[Kampuchea Thmey] - កោះហៅបុរសម្នាក់ សុំទោសជាសាធារណៈ ករណីប្រើស្លាកលេខមិនត្រឹមត្រូវ ថែមទាំងប្រើពាក្យសំដីមិនសមរម្យ
2021-04-24
Go to the website published Kampuchea Thmey
ភ្នំពេញ៖ សមត្ថកិច្ចនៃអធិការដ្ឋាននគរបាលខណ្ឌឫស្សីកែវ បានធ្វើការកោះហៅបុរសម្នាក់ ចូលខ្លួនមកបំភ្លឺ ចំពោះមុខសមត្ថកិច្ច និងឲ្យសុំទោសជាសាធារណៈ ករណីប្រើស្លាកលេខមិនត្រឹមត្រូវ ថែមទាំងប្រើពាក្យសំដីមិនសមរម្យលើបណ្តាញសង្គមហ្វេសបុក កាលពីរសៀលថ្ងៃទី២៤ ខែមេសា ឆ្នាំ២០២១។
បុរសដែលសមត្ថកិច្ចកោះហៅនោះ មានឈ្មោះ ប៉ែន លឹម អាយុ៤៩ឆ្នាំ មុខរបរនៅផ្ទះ រស់នៅសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
បើតាមប្រភពព័ត៌មានពីក្រុមការងារព័ត៌មាន និងប្រតិកម្មរហ័ស នៃស្នងការនគរបាលរាជធានីភ្នំពេញបានឲ្យដឹងថា បុរសខាងលើនេះ បានប្រើប្រាស់ស្លាកលេខមិនត្រឹមត្រូវបំពាក់លើរថយន្ត របស់ខ្លួនម៉ាក Highlander ពណ៌ស និងបានប្រើប្រាស់ពាក្យសម្តីមិនសមរម្យនៅលើបណ្តាញសង្គមហ្វេសបុក នៅវេលាម៉ោង ៤និង០០រសៀល ថ្ងៃទី២៤ ខែមេសា ឆ្នាំ២០២១ ហើយត្រូវបានសមត្ថកិច្ចនៃអធិការដ្ឋាននគរបាលខណ្ឌឫស្សីកែវ ធ្វើការកោះហៅដើម្បីចូលខ្លួនមកបំភ្លឺ ចំពោះមុខសមត្ថកិច្ច។
នៅចំពោះមុខសមត្ថកិច្ច បុរសម្នាក់នេះ ក៏បានទទួលស្គាល់នូវកំហុស និងបានដោះស្លាកលេខមិនត្រឹមត្រូវនោះចេញ ដោយបានធ្វើកិច្ចសន្យា និងការពាក់ស្លាកលេខមិនត្រឹមត្រូវ ព្រមទាំងបានធ្វើការថតជាវីដេអូសុំទោសជាសាធារណៈ ចំពោះការប្រើប្រាស់ពាក្យសំដីមិនសមរម្យនៅលើបណ្តាញសង្គម។
ដោយមូលហេតុសុខភាពលើសឈាមផង ស្លាប់មួយចំហៀងខ្លួនផង និងកំពុងលេបថ្នាំសរសៃប្រសាទផង ក្រោយពីធ្វើការណែនាំអប់រំ ធ្វើកិច្ចសន្យា និងសុំទោសរួចរាល់ សមត្ថកិច្ចក៏បានអនុញ្ញាតឲ្យវិលត្រឡប់ទៅគេហដ្ឋានវិញ៕
