(ភ្នំពេញ)៖ រដ្ឋបាលរាជធានីភ្នំពេញ នឹងអនុវត្តគម្រោងជួសជុល​បង្កាន់ដៃស្ពាន ផ្លូវថ្មើរជើង និងអ៊ុតកៅស៊ូតួស្ពានព្រះមុនីវង្សចាស់ ចាប់ពីព្រឹកថ្ងៃទី២៧ ខែមករា ឆ្នាំ២០២១ តទៅ​។ នេះបើតាមលិខិតរបស់​អភិបាលខណ្ឌច្បារអំពៅ​។ ក្នុងលិខិត អភិបាលខណ្ឌច្បារអំពៅ បានប្រកាសជូនដំណឹងដល់ប្រជាពលរដ្ឋ សូមយោគយល់អធ្យាស្រ័យ នៅក្នុងអំឡុងពេល​នៃដំណើរការការដ្ឋានជួសជុលស្ពាន​ព្រះមុនីវង្សចាស់នេះ ដោយ​ក្តីអនុគ្រោះ​។ ឯកសារ បង្ហាញថា ស្ពានព្រះមុនីវង្សចាស់ ឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅច្បារអំពៅ​ និងផ្លូវជាតិលេខ២ នៅក្បាលថ្នល់​។​ ស្ពានព្រះមុនីវង្ស ពីមុនមានឈ្មោះថា Gustave Eiffel ដែល​សម័យមុន មានឈ្មោះថា ស្ពានជ្រោយ​អោក ​កសាងកាលពីឆ្នាំ១៩២៨។​ លុះមកដល់ឆ្នាំ១៩៦៤ ស្ពាននេះ មានសភាពចាស់​ទ្រុឌទ្រោមយ៉ាងខ្លាំង។ ស្ពានព្រះមុនីវង្ស មានប្រវែង ២៦៩,៥ ម៉ែត្រ និងទទឹង ១៤ម៉ែត្រ​ ត្រូវបាន​​សាងសង់ជាថ្មីឡើងវិញ រួចប្រារព្ធធ្វើពិធីសម្ពោធ​នៅថ្ងៃទី១៧ ខែវិច្ឆិកា ឆ្នាំ១៩៦៦​។ ដោយសារតែ​ចរាចរណ៍កកស្ទះខ្លាំង​ នៅចំណុចច្បារអំពៅ និងក្បាលថ្នល់ ទើបរាជរដ្ឋាភិបាល បានសម្រេចសាងសង់​ស្ពានព្រះមុនីវង្សថ្មី ស្របនឹងស្ពានចាស់ កាលពីថ្ងៃទី២៣ ខែធ្នូ ឆ្នាំ២០០៦​។ ស្ពាន​ព្រះមុនីវង្ស​ថ្មី មាន​ប្រវែង ​២៦៨​ម៉ែត្រ និង​ទទឹង ​១៤​ម៉ែត្រ ត្រូវបានសម្តេចតេជោ ​នាយក​រដ្ឋមន្ត្រី ហ៊ុន សែន បើក​​សម្ពោធ​ប្រកាស​ឲ្យ​ប្រើប្រាស់​ជា​ផ្លូវការ កាលពី​ថ្ងៃ​ទី​២៧ ខែឧសភា ឆ្នាំ២០០៩។ នៅថ្ងៃបើកសម្ពោធដាក់​ឲ្យប្រើប្រាស់ស្ពានព្រះមុនីវង្សថ្មី សម្តេច​​នាយក​រដ្ឋមន្រ្តី ហ៊ុន សែន ក៏បានប្រកាសបើកការដ្ឋានសាងសង់​ស្ពាន​អាកាសក្បាលថ្នល់ ដែលជាស្ពានអាកាសដំបូង នៅភ្នំពេញ។ ​​​ស្ពាន​អាកាសក្បាលថ្នល់ ​​​មាន​ប្រវែង ​៣០៨​ម៉ែត្រ ទទឹង ​១៤​ម៉ែត្រ និង​កម្ពស់​ជាង ​៨​ម៉ែត្រ សាងសង់​ភ្ជាប់​ផ្លូវ​ជាតិ​លេខ​២​ ទៅមហាវិថី​ព្រះនរោត្តម។ ស្ពាន​​អាកាសក្បាលថ្នល់ ​ចំណាយ​​ថវិកា​​ជាង ​១៦​លាន​ដុល្លារ​សហរដ្ឋ​អាមេរិក៕ ​