ថ្ងៃសុក្រ ១៤កើត ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៣ ខែកក្កដា ឆ្នាំ២០២១ នៅទីស្តីការក្រសួង ឯកឧត្តម ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយគណៈប្រតិភូសភាពាណិជ្ជកម្មក្រុងថៃចូវ ប្រចាំកម្ពុជា ដឹកនាំដោយលោក Hai Long Zhang, bong និងបានអញ្ជើញជាអធិបតីក្នុងកម្មវិធីប្រគល់-ទទួលសម្ភារៈបរិក្ខារ ប្រយុទ្ធប្រឆាំងជំងឺកូវីដ-១៩ ក្រោមការឧបត្ថម្ភពីសភាពាណិជ្ជកម្មក្រុងថៃចូវ ដោយមានការចូលរួមពី ឯកឧត្តម ហឿន សំនឿង នាយកវិទ្យាស្ថានតេជោ សែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន ថ្នាក់ដឹកនាំវិទ្យាស្ថាន និងមន្ត្រីពាក់ព័ន្ធផងដែរ។ សូមជម្រាបជូនថា៖ សភាពាណិជ្ជកម្មក្រុងថៃចូវ ប្រចាំកម្ពុជា មានគោលបំណងចូលរួមទប់ស្កាត់ការឆ្លង រីករាលដាលជំងឺកូវីដ-១៩ ដែលបានឆ្លងចូលសហគមន៍ជាលើកទីបី (ព្រឹត្តការណ៍២០ កុម្ភៈ) ដោយបាន នាំយកអំណោយជាសម្ភារៈបរិក្ខាមួយចំនួនប្រគល់ជូនក្រសួងសាធារណការ និងដឹកជញ្ជូន ក្នុងនោះរួម មាន៖ ម៉ាស់ចំនួន២០កេស ស្មើនឹង ៥០.០០០ ម៉ាស់ អាល់កុលជែលលាងដៃចំនួន១០កេស ស្មើនឹង ៩៦០ដប ស្រោមដៃការពារចំនួន ៥ កេស និងក្រដាសសើមចំនួន២០កេស ដើម្បីរួមចំណែកប្រយុទ្ធ ប្រឆាំងជំងឺនេះ។ ជាមួយគ្នានេះផងដែរ សភាពាណិជ្ជកម្មក្រុងថៃចូវ មានចំណាប់អារម្មណ៍លើកិច្ចសហប្រតិបត្តិការជាមួយ វិទ្យាស្ថានតេជោ សែន សាធារណការ និងដឹកជញ្ជូនដើម្បីស្វែងយល់ពីគ្នាទៅវិញទៅមក ថាតើសភា ពាណិជ្ជកម្មក្រុងថៃចូវ អាចផ្តល់ការគាំទ្រ និងជួយអ្វីខ្លះដល់វិទ្យាស្ថាន ហើយវិទ្យាស្ថានអាចជួយអ្វីខ្លះ លើកិច្ចសហប្រតិបត្តិការនេះ។ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់សភាពាណិជ្ជកម្មក្រុងថៃចូវ ដែលបាន អំណោយជាសម្ភារៈបរិក្ខាមួយចំនួនដល់ក្រសួងសាធារណការ និងដឹកជញ្ជូន ដើម្បីរួមចំណែកប្រយុទ្ធ ប្រឆាំង និងទប់ស្កាត់ការរីករាលដាលនៃមេរោគកូវីដ-១៩ ជាមួយរាជរដ្ឋាភិបាល និងបានជូនពរឱ្យ ក្រុមហ៊ុនទទួលបានជោគជ័យនៅក្នុងបេសកកម្មរបស់ខ្លួននៅកម្ពុជា។ ជាមួយគ្នានោះផងដែរ ឯកឧត្តម ហឿន សំនឿង នាយកវិទ្យាស្ថានតេជោ សែន សាធារណការ និង ដឹកជញ្ជូន បានជម្រាបជូនថា៖ វិទ្យាស្ថានតេជោ សែន សាធារណការ និងដឹកជញ្ជូននៃក្រសួង សាធារណការ និងដឹកជញ្ជូន ត្រូវបានបង្កើតឡើងក្រោមគំនិតផ្ដួចផ្ដើមរបស់ឯកឧត្តមទេសរដ្ឋមន្ត្រី ស៊ុន ចាន់ថុល ជាមួយនឹងផែនការយុទ្ធសាស្ត្រ និងចក្ខុវិស័យវែងឆ្ងាយក្នុងការកសាងធនធានមនុស្ស ដើម្បីឆ្លើយតបទៅនឹងតម្រូវការនៃការអភិវឌ្ឍរបស់កម្ពុជា និងដើម្បីចូលរួមប្រែក្លាយកម្ពុជាឱ្យក្លាយទៅជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសអភិវឌ្ឍន៍នៅឆ្នាំ២០៥០។ ឯកឧត្តមនាយកវិទ្យាស្ថាន បានគូសបញ្ជាក់ផងដែរអំពីភាពចាំបាច់នៃការអភិវឌ្ឍហេដ្ឋារចនាសម្ព័ន្ធរបស់កម្ពុជា ដើម្បីសម្រួលដល់ការដឹកជញ្ជូន និងការធ្វើដំណើររបស់បងប្អូនប្រជាពលរដ្ឋ និងការអភិវឌ្ឍសេដ្ឋកិច្ចរបស់កម្ពុជា និងបានសង្កាត់ធ្ងន់ថា៖ កម្ពុជានៅមានការខ្វះខាតអ្នកបច្ចេកទេសច្រើនក្នុងការអភិវឌ្ឍហេដ្ឋារចនាសម្ព័ន្ធផ្លូវថ្នល់របស់ខ្លួននាពេលបច្ចុប្បន្ន និងអនាគត ដើម្បីរួមចំណែកដល់ការលើកកម្ពស់សេដ្ឋកិច្ចឱ្យមានការរីកចម្រើនថែមទៀត។ បន្ថែមពីលើនេះ ឯកឧត្តមនាយកវិទ្យាស្ថាន បានចង្អុលបង្ហាញគោលដៅរបស់វិទ្យាស្ថានក្នុងការបណ្ដុះ បណ្ដាលកូនខ្មែរឱ្យមានសមត្ថភាព មានជំនាញច្បាស់លាស់លើវិស័យហេដ្ឋារចនាសម្ព័ន្ធផ្លូវថ្នល់ ស្ពាន សំណង់កំពង់ផែ ផ្លូវដែក និងហេដ្ឋារចនាសម្ព័ន្ធផ្សេងៗទៀត ឱ្យកូនខ្មែរមានទាំងចំណេះដឹងទូលំទូលាយ មានអត្តចរិកល្អ សីលធម៌ និងចរិយាសម្បត្តិថ្លៃថ្នូរ ដើម្បីឱ្យកូនខ្មែរជំនាន់នេះ និងជំនាន់ក្រោយក្លាយជា អ្នកបន្តវេនប្រកបដោយសក្កានុពល និងការទទួលខុសត្រូវខ្ពស់លើវិស័យហេដ្ឋារចនាសម្ព័ន្ធនៅកម្ពុជា។ ឆ្លៀតក្នុងឱកាសនោះផងដែរ គណៈប្រតិភូសភាពាណិជ្ជកម្មក្រុងថៃចូវ ប្រចាំកម្ពុជា បានគោរពអញ្ជើញ ឯកឧត្តមទេសរដ្ឋមន្ត្រី ស៊ុន ចាន់ថុល ឯកឧត្តមរដ្ឋលេខាធិការ និងគណៈប្រតិភូវិទ្យាស្ថានតេជោ សែនសាធារណការ និងដឹកជញ្ជូន ទៅធ្វើទស្សនកិច្ចទីក្រុងថៃចូវ សាធារណរដ្ឋប្រជាមានិតចិន ក្នុងពេលវេលា សមស្របណាមួយដែលអាចធ្វើទៅបាន៕