នៅរាត្រីថ្ងៃពុធ ៦កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៧ ខែកុម្ភៈ ឆ្នាំ២០២១ នៅទីស្តីការក្រសួងសាធារណការ និងដឹកជញ្ជូនមានរៀបចំពិធីពិសាអាហារសាមគ្គីដំណាច់ឆ្នាំ ក្រោយការបិទបញ្ចប់សន្និបាតបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ ដែលបាន ប្រព្រឹត្តទៅអស់រយៈពេលពីរថ្ងៃ ចាប់ពីថ្ងៃទី១៦ ដល់១៧ ខែកុម្ភៈ ឆ្នាំ២០២១។ កម្មវិធីអាហារសាមគ្គីនេះ បានរៀបចំឡើងសម្រាប់មន្ត្រីរាជការគ្រប់លំដាប់ថ្នាក់ទាំងអស់របស់ក្រសួង ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដោយមានការអញ្ជើញពីភ្ញៀវកិត្តិយសមកពីបណ្តាក្រសួងផ្សេងៗរបស់រដ្ឋាភិបាល និងភ្ញៀវមកពីវិស័យឯកជនដែលធ្លាប់បានជួយគាំទ្រដល់គំនិតផ្តួចផ្តើមរបស់ក្រសួងនាពេលកន្លងមក។ កម្មវិធីនេះរៀបចំឡើងក្នុងគោលបំណងដើម្បីអបអរសាទរ និងទទួលស្គាល់សមិទ្ធផលសម្រេចបានដ៏ ធំធេងក្នុងឆ្នាំ២០២០កន្លងមក ក៏ដូចជាដើម្បីលើកទឹកចិត្តមន្រ្តីរាជការ លើកកម្ពស់មិត្តភាព សាមគ្គីភាព និងកិច្ចសហការគ្នាល្អក្រោមដំបូលតែមួយនៃមហាគ្រួសារក្រសួងសាធារណការ និងដឹកជញ្ជូន ជាពិសេសដើម្បីបង្កើនកិច្ចខិតខំប្រឹងប្រែងរួមគ្នាបន្ថែមទៀតសំដៅសម្រេចបានជោគជ័យនូវផែនការសកម្មភាពដែល បានដាក់ចេញ និងសកម្មភាពកំណែទម្រង់សំខាន់ៗរបស់ក្រសួងផងដែរ។ សូមជម្រាបជូនថា៖ ការរៀបចំពិធីពិសាអាហារសាមគ្គីដំណាច់ឆ្នាំនេះបានប្រព្រឹត្តទៅក្រោមបរិយាកាសសប្បាយរីករាយ រួមជាមួយនឹងការប្រគុំតន្ត្រី និងការចាប់ឆ្នោតផ្សងសំណាងសម្រាប់មន្ត្រីរាជការទាំងអស់ផងដែរ៕