ក្រសួងសាធារណការ និងដឹកជញ្ជូន បន្តយុទ្ធនាការចាក់វ៉ាកសាំងបង្ការជំងឺកូវីដ-១៩ ដូសទីពីរ ជូន បុគ្គលិក មន្ត្រីរាជការ មន្ត្រីកិច្ចសន្យាក្រសួង និងប្រជាពលរដ្ឋនៅក្នុងខ័ណ្ឌឬស្សីកែវ រហូតដល់ថ្ងៃទី០៣ ខែឧសភា ឆ្នាំ២០២១ ពេលព្រឹកចាប់ពីម៉ោង ៨:០០ ដល់ម៉ោង១១:០០ ពេលរសៀល ចាប់ពីម៉ោង ២:00 ដល់ម៉ោង៤:៣០ ហើយគិតត្រឹមថ្ងៃទី២៤ ខែមេសា ឆ្នាំ២០២១ ការចាក់វ៉ាក់សាំងដូសទីពីរ សម្រេចបាន សរុប ៣១៨៣ ដូស ថ្ងៃសៅរិ៍ ១៣កើត ខែពិសាខ ឆ្នាំឆ្លូវ ត្រីស័ក ព.ស. ២៥៦៤ ត្រូវនឹងថ្ងៃទី២៤ ខែមេសា ឆ្នាំ២០២១យោង តាមរបាយការណ៍របស់អនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩នៃក្រសួងសាធារណ ការ និងដឹកជញ្ជូន បានឱ្យដឹងថា៖ ការចាក់វ៉ាក់សាំងបង្ការជំងឺកូវីដ-១៩ ដូសទី២ រយៈពេល៧ថ្ងៃចាប់គិត ពីថ្ងៃទី១៥ ខែមេសា ឆ្នាំ២០២១ រហូតដល់ថ្ងៃទី២៤ ខែមេសា ឆ្នាំ២០២១ សរុបទាំងអស់សម្រេចបានចំនួន ៣១៨៣ ដូស ក្នុងនោះ បុគ្គលិកមន្ត្រីរាជការ មន្ត្រីជាប់កិច្ចសន្យាក្រសួងសរុបទាំងអស់បានចំនួន ១១០២ដូស ស្មើនឹង៣៤,៦២% និងប្រជាពលរដ្ឋមកពីខណ្ឌឬស្សីកែវសរុបបានចំនួន ២០៨១ ដូស ស្មើនឹង ៦៥,៣៨%។ សូមជម្រាបជូនដំណឹងផងដែរថា៖ ក្រសួងនៅបន្តយុទ្ធនាការចាក់វ៉ាកសាំងបង្ការជំងឺកូវីដ-១៩ ដូសទីពីរ ជូនដល់បុគ្គលិក មន្ត្រីរាជការ មន្ត្រីកិច្ចសន្យាក្រសួង និងប្រជាពលរដ្ឋនៅក្នុងខ័ណ្ឌឬស្សីកែវជារៀងរាល់ថ្ងៃរហូតដល់ថ្ងៃ០៣ ខែឧសភា ពេលព្រឹកចាប់ពីម៉ោង ៨:០០ ដល់ម៉ោង១១:០០ ពេលរសៀល ចាប់ពីម៉ោង ២:00 ដល់ម៉ោង៤:៣០។ អនុគណៈកម្មការ ចាក់វ៉ាក់សាំងបង្ការជំងឺកូវីដ-១៩ នៃក្រសួងសាធារណការ និង ដឹកជញ្ជូន បានរៀបចំ សណ្ដាប់ធ្នាប់ និងរក្សាគម្លាតសុវត្ថិភាពបានត្រឹមត្រូវតាមការណែនាំរបស់ក្រសួងសុខាភិបាលចំពោះបង ប្អូនប្រជាពលរដ្ឋដែលអញ្ជើញមកចាក់ថ្នាំវ៉ាក់សាំង និងតម្រូវឱ្យអនុវត្តការលាងដៃ បាញ់អាកុល វាស់ កំដៅ រក្សាអនាម័យ មុននឹងអនុញ្ញាតឱ្យចូលទីតាំងផ្តល់វ៉ាក់សាំង ដើម្បីបញ្ចៀសហានិភ័យនៃការឆ្លងជំងឺកូវីដ-១៩ ជាយថាហេតុ។ បងប្អូនដែលបានទទួលវ៉ាក់សាំងបង្ការជំងឺកូវីដ-១៩ រួចហើយ សូមមេត្តាបន្តអនុវត្តវិធានសុខាភិបាល ៣ ការពារ (ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាព បុគ្គលពីមួយម៉ែត្រកន្លះឡើងទៅ) និងបីកុំ (កុំទៅកន្លែងមានមនុស្សកុះករច្រើន កុំទៅកន្លែងបិទគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា) ដើម្បីបិទបញ្ចប់ព្រឹត្តការណ៍សហគមន៍ ២០ កុម្ភៈ ឱ្យបានឆាប់៕