ឯកឧត្តមទេសរដ្ឋមន្ត្រី ស៊ុន ចាន់ថុល និងឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អញ្ជើញចុះពិនិត្យយុទ្ធនាការចាក់វ៉ាក់សាំងការពារជំងឺកូវីដ-១៩ ក្នុងថ្ងៃទីបួនសម្រាប់បុគ្គលិកមន្ត្រីរាជការគ្រប់ជាន់ថ្នាក់ក្រោមឱវាទក្រសួង ថ្ងៃអាទិត្យ ៧រោច ខែចេត្រ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី០៤ ខែមេសា ឆ្នាំ២០២១ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក) ដោយមានការអមដំណើរពីឯកឧត្តមរដ្ឋលេខាធិការ ស៊ុយ សាន ប្រធានអនុគណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩ បានអញ្ជើញចុះពិនិត្យយុទ្ធនាការចាក់វ៉ាក់សាំងការពារជំងឺកូវីដ-១៩ក្នុងថ្ងៃទីបួន សម្រាប់បុគ្គលិកមន្ត្រីរាជការគ្រប់ជាន់ថ្នាក់ក្រោមឱវាទ ដោយមានការអញ្ជើញចូលរួមពីថ្នាក់ដឹកនាំក្រសួងទទួលបន្ទុកផងដែរ។ យុទ្ធនាការចាក់វ៉ាក់សាំងនេះរៀបចំឡើងដោយគណៈកម្មការចំពោះកិច្ចចាក់វ៉ាក់សាំងកូវីដ-១៩ក្នុងក្របខណ្ឌទូទាំងប្រទេស(គ.វ.ក-១៩) សហការជាមួយអនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩នៃក្រសួងសាធារណការ និងដឹកជញ្ជូន ក្នុងគោលបំណងដើម្បីបង្ការ និងទប់ស្កាត់ការឆ្លងរីករាលដាលជំងឺកូវីដ-១៩ ដែលបានប្រព្រឹត្តទៅអស់រយៈពេលបីថ្ងៃកន្លងទៅហើយនៅទីស្តីការក្រសួងផ្ទាល់ ក្រោមកិច្ចខិតខំប្រឹងប្រែង និងការយកចិត្តទុកដាក់ខ្ពស់ពីសំណាក់ក្រុមគ្រូពេទ្យស្ម័គ្រចិត្តនៃសម្ព័ន្ធគ្រូពេទ្យសហភាពសម្ព័ន្ធយុវជនកម្ពុជា។ យោងតាមរបាយការណ៍របស់អនុគណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩នៃក្រសួងសាធារណការ និងដឹកជញ្ជូនបានឱ្យដឹងថាគិតត្រឹមថ្ងៃទី៣ ខែមេសា ឆ្នាំ២០២១ ការចាក់វ៉ាក់សាំងសម្រាប់បុគ្គលិកមន្ត្រីរាជការគ្រប់ជាន់ថ្នាក់របស់ក្រសួងសម្រេចបាន១២១៩នាក់ ក្នុងចំណោមចំនួនបុគ្គលិកមន្ត្រីរាជការដែលគ្រោងចាក់វ៉ាក់សាំងតាមផែនការប្រមាណជាង២២០០នាក់។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រីបានអញ្ជើញឯកឧត្តមប្រធានសហភាពសហព័ន្ធយុវជនកម្ពុជាចូលទស្សនាអគាររដ្ឋបាលនៃទីស្ដីការក្រសួង វិទ្យាស្ថានតេជោសែនសាធារណការ និងដឹកជញ្ជូន និងមណ្ឌលផ្ដល់សេវាសាធារណៈរបស់ក្រសួងផងដែរ។ សូមរំលឹកផងដែរថា អស់​រយៈ​ពេលជាច្រើនសប្ដាហ៍កន្លងមក​ហើយ ដែល​កម្ពុជាបានប្រយុទ្ធ​ប្រឆាំងនឹង​​ព្រឹត្តិការណ៍​សហគមន៍​២០​ កុម្ភៈ ដែលជា​ព្រឹត្តិការណ៍​ឆ្លង​ជំងឺ​កូវីដ​១៩​ក្នុង​សហគមន៍​មាន​វិសាលភាព​ទូលំទូលាយ​ជាង​ព្រឹត្តិការណ៍​មុន​ៗ​។ គិត​រហូត​ម​កទល់​ពេល​នេះ ព្រឹត្តិការណ៍​សហគមន៍​២០​កុម្ភៈ មិន​ត្រឹម​តែ​បានឆ្លងរាលដាលដល់រាជធានី​ភ្នំពេញ​ប៉ុណ្ណោះ​ទេ ប៉ុន្តែវាថែមបានឆ្លងរាលដាលដល់បណ្ដា​ខេត្ត​ផ្សេង​ទៀត​ផងដែរ​។ ដើម្បី​ទប់​ស្កាត់​ជំងឺនេះកុំឱ្យឆ្លងរាល​ដាល​កាន់កាន់តែខ្លាំង រាជរដ្ឋាភិបាលបានដាក់ចេញនូវវិធានការជាច្រើនដើម្បីទប់ស្កាត់ការឆ្លងរីករាលដាលកាន់តែធំទៅៗ៕