដើម្បីបម្រើពាណិជ្ជកម្មជាតិ​​​និងអន្តរជាតិ និងទ្រទ្រង់ការអភិវឌ្ឍសេដ្ឋកិច្ចជាតិ»៕