::: ការចុះត្រួតពិនិត្យស្ថានភាពផ្លូវថ្នល់-ស្ពាន នៅខេត្តសៀមរាប , បន្ទាយមានជ័យ , បាត់ដំបង និងខេត្តកំពង់ធំ ដើម្បីទទួលបានគុណភាពល្អប្រសើរតាមស្តង់ដារបច្ចេកទេស និងការប្រើប្រាស់បានយូរអង្វែង ថ្ងៃទី២៤ ដល់ទី២៦ ខែកុម្ភៈ ឆ្នាំ២០២១ ឯកឧត្តម ហេង រត្នពិសិដ្ឋ អគ្គនាយកសាធារណការ និងឯកឧត្ដម ហ៊ាង វុត្ថា អគ្គនាយកបច្ចេកទេស នៃក្រសួងសាធារណការនិងដឹកជញ្ជូន និងឯកឧត្ដម រស់ បរម អគ្គនាយករងថវិកា នៃក្រសួងសេដ្ឋកិច្ចនិងហិរញ្ញវត្ថុ បានដឹកនាំក្រុមការងារបច្ចេកទេសអន្តរក្រសួងចុះពិនិត្យការអនុវត្តនិងវឌ្ឍនភាពការងារសាងសង់ហេដ្ឋារចនាសម្ព័ន្ធផ្លូវថ្នល់ ស្ពាន ក្នុងក្របខណ្ឌថវិកាជាតិ ជំពូក៦១ និង២១ ឆ្នាំ២០២០ និង ២០២១ ក្នុងខេត្តសៀមរាប បន្ទាយមានជ័យ បាត់ដំបង និងកំពង់ធំ។ ក្នុងឱកាសនោះផងដែរ ក្រុមការងារ បានណែនាំដល់អង្គភាពអនុវត្តគម្រោង ត្រូវអនុវត្តតាមអនុសាសន៍របស់ឯកឧត្តមទេសរដ្ឋមន្រ្តី ក្នុងការសាងសង់ប្រកបដោយគុណភាព ចៀសវាងការធ្វើវិញដដែលៗ ម្ដងជាពីរដង ជាបីដង។ បន្ថែមទៀត ឯកឧត្តមថ្នាក់ដឹកនាំ នៃអគ្គនាយកដ្ឋានទាំងពីរ បានឲ្យអង្គភាពអនុវត្តយកចិត្តទុកដាក់លើបញ្ហាសុវត្ថិភាពនៅការដ្ឋាន ចៀសវាងគ្រោះថ្នាក់ដល់ប្រជាពលរដ្ឋ និងត្រូវរៀបចំផែនការអនុវត្តគម្រោងឲ្យមានប្រសិទ្ធភាព ចៀសវាងការសាងសង់មានរយៈពេលយូរ ដែលនាំឲ្យប៉ះពាល់ដល់ការធ្វើដំណើររបស់ប្រជាពលរដ្ឋ ក៏ដូចជាប៉ះពាល់ដល់សេដ្ឋកិច្ចជាតិ។