មន្ទីរសាធារណការនិងដឹកជញ្ជូនខេត្តមណ្ឌលគិរី មានផែនការស្ថាបនាស្ពានបេតុងចំនួន៤កន្លែងជំនួសស្ពានដែកបេឡេចាស់ ដែលមានសភាពទ្រុឌទ្រោម ស្ថិតក្នុងឃុំប៊ូស្រា ស្រុកពេជ្រាដា ដើម្បីកែសម្រួលជីវភាពប្រជាពលរដ្ឋ ការដឹកជញ្ជូនកសិផលឱ្យកាន់តែងាយស្រួល ពិសេសបំរើរដល់វិស័យទេសចរណ៍ខណៈដែលភ្ញៀវទេសចរបានទៅលេងខេត្តនេះកាន់តែច្រើន។ លោក រស់ សុធន ប្រធានមន្ទីរសាធារណការនិងដឹកជញ្ជូនខេត្តមណ្ឌលគិរី បានមានប្រសាសន៍ប្រាប់អ្នកយកព័ត៌មានវិទ្យុជាតិកម្ពុជាឱ្យដឹងថា បច្ចុប្បន្នមន្ទីរសាធារណការនិងដឹកជញ្ជូនខេត្តមណ្ឌលគិរី បានស្ថាបនាផ្លូវវៀងក្រុងចំនួន៣ខ្សែ ស្ពានជាច្រើនកន្លែង រួមទាំងការដាក់ប្រព័ន្ធលូមេ ជួសជុលផ្លូវសំបុកមាន់ជាប្រចាំ សម្រាប់ផ្តល់ជូនការតភ្ជាប់សរសៃ ឈាមចរាចរណ៍ ពីទីប្រជុំជនទៅកាន់ជនបទ ឱ្យកាន់តែមានភាពប្រសើរឡើងក្នុងវិស័យដឹកជញ្ជូន។ លោកបន្តថា ក្រៅនោះមន្ទីរក៏គ្រោងសាងសង់ស្ពានបេតុងចំនួន៤កន្លែង បន្ថែមទៀតជំនួសស្ពានដែកបេឡេចាស់ ឆ្ពោះទៅកាន់រមណីយដ្ឋានទឹកជ្រោះប៊ូស្រា និងទៅកាន់ បណ្តាស្រុកមួយចំនួនទៀត ដើម្បីឱ្យការធ្វើដំណើររបស់ប្រជាពលរដ្ឋនិងភ្ញៀវទេសចរមាន សុវត្តិភាព និងរហ័សជាងមុន។ « ផ្លូវទៅប៊ូស្រាយើងទៅតំបន់ទេសចរណ៍នឹង យើងមានស្ពានដែកបាឡេ៤ទៀត ដែលយើងដាក់បញ្ចូលផែនការស្នើសុំថវិកាជាតិដើម្បីធ្វើជាស្ពានបេតុងដែលមានទំហំធំៗដូចជាស្ពានអូផ្លាយដែលកំពុងតែធ្វើជាគម្រោងឆ្នាំ២០២០កន្លងមកនេះ»។ លោកប្រធាន ក៏សំណូមពរទៅដល់ប្រជាពលរដ្ឋដែលប្រើប្រាស់ដងផ្លូវថ្នល់ទាំងអស់ កុំដឹកលើសទម្ងន់កំណត់ កុំរំលោភយកចំណីផ្លូវ កុំចាក់ដីបំពានលើផ្លូវថ្នល់ ដើម្បីធានាគុណភាពផ្លូវថ្នល់បានយូរអង្វែង ។ គួរបញ្ជាក់ថា ខេត្តមណ្ឌលគិរីសំបូរទៅដោយរមណីយដ្ឋានធម្មជាតិ ជាពិសេសទឹកជ្រោះដ៏ស្រស់ត្រកាល ដោយបានទាក់ទាញភ្ញៀវទេសចរទៅលេងកម្សាន្តជាច្រើន ខណៈដែលរាជរដ្ឋាភិបាល បាននិងកំពុងជំរុញការអភិវឌ្ឍន៍ហេដ្ឋារចនាសម្ព័ន្ធ និងព្រលានយន្តហោះ ដើម្បីប្រែក្លាយខេត្តក្នុងតំបន់ភូមិភាគ ឦសានមួយនេះជាទីស្រូបទាក់ទាញភ្ញៀវទេសចរ ៕