[ក្រសួងព័ត៌មាន] - ថ្នាក់ដឹកនាំជាន់ខ្ពស់ក្រសួងការពារជាតិ ចុះពិនិត្យស្ថានភាពស្ថាបនាផ្លូវ ៣៨ខ្សែក្នុងក្រុងសៀមរាប !
2021-04-27
Go to the website published ក្រសួងព័ត៌មាន
សៀមរាប៖ នៅព្រឹកថ្ងៃទី២៧ ខែមេសា ឆ្នាំ២០២១នេះ ឯកឧត្តមនាយឧត្តមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ តំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណ:កម្មការអន្តរក្រសួង អនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប បានអញ្ជើញ ចុះពិនិត្យផ្លូវចំនួន១៣ខ្សែ ដែលស្ថាបនាដោយកងវិស្វកម្មលេខ១៧៨ ស្ពាន ថ្នល់ ក្រសួងការពារជាតិ ដោយមានការអមដំណើរដោយឯកឧត្តមឧត្តមសេនីយ៍ឯក សឿន រឿត ទីប្រឹក្សាសម្តេចពិជ័យសេនា និង ជានាយករង នាយកដ្ឋានវិស្វកម្មក្រសួងការពារជាតិ រួមទាំងអស់លោកជាមន្ត្រីបច្ចេកទេសស្ពានថ្នល់ អន្តរក្រសួងចូលរួមផងដែរ។
ក្នុងឱកាសនោះដែរ ឯកឧត្តមនាយឧត្តមសេនីយ៍ ឃឹម ប៊ុនសុង បានវាយតម្លៃខ្ពស់ចំពោះវឌ្ឍនភាព លើកិច្ចដំណើរការរបស់ការដ្ឋានទាំងអស់ ក្នុងប្រតិបត្តិការរបស់ខ្លួន ប្រកបដោយភាពរលូន និងទទួលខុសត្រូវខ្ពស់ ដោយអនុវត្តតាមលក្ខណ:បច្ចេកទេស នៃ សៀវភៅបន្ទុកត្រឹមត្រូវ ដែលអាចនឹងរំពឹងទុកថាមានគុណភាពរឹងមាំ អាចប្រើប្រាស់ជាប់បានយូរអង្វែង ហើយបញ្ចប់តាមផែនការដែលបានគ្រោងទុក ក្នុងកិច្ច ស្ថាបនាហេដ្ឋារចនាសម្ព័ន្ធផ្លូវ៣៨ខ្សែ នៅក្រុងទេសចរណ៍សៀមរាប ដែលកំពុងឆ្ពោះទៅរកការអភិវឌ្ឍជាទីក្រុងទំនើប-ឆ្លាតវៃ នាថ្ងៃអនាគត ដែលជាចក្ខុវិស័យវែងឆ្ងាយរបស់ប្រមុខរាជរដ្ឋាភិបាលកម្ពុជា។
ឯកឧត្តមនាយឧត្តមសេនីយ៍ ក៏បានធ្វើការកោតសរសើរផងដែរ ចំពោះកងកម្លាំងវិស្វកម្មទាំងអស់ ដែលបានខិតខំយកចិត្តទុកដាក់ខ្ពស់ ទៅតាមបទដ្ឋានបច្ចេកទេសសាងសង់ ព្រមទាំងបានរៀបចំដាក់ប្រព័ន្ធលូទឹកភ្លៀង និង ទឹកកខ្វក់ប្រកបទៅដោយបច្ចេកទេសល្អ ព្រមទាំងបានចាប់ដំណើរការធ្វើការចាក់ផ្លូវបេតុង ទៅតាមការក្តីស្រមៃរបស់ប្រជាពលរដ្ឋខេត្តសៀមរាប ដែលទន្ទឹងរងចាំជាយូរមកហើយ។ ឯកឧត្តមក៏សង្ឃឹម ក្រុងសៀមរាបនឹងលើកកម្ពស់សោភ័ណភាពបន្ថែមទៀត ស័ក្កិសមជាទីក្រុងទេសចរណ៍ វប្បធម៌ ប្រវត្តិសាស្ដ្រ អភិវឌ្ឍជាទីក្រុងឆ្លាតវៃ នាពេលអនាគត ដើម្បីជួយជំរុញដល់កំណើនសេដ្ឋកិច្ចជាតិផង។
តាមការបញ្ជាក់របស់ឯកឧត្តមឧត្តមសេនីយ៍ឯក សឿន រឿត ទីប្រឹក្សាសម្តេចពិជ័យសេនា និងជានាយករង នាយកដ្ឋានវិស្វកម្មក្រសួងការពារជាតិ បានឲ្យដឹងថា ចាប់ពីដំណើរការស្ថាបនាផ្លូវទាំង៣៨ខ្សែនេះមក កងវិស្វកម្មលេខ១៧៨ ទទួលស្ថាបនាផ្លូវចំនួន១៣ខ្សែ ចាប់ពីថ្ងៃទី៣០ វិច្ឆិកា ឆ្នាំ២០២០ មកដល់ត្រឹមថ្ងៃទី២៦ មេសានេះ កងវិស្វកម្មលេខ១៧៨ស្ថាបនាមានប្រវែងសរុប ២៦,៥៣១ម៉ែត្រ ដោយប្រើកម្លាំងពលកម្ម ចំនួន៦១៣នាក់, ប្រើប្រាស់គ្រឿងចក្រ រថយន្ត និង ឧបករណ៍ចំនួន ១២៦គ្រឿង ហើយលទ្ធផលសម្រេចបាន ៤៤,៤៩% លទ្ធផលដំឡើងលូជ័រ បាន៩២,០៤% ៕
