[Moneaksekar] - ជញ្ជីងថ្លឹងរថយន្តនៅលើផ្លូវជាតិលេខ៦ ក្នុងស្រុកប្រាសាទបាគង ជាកន្លែងប្រមូលលុយរបស់លោក គឹម ប៊ុណ្ណា
2018-02-13
Go to the website published Moneaksekar
លោក គឹម ប៊ុណ្ណា ប្រធានមន្ទីរសាធារណការនិងដឹកជញ្ជូនខេត្តសៀមរាប ហើយជាប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦ ក្នុងឃុំរលួសកើត ស្រុកប្រាសាទបាគង ខេត្តសៀមរាប កំពុងល្បីល្បាញខាងប្រព្រឹត្តអំពើពុករលួយ ហើយចាត់ទុកស្ថានីយ៍ជញ្ជីងថ្លឹងរថយន្តគឺជាកន្លែងរកចំណូលតាមរបៀបពុករលួយដោយគ្មានញញើតអ្វីទាំងអស់។ ដូច្នេះលោក ស៊ុន ចាន់ថុល ដែលជារដ្ឋមន្ត្រីក្រសួងសាធារណការនិងដឹកជញ្ជូន មិនគួរបណ្ដែតបណ្ដោយមន្ត្រីក្រោមឱវាទប្រើតួនាទីនិងអំណាចប្រព្រឹត្តអំពើពុករលួយយ៉ាងពេញបន្ទុកតទៅទៀតទេ។ ប្រសិនបើលោក ស៊ុន ចាន់ថុល នៅតែបណ្ដែតបណ្ដោយតទៅទៀតនោះ មានន័យថាលោក ស៊ុន ចាន់ថុល គឺជាអ្នកឃុបឃិតបើកដៃឲ្យលោក គឹម ប៊ុណ្ណា ធ្វើអ្វីៗតាមអំពើចិត្តហើយមានការបែងចែកផលប្រយោជន៍យ៉ាងសុខស្រួលតែម្តង។
ប្រភពពីក្រុមឈ្មួញរកស៊ីដឹកជញ្ជូនទំនិញឆ្លងកាត់ផ្លូវជាតិលេខ៦ ក៏ដូចជាពលរដ្ឋដែលរកស៊ីដឹកដី ដឹកខ្សាច់ ដឹកថ្ម បានឲ្យដឹងថាលោក គឹម ប៊ុណ្ណា ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦ ត្រង់ចំណុចភូមិអូរចិញ្ចៀន ឃុំរលួសកើត ស្រុកប្រាសាទបាគង ខេត្តសៀមរាប កំពុងប្រើអំណាចប្រមូលលុយតាមរបៀបពុករលួយយ៉ាងគឃ្លើន។ ប្រភពបានឲ្យដឹងទៀតថា ទោះបីពួកគាត់ដឹកជញ្ជូនទំនិញ ដឹកដី ដឹកខ្សាច់ ដឹកថ្ម មិនលើសទម្ងន់ក៏ដោយ ក៏ត្រូវមន្ត្រីប្រចាំស្ថានីយ៍ជញ្ជីងថ្លឹងរថយន្តក្រោមការគ្រប់គ្រងរបស់លោក គឹម ប៊ុណ្ណា គាបយកលុយតាមរបៀបពុករលួយយ៉ាងកំរោលដែរ។ ហេតុនេះហើយទើបក្រុមឈ្មួញ ក្រុមអាជីវករ និងប្រជាពលរដ្ឋអំពាវនាវឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ចាត់វិធានការទប់ស្កាត់អំពើពុករលួយរបស់លោក គឹម ប៊ុណ្ណា និងបក្ខពួកជាបន្ទាន់។
តាមការអះអាងពីឈ្មួញតូចតាចដឹកជញ្ជូនទំនិញឆ្លងកាត់ស្ថានីយ៍ជញ្ជីងថ្លឹងរថយន្តខាងលើ បានឲ្យដឹងថា បើទោះបីរថយន្តពួកគាត់ដឹកជញ្ជូនទំនិញមិនលើសទម្ងន់ ក៏ចៀសមិនផុតពីត្រូវក្រុមលោក គឹម ប៊ុណ្ណា ប្រើលេសគាបយកលុយតាមរបៀបពុករលួយនោះទេ។ ចំណែកឈ្មួញធំៗដែលដឹកទំនិញតាមរថយន្តធំៗលើសចំណុះស្ទើរស្រុតផ្លូវជាតិលេខ៦ទៅហើយ ប៉ុន្តែមិនឃើញលោក គឹម ប៊ុណ្ណា និងបក្ខពួកហ៊ានប៉ះពាល់ឈ្មួញទាំងនោះទេ។ ប្រការនេះហើយទើបប្រជាពលរដ្ឋនិងឈ្មួញតូចតាចបើកកកាយរឿងអាស្រូវពុករលួយរបស់លោក គឹម ប៊ុណ្ណា ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦ ក្នុងភូមិអូរចិញ្ចៀន ឃុំរលួសកើត ស្រុកប្រាសាទបាគង ជាសាធារណៈតែម្តង។ បច្ចុប្បន្នលោក គឹម ប៊ុណ្ណា ត្រូវគេដាក់រហស្សនាមថាជាប្រធានស្ថានីយ៍ជញ្ជីងថ្លឹងរថយន្តមុខលុយដែលប្រព្រឹត្តអំពើពុករលួយដល់ឆ្អឹងតែម្តង។
អំពើពុករលួយដែលលោក គឹម ប៊ុណ្ណា និងបក្ខពួកកំពុងតែប្រព្រឹត្តយ៉ាងគឃ្លើននោះ គឺការគាបសង្កត់យកលុយពីឈ្មួញតូចតាច អាជីវករ និងពលរដ្ឋដែលដឹកជញ្ជូនទំនិញឆ្លងកាត់ផ្លូវជាតិលេខ៦ ពីខេត្តសៀមរាប ចូលខេត្តកំពង់ធំ និងពីខេត្តកំពង់ធំ ចូលខេត្តសៀមរាប បើទោះបីរថយន្តផ្ទុកទំនិញមិនលើសទម្ងន់ហើយគោរពតាមបទដ្ឋានបច្ចេកទេសយ៉ាងណាក៏ដោយ។ ប៉ុន្តែលោក គឹម ប៊ុណ្ណា និងបរិវារមិនហ៊ានប៉ះពាល់ឈ្មួញប្រើប្រាស់រថយន្តធំៗដឹកជញ្ជូនទំនិញ ដឹកអាចម៍ដី ដឹកខ្សាច់ ដឹកថ្ម ដែលផ្ទុកលើសចំណុះ មិនគោរពតាមលក្ខណៈបច្ចេកទេសធ្វើឲ្យខូចផ្លូវជាបន្តបន្ទាប់នោះទេ។ ការដែលលោក គឹម ប៊ុណ្ណា ប្រធានសា្ថនីយ៍ជញ្ជីងថ្លឹងរថយន្តលើផ្លូវជាតិលេខ៦ ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីថ្នាក់លើផងដែរ ទើបគេហ៊ានប្រព្រឹត្តអំពើពុករលួយយ៉ាងកំរោល។ ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលធ្លាប់ប្ដេជ្ញាលុបបំបាត់អំពើពុករលួយនៅលើដងផ្លូវនោះ មិនគួរមើលរំលងអំពើពុករលួយរបស់លោក គឹម ប៊ុណ្ណា និងបក្ខពួកបរិវារឡើយ ព្រោះលោក គឹម ប៊ុណ្ណា និងបរិវារកំពុងប្រើតួនាទីនិងអំណាចប្រព្រឹត្តអំពើពុករលួយលើដងផ្លូវយ៉ាងគឃ្លើនបំផុត៕
