ឯកឧត្តម កឹម បូរី អនុរដ្ឋលេខាធិការ និងជាអនុប្រធានទទួលបន្ទុកបានអញ្ជើញដឹកនាំកិច្ចប្រជុំពិនិត្យ ពិភាក្សាបន្តលើការរៀបចំសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូ ភ្នំពេញ៖ ថ្ងៃពុធ ១៣រោច ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១០ ខែកុម្ភៈ ឆ្នាំ២០២១ នៅទីស្ដីការក្រសួង ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន និងអនុជាប្រធានក្រុមការងារ តំណាងឯកឧត្តមរដ្ឋលេខាធិការ ប៉ាល់ ចន្ទតារា បានអញ្ជើញដឹកនាំកិច្ចប្រជុំពិភាក្សា បន្តលើសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូ ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រី និងក្រុមការងារជំនាញបច្ចេកទេសពាក់ព័ន្ធ។ កិច្ចប្រជុំនេះធ្វើឡើងដើម្បីពិនិត្យពិភាក្សាលើសេចក្តីព្រាងច្បាប់បន្ត ជាមួយក្រុមការងារគម្រោង សំដៅ ប្រមូលធាតុចូលឱ្យកាន់តែទូលំទូលាយ ដើម្បីឱ្យការរៀបចំសេចក្ដីព្រាងច្បាប់នេះមានខ្លឹមសារកាន់តែ ច្បាស់លាស់ ជាក់លាក់ និងស៊ីជម្រៅក្នុងក្របខណ្ឌនៃការគ្រប់គ្រងទឹកកខ្វក់ និងប្រព័ន្ធលូ នៅក្នុង ព្រះរាជាណាចក្រកម្ពុជា។ ឯកឧត្ដមអនុរដ្ឋលេខាធិការ បានស្នើឱ្យក្រុមការងារជំនាញពិនិត្យបន្ថែមទៀត និងសិក្សាពាក្យពេជន៍ ឃ្លា ប្រយោគឱ្យបានល្អិតល្អន់ និងស៊ីជម្រៅ សំដៅឱ្យមានសង្គតភាពជាមួយនឹងឯកសារគតិយុត្តពាក់ព័ន្ធទាំង ឡាយនៅក្នុងព្រះរាជាណាចក្រកម្ពុជា ក៏ដូចជាយកគំរូច្បាប់ពាក់ព័ន្ធរបស់ប្រទេសនានា ថ្លឹងថ្លែងប្រៀប ធៀបគ្នា ដើម្បីជាមាគ៌ាក្នុងការរៀបចំសេចក្ដីព្រាងច្បាប់នេះឱ្យមានលក្ខណៈគ្រប់ជ្រុងជ្រោយបន្ថែមទៀត។ ជាមួយគ្នានេះផងដែរ ឯកឧត្តមអនុរដ្ឋលេខាធិការ បានជំរុញលើកទឹកចិត្តឱ្យអង្គប្រជុំចូលរួមយ៉ាងសកម្ម ក្នុងការផ្លាស់ប្ដូរយោបល់ ផ្ដល់ធាតុចូលសំខាន់ៗសំដៅធ្វើយ៉ាងណាឱ្យការរៀបចំសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូនេះមានលក្ខណៈគ្រប់ជ្រុងជ្រោយ។ ឯកឧត្ដមអនុរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះក្រុមការងារដែលបានចូលរួម យ៉ាងផុលផុសក្នុងការផ្ដល់ធាតុចូលសំខាន់ៗ សំដៅឱ្យការរៀបចំសេចក្ដីព្រាងច្បាប់នេះអាចសម្រេចបាន តាមការគ្រោងទុក មុនដាក់ឆ្លងទៅអន្តរក្រសួងពិនិត្យកែសម្រួលនាពេលខាងមុខ៕