[Phnom Penh Post] - អាជ្ញាធររាជធានីភ្នំពេញ ចាប់ផ្តើមជួសជុលស្ពានព្រះមុនីវង្សចាស់
2021-01-28
Go to the website published Phnom Penh Post
ភ្នំពេញៈ អាជ្ញាធររាជធានីភ្នំពេញបានជូនដំណឹងពីការជួសជុលស្ពានព្រះមុនីវង្សចាស់ចាប់ពីព្រឹកថ្ងៃទី ២៧ ខែមករា តទៅ ខណៈផ្លូវជាតិលេខ ៥ ត្រង់ម្តុំគីឡូម៉ែត្រលេខ ៦ ក្នុងខណ្ឌឫស្សីកែវ ក៏ត្រូវបិទការចរាចររយៈពេល ៣០ ថ្ងៃ ដើម្បីពង្រីកផ្លូវផងដែរ។
សេចក្តីជូនដំណឹងរបស់រដ្ឋបាលខណ្ឌច្បារអំពៅឱ្យដឹងថា ការដ្ឋានជួសជុលបង្កាន់ដៃស្ពាន ផ្លូវថ្មើរជើង និងអ៊ុតកៅស៊ូលើស្ពានព្រះមុនីវង្សចាស់ គឺនឹងអនុវត្តម្តង ១ ចំហៀងនៃតួស្ពានដែលនឹងត្រូវបើកការដ្ឋានសាងសង់ចាប់ពីថ្ងៃទី ២៧ មករា។
រដ្ឋបាលខណ្ឌច្បារអំពៅបានសុំការយោគយល់អធ្យាស្រ័យពីសំណាក់ប្រជាពលរដ្ឋដែលធ្វើដំណើរឆ្លងកាត់ស្ពាននេះ ព្រោះថាក្នុងអំឡុងពេលជួសជុលនេះអាចនឹងមានការកកស្ទះចរាចរណ៍ដែលនាំឱ្យមានការរំខានដល់ការធ្វើដំណើរ។
រដ្ឋបាលខណ្ឌច្បារអំពៅបន្តថា៖ «ទំហំតួផ្លូវស្ពានព្រះមុនីវង្សចាស់ សរុបប្រវែងទទឹង ១១ ម៉ែត្រ។ ការហ៊ុមព័ទ្ធការដ្ឋានដើម្បីជួសជុលអស់ប្រវែង ៣ ម៉ែត្រនៃទំហំតួផ្លូវប្រវែង ១១ ម៉ែត្រ។ នៅសល់ទំហំទទឹងប្រវែង ៨ ម៉ែត្រ បងប្អូនប្រជាពលរដ្ឋអាចធ្វើចរាចរណ៍បានជាធម្មតា»។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ប្រាប់ ភ្នំពេញ ប៉ុស្តិ៍ យ៉ាងខ្លីថា អាជ្ញាធរនឹងព្យាយាមពន្លឿនការជួសជុលស្ពាននេះឱ្យបានលឿនបំផុតតាមដែលអាចធ្វើទៅបាន។ ប៉ុន្តែលោកសុំមិនធ្វើអត្ថាធិប្បាយចំពោះគម្រោងនៃជួលជុលត្រូវចំណាយទឹកប្រាក់អស់ប៉ុន្មាននោះទេ ព្រោះនេះជាបញ្ហាបច្ចេកទេស។
ដោយឡែករដ្ឋបាលខណ្ឌឫស្សីកែវបានជូនដំណឹងដល់អ្នកធ្វើដំណើរឱ្យបង្វែរការធ្វើដំណើរពីផ្លូវជាតិលេខ ៥ ត្រង់ចំណុចគីឡូម៉ែត្រលេខ ៦ ទៅផ្លូវផ្សេងដើម្បីបញ្ចៀសការកកស្ទះចរាចរណ៍ក្នុងពេលដែលអាជ្ញាធរធ្វើការជួសជុល និងពង្រីកកំណាត់ផ្លូវនេះ។
សេចក្តីជូនដំណឹងបញ្ជាក់ថា៖ «ស្នើឱ្យបងប្អូនប្រជាពលរដ្ឋទាំងអស់ មេត្តាជ្រាប យោគយល់ អធ្យាស្រ័យ និងបញ្ចៀសការធ្វើដំណើរឆ្លងកាត់ទីតាំងនេះ ដោយធ្វើដំណើរវាងទៅផ្លូវ ៥៩៨ ឬផ្លូវឯកឧត្តម ជា សុផារ៉ា ជាបណ្តោះអាសន្នវិញ ដើម្បីកាត់បន្ថយការកកស្ទះ និងគ្រោះថ្នាក់ជាយថាហេតុ ពីព្រោះក្រុមការងារត្រូវប្រើប្រាស់គ្រឿងចក្រ និងរថយន្តធុនធ្ងន់សម្រាប់ស្ថាបនាផ្លូវ»។
លោក គង់ សុវណ្ណ ទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទថ្លែងថា គឺជារឿងដែលចាំបាច់បំផុត ដែលអាជ្ញាធរត្រូវតែធ្វើការជូនដំណឹងដល់ប្រជាពលរដ្ឋ ឬអ្នកធ្វើដំណើរអំពីការបិទ ឬការជួសជុលស្ពាន ឬផ្លូវណាមួយ។
លោកបន្តថា ការធ្វើដូច្នេះគឺដើម្បីឱ្យពលរដ្ឋបានត្រៀមខ្លួនជាមុន និងត្រូវស្វែងរកពេលវេលា និងផ្លូវផ្សេងជំនួសចៀសវាងការកកស្ទះដែលធ្វើឱ្យខាតបង់ពេលវេលា និងថវិកា។
លោកបញ្ជាក់ថា៖ «ការប្រាប់ពីផ្លូវដែលត្រូវវាងដល់អ្នកដំណើរគឺរឹតតែប្រសើរ ដើម្បីឱ្យពលរដ្ឋអាចជិះកាត់ផ្លូវណាខ្លះ។ ព្រោះការកកស្ទះនេះ គឺឡាន និងម៉ូតូ គឺប្រើប្រាស់សាំង ហើយបើកកស្ទះនៅមួយកន្លែង គឺខូចបរិស្ថាន ហើយប្រៀបដូចជាដុតលុយចោល»។ ក្រៅពីនេះលោក គង់ សុវណ្ណ លើកទឹកចិត្តឱ្យអាជ្ញាធរគួរតែធ្វើការសិក្សា ពិនិត្យស្ពាន ឬផ្លូវដែលបានសាងសង់រួចឱ្យបានជាប្រចាំដើម្បីធានារក្សា គុណភាព និងចៀសវាង គ្រោះថ្នាក់ដែលអាចកើតមានឡើងជាយថាហេតុ៕
