ឯកឧត្តម បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងផ្លូវជាតិលេខ១០ បានឱ្យដឹងថា គម្រោងសាងសង់ផ្លូវជាតិលេខ១០ ភ្ជាប់ខេត្តបាត់ដំបង - ពោធិ៍សាត់ - កោះកុង សម្រេចបាន៤៨,៧៧ភាគរយហើយ បើគិតត្រឹមពាក់កណ្តាលខែឧសភា ឆ្នាំ២០២១ ខណៈតាមផែនការ នឹងបញ្ចប់រួចរាល់ជាស្ថាពរនៅត្រឹម ឆ្នាំ២០២៣។ ឯកឧត្តម រដ្ឋលេខាធិការ បន្តថា បច្ចុប្បន្ន ក្រុមហ៊ុនសាងសង់កំពុងបន្តការងាររបស់ខ្លួនយ៉ាងសស្រាក់សស្រាំ ទោះបីកម្ពុជាកំពុងជួបប្រទះនៃការឆ្លងរីករាលដាលជំងឺកូវីដ១៩យ៉ាងណាក៏ដោយ។ ឯកឧត្តម បានជំរុញឱ្យក្រុម ហ៊ុនសាងសង់ និងក្រុមហ៊ុនទីប្រឹក្សាបច្ចេកទេស បន្តយកចិត្តទុក ដាក់លើកិច្ចការងារសាងសង់ប្រកបដោយការទទួលខុសត្រូវខ្ពស់ និងស្របតាមស្តង់ដារបច្ចេកទេសត្រឹមត្រូវ ដើម្បីធានាការប្រើប្រាស់បានយូរអង្វែង និងចូលរួមអនុវត្តឱ្យបាននូវវិធានការ របស់រាជរដ្ឋាភិបាល ៣កុំ ៣ការពារ ទាំងអស់គ្នា ដើម្បីបញ្ចៀសការឆ្លងជម្ងឺកូវីដ-១៩។ សូមបញ្ជាក់ថា ផ្លូវជាតិលេខ១០មានប្រវែង ១៩៧,៣៦គីឡូម៉ែត្រ លាតសន្ធឹងកាត់ស្រុកសំឡូត ខេត្តបាត់ដំបង ពោធិ៍សាត់ រហូតដល់ខេត្តកោះកុង ត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា និងឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា អញ្ជើញបើកការដ្ឋានសាងសង់ កាលពីខែមីនា ឆ្នាំ២០២០។ ផ្លូវនេះ បាននិងកំពុងសាងសង់ស្របទៅតាមស្តង់ដារ ផ្លូវថ្នល់កម្រិត៣ នៃបទដ្ឋានបច្ចេកទេសរបស់សាធារណរដ្ឋប្រជាមានិតចិន មានទទឹងតួផ្លូវសរុប៩ម៉ែត្រ ក្រាលកៅស៊ូពីរស្រទាប់ (DBST)។ រាជរដ្ឋាភិបាល បានចាត់ទុកផ្លូវ នេះមិនត្រឹមតែផ្តល់អត្ថប្រយោជន៍ក្នុងការធ្វើដំណើរឆ្លងកាត់ច្រកទ្វារព្រំដែនកម្ពុជា-ថៃ នៅថ្មដា ខេត្តពោធិ៍សាត់ នៅចាំយាម ខេត្តកោះកុង និងកំពង់ផែសមុទ្រទឹកជ្រៅរបស់កម្ពុជាប៉ុណ្ណោះទេ ប៉ុន្តែវាអាចជាផ្នែកមួយទាក់ទាញអ្នកទេសចរណ៍ដែលចូលចិត្តធ្វើដំណើរកម្សាន្ត គយគន់ធម្មជាតិដ៏ស្រស់ត្រកាល ដោយសារផ្លូវនេះមានតំបន់ធម្មជាតិជាច្រើន ជាពិសេស ព្រៃឈើក្រាស់ៗយ៉ាងស្រស់ស្អាត៕