ឯកឧត្តមទេសរដ្ឋមន្ត្រី បានអញ្ជើញកាត់ខ្សែបូសម្ពោធដាក់ឲ្យប្រើប្រាស់ជាផ្លូវការទីស្នាក់ការគណបក្សថ្មីស្រុកកោះធំ ខេត្តកណ្ដាល និងដឹកនាំកិច្ចប្រជុំផ្សព្វផ្សាយរបាយការណ៍ស្ដីពីសភាពការណ៍ទូទៅ និងការងារគណបក្សឆ្នាំ២០២០ និងទិសដៅភារកិច្ចឆ្នាំ២០២១ របស់គណៈកម្មាធិការកណ្ដាលគណបក្សប្រជាជនកម្ពុជា ថ្ងៃសៅរ៍ ៩កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២០ ខែកុម្ភៈ ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានក្រុមការងារគណបក្សចុះមូលដ្ឋានស្រុកកោះធំ បានអញ្ជើញកាត់ខ្សែបូរសម្ពោធដាក់ឲ្យប្រើប្រាស់ជាផ្លូវការទីស្នាក់ការគណបក្សថ្មីស្រុកកោះធំ ខេត្តកណ្ដាល និងដឹកនាំកិច្ចប្រជុំផ្សព្វផ្សាយរបាយការណ៍ស្ដីពីសភាពការណ៍ទូទៅ និងការងារគណបក្សឆ្នាំ២០២០ និងទិសដៅភារកិច្ចឆ្នាំ២០២១ របស់គណៈកម្មាធិការកណ្ដាលគណបក្សប្រជាជនកម្ពុជា។ សមាសភាពចូលរួមក្នុងកិច្ចប្រជុំនេះរួមមានសមាជិកសមាជិកាគណៈអចិន្រ្តៃយ៍ ក្រុមការងារគណបក្សចុះមូលដ្ឋានស្រុក ប្រធាន-អនុប្រធានក្រុមការងារគណបក្សចុះមូលដ្ឋានស្រុក ប្រធាន-អនុប្រធានគណៈអចិន្រ្តៃយ៍ក្រុមការងារគណបក្សចុះមូលដ្ឋានឃុំទាំង១១ រួមជាមួយនឹងសមាជិកសមាជិកាគណៈអចិន្រ្តៃយ៍គណបក្សស្រុក មន្ត្រីគណបក្សស្រុកចុះជួយឃុំ ប្រធាន-អនុប្រធានគណបក្សមូលដ្ឋានការិយាល័យសុខាភិបាលស្រុក ប្រធានសាខាបក្សការិយាល័យជុំវិញស្រុក ក្រុមការងារយុវជនគណបក្សស្រុក ក្រុមការងារចលនាស្ត្រីគណបក្សស្រុក និងគណៈអចិន្ត្រៃយ៍គណបក្សឃុំទាំង១១ សរុបទាំងអស់ចំនួន១២៩ រូប។ កិច្ចប្រជុំនេះបានផ្ដោតជាសំខាន់ទៅលើការប្រកាសសេចក្តីសម្រេចស្តីពីការតែងតាំងបន្ថែមសមាសភាពក្រុមការងារគណបក្សចុះមូលដ្ឋានស្រុកកោះធំ និងការផ្សព្វផ្សាយរបាយការណ៍ស្ដីពីសភាពការណ៍ទូទៅ និងការងារគណបក្សឆ្នាំ២០២០ និងទិសដៅភារកិច្ចឆ្នាំ២០២១។ ថ្លែងនៅក្នុងកិច្ចប្រជុំនាឱកាសនោះ ឯកឧត្តមទេសរដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះសមាជិកសមាជិកាថ្មីនៃគណបក្សប្រជាជនកម្ពុជា និងបានណែនាំឱ្យពួកគាត់ខិតខំប្រឹងប្រែងធ្វើការជួយពង្រឹងគណបក្សថែមទៀតដើម្បីទាក់ទាញការគាំទ្រ និងបេះដូងរបស់ប្រជាពលរដ្ឋឱ្យជឿជាក់លើការដឹកនាំរបស់គណបក្សប្រជាជនកម្ពុជា។ ឯកឧត្តមទេសរដ្ឋមន្ត្រី ក៏បានណែនាំឲ្យសមាជិកសមាជិកា នាំយករបាយការណ៍នេះទៅផ្សព្វផ្សាយបន្តឱ្យបានទូលំទូលាយនៅតាមភូមិ ឃុំនីមួយៗនៅស្រុកកោះធំ និងបន្តសកម្មភាពធ្វើបច្ចុប្បន្នភាពសមាជិកសមាជិកាបក្សជាប្រចាំ ជាពិសេសជួយផ្សព្វផ្សាយអំពីសមិទ្ធផលសម្រេចបាននៃការកសាងជាតិក្រោមការដឹកនាំរបស់គណបក្សប្រជាជនកម្ពុជាផងដែរ។ លើសពីនេះទៀត ឯកឧត្តមទេសរដ្ឋមន្ត្រី បានណែនាំឲ្យក្រុមការងារចុះមូលដ្ឋានស្រុកកោះធំ ប្រមូលទិន្នន័យ និងព័ត៌មានពីតម្រូវការចាំបាច់នៃការប្រើប្រាស់ភ្លើងសូឡា ដើម្បីក្រុមការងារថ្នាក់ជាតិអាចធ្វើផែនការរកថវិកាមកបំពាក់ភ្លើងបំភ្លឺដល់បងប្អូនប្រជាពលរដ្ឋ។ ជាមួយគ្នានោះផងដែរ ឯកឧត្តមទេសរដ្ឋមន្ត្រី បានគូសបញ្ជាក់ផងដែរថា ទោះបីយើងមានលទ្ធភាព និងមធ្យោបាយគ្រប់បែបយ៉ាង យ៉ាងណាក៏ដោយ បើសិនជាយើងគ្មានឆន្ទៈមុះមុត និងការប្ដេជ្ញាចិត្តខ្ពស់ក្នុងការបំពេញកិច្ចការណាមួយនោះទេ នោះយើងពិតជាមិនអាចសម្រេចកិច្ចការនោះបានជោគជ័យឡើយ។ ដោយឡែកទាក់ទងនឹងការអភិវឌ្ឍធនធានមនុស្ស ឯកឧត្តមទេសរដ្ឋមន្ត្រី បានជំរុញឲ្យក្រុមការងារចុះមូលដ្ឋានស្រុកកោះធំរៀបចំកម្មវិធីបណ្ដុះបណ្ដាលមន្ត្រីនៅមូលដ្ឋានឱ្យចេះធ្វើការងារ ដើម្បីបម្រើគណបក្សឱ្យកាន់តែមានប្រសិទ្ធភាពខ្ពស់ថែមទៀត។ គួរកត់សម្គាល់ផងដែរថា ក្រសួងសាធារណការ និងដឹកជញ្ជូនក្រោមការដឹកនាំរបស់ឯកឧត្តមទេសរដ្ឋមន្ត្រី ក្រសួងបានខិតខំប្រឹងប្រែង និងប្ដេជ្ញាចិត្តក្នុងការបណ្ដុះបណ្ដាលលើកគុណភាពសមត្ថភាពមន្ត្រីបច្ចេកទេស ធ្វើយ៉ាងណាឱ្យការងារមានប្រសិទ្ធភាព គុណភាព គុណភាពក្នុងការធ្វើការឱ្យបានល្អ គុណភាពក្នុងការបម្រើប្រជាពលរដ្ឋបានល្អ ប្រកបដោយប្រសិទ្ធភាព តម្លាភាពជូនពួកគាត់។ បន្ទាប់ពីកិច្ចប្រជុំត្រូវបានបិទបញ្ចប់ ឯកឧត្តមទេសរដ្ឋមន្ត្រី បានដឹកនាំក្រុមការងារជិះកង់ពិនិត្យផ្លូវជាតិលេខ២១ ចុះពិនិត្យមន្ទីរពេទ្យបង្អែកស្រុកកោះធំ មណ្ឌលសុខភាពព្រែកស្ដី មណ្ឌលសុខភាពសំពៅពូន ដោយនាំមកជាមួយនូវគណៈប្រតិភូសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយប្រចាំនៅកម្ពុជា មកបំពេញទស្សនកិច្ចស្រុកកោះធំ ដើម្បីស្វែងយល់ពីតម្រូវការចាំបាច់ជាក់ស្តែងរបស់បងប្អូនប្រជាពលរដ្ឋស្រុកកោះធំ។ សូមជម្រាបជូនថា សមាគមនេះមានបេសកកម្មស្វែងរកការគាំទ្រពីឯកឧត្តមទេសរដ្ឋមន្ត្រី ក្នុងការចុះជួយអ្នកស្រុក កោះធំ ដែលមានតម្រូវការចាំបាច់លើផ្នែកសេវាថែមទាំសុខភាពបឋម ការសង្គ្រោះបន្ទាន់ ទឹកស្អាត អនាម័យ និងការអប់រំ ជាពិសេសដើម្បីលើកកម្ពស់ការថែទាំសុខភាពរបស់អ្នកស្រុកកោះធំនៅតាមមណ្ឌលសុខភាពនានារបស់ស្រុកនេះឱ្យកាន់តែប្រសើរឡើងថែមមួយកម្រិតទៀត។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រីបានដឹកនាំក្រុមការងារចុះពិនិត្យការងារសាងសង់ជញ្ជាំងបេតុងការពារច្រាំងព្រែក ត្រង់ចំណុចបង្គោលព្រំដែនលេខ២៤៦/២(១)ដែលអនុវត្តដោយមន្ទីរសាធារណការ និងដឹកជញ្ជូនខេត្តកណ្ដាល ដើម្បីទប់ស្កាត់និងការពារបង្គោលព្រំដែនដែលជាសំណង់ប្រវត្តិសាស្ត្រកុំឲ្យបាក់ចូលក្នុងព្រែក ក៏ដូចជាដើម្បីថែរក្សាការពារនូវការប្រែប្រួលបូរណភាពទឹកដី និងអធិបតេយ្យភាពជាតិ៕