ក្រសួងសាធារណការ និងដឹកជញ្ជូន បានសម្រេចបើកឱ្យដំណើរការឡើងវិញនូវកន្លែងត្រួតពិនិត្យលក្ខណៈបច្ចេកទេសយានយន្ត ដែលហៅថា ឆៀក និងធ្វើបណ្ណបើកបរ ព្រមទាំងមណ្ឌលផ្តល់សេវាសាធារណៈដទៃទៀតនៅទូទាំងប្រទេស ដើម្បីឆ្លើយតបទៅនឹងតម្រូវការ របស់ប្រជាពលរដ្ឋ បន្ទាប់ពីបានបិទមួយរយៈធំ ដោយសារការរីករាលដាលនៃជំងឺកូវីដ-១៩។ ចាប់ពីថ្ងៃទី៦ ខែឧសភា នេះតទៅ មណ្ឌលផ្តល់សេវាសាធារណៈនៅទីតាំងទីស្តីការក្រសួង, មណ្ឌលផ្តល់សេវាសាធារណៈទីតាំងជីបម៉ុង ណូរ៉ូមល, មណ្ឌលផ្តល់បណ្ណបើកបរទីតាំងផ្សារទំនើបអ៊ីអន១ & អ៊ីអន២, មណ្ឌលត្រួតពិនិត្យលក្ខណៈបច្ចេកទេសយានយន្តគ្រប់ទីតាំង បើកដំណើរការឡើងវិញ។ ទោះជាយ៉ាងនេះក្តី ក្រសួងជំនាញនេះ បានក្រើនរំឭកដល់ប្រជាពលរដ្ឋឱ្យគោរពគោលការណ៍ ៣កុំ ៣ការពារ របស់រាជរដ្ឋាភិបាល ក៏ដូចជាក្រសួងសុខាភិបាល ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ខណៈជំងឺរាតត្បាតនេះនៅមិនទាន់ស្រាកស្រាន្ត។