(ខេត្តកណ្ដាល) ថ្ងៃសៅរិ៍ ១២រោច ខែពិសាខ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី៨ ខែឧសភា ឆ្នាំ២០២១ ឯកឧត្តមរដ្ឋលេខាធិការ ស៊ុយ សាន បានដឹកនាំក្រុមការងារនាំយកគ្រឿងឧបភោគបរិភោគដែលជាអំណោយដ៏ថ្លៃថ្លារបស់ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះធំ និងក្រុមការងារ ទៅប្រគល់ជូនគណបក្សប្រជាជនកម្ពុជាស្រុកកោះធំ ខេត្តកណ្ដាល ដើម្បីរួមចំណែកក្នុងការប្រយុទ្ធប្រឆាំងនឹងជំងឺកូវី-១៩។ សូមជម្រាបជូនថា៖ គ្រឿងឧបភោគបរិភោគ ជាអំណោយដ៏ថ្លៃថ្លារបស់ឯកឧត្តមទេសរដ្ឋមន្ត្រី និងក្រុមការងារដែលត្រូវបាននាំយកទៅប្រគល់ជូនក្នុងឱកាសនោះរួមមាន៖ អង្ករចំនួន ៦២.៤៣០ គីឡូក្រាម មីចំនួន ៩៣.៦៤៥ កញ្ចប់ ត្រីខចំនួន ៦.២៤៣ យួរ។ ការប្រគល់-ទទួលគ្រឿង ឧបភោគបរិភោគទាំងនេះ ធ្វើឡើងនៅសាលប្រជុំគណបក្សប្រជាជនកម្ពុជាស្រុកកោះធំ ដោយមានប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានឃុំទាំង១១របស់ស្រុកកោះធំមកទទួល ដើម្បីធ្វើការបែងចែកបន្តទៅដល់គ្រួសារក្រ១ ចំនួន ១.០៩២គ្រួសារ គ្រួសារក្រ២ចំនួន ២.៤៦៧គ្រួសារ ប្រជាជនជីវភាពទាបចំនួន ១.៤៤៣គ្រសារ និងប្រជាការពារចំនួន ១.២៤១គ្រួសារ សរុបទាំងអស់ចំនួន៦.២៤៣គ្រួសារ។ ក្រោយពីការប្រគល់-ទទួល ក្រុមការងារគណបក្សប្រជាជនកម្ពុជាចុះជួយមូលដ្ឋានឃុំ ត្រូវបែងចែកកម្លាំងទៅតាមគោលដៅរៀងៗ ខ្លួននាំយក គ្រឿងឧបភោគបរិភោគចាំបាច់ទាំងនោះ ទៅចែកជូនប្រជាពលរដ្ឋក្នុងឃុំទាំង១១ នៃស្រុកកោះធំ ខេត្តកណ្ដាល ដើម្បីសម្រួលដល់ការលំបាកក្នុងកំឡុងពេលនៃការឆ្លងរីករាលដាលជំងឺកូវីដ-១៩។ គួរកត់សម្គាល់ផងដែរថា គណៈបក្សប្រជាជនកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាតែងតែគិតគូរពីសុខទុក្ខបងប្អូនប្រជាពលរដ្ឋនៅទូទាំងប្រទេស ដោយមិនប្រកាន់វណ្ណ: ពូជសាសន៍ ពណ៌សម្បុរ ឬនិន្នាការនយោបាយអ្វីឡើយ ធ្វើយ៉ាងណាជួយប្រជាពលរដ្ឋឱ្យបានទាន់ពេលវេលានៅក្នុងកាលៈទេសៈជួបការលំបាក៕