កែប៖ ការសាងសង់កំពង់ផែទេសចរណ៍កែប កោះទន្សាយ និងអគារលក់សំបុត្រព្រមទាំងកន្លែងរង់ចាំ ដំណើរការសាងសង់បានជាង ៤០%ហើយ នៅលើទីតាំងផែចាស់ ស្ថិតក្នុងភូមិកែប សង្កាត់កែប ក្រុងកែប ខេត្តកែប ដែលមានរូបរាងជា ក្តាម មានចម្ងាយពីដីគោក ចូលទៅក្នុងសមុទ្រប្រមាណ ៣០៦ម៉ែត្រ ទទឹង ៦៨ម៉ែត្រ មានផ្ទៃក្រឡាសរុបប្រមាណ ៤៦៦១,៥០ម៉ែត្រការ៉េ ប្រើប្រាស់ថវិការសាងសង់សរុបជិត ៥ពាន់លានរៀល។ លោក តាត់ ស៊ុនហួត អគ្គនាយករង នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានឲ្យ CNC ដឹងថា កំពង់ផែទេសចរណ៍កោះទន្សាយ បានបើកដំណើរការសាងសង់ តាំងពីចុងខែធ្នូ ឆ្នាំ២០១៨មកម្លេះ ហើយគ្រោងបញ្ជប់នៅខែ វិច្ឆិកា ឆ្នាំ២០១៩ តែដោយសារបញ្ហាយឺតយ៉ាវលើបច្ចេកទេសបុកគ្រឹះ និងបញ្ហាជំងឹកូវីដ១៩ ទើបពន្យាពេលមកដល់ពេលនេះ។ លោកបញ្ជាក់ថា ការសាងសង់កំពង់ផែនេះ សម្រាប់តែបម្រើឲ្យវិស័យទេសចរណ៍តែមួយមុខប៉ុណ្ណោះ ដោយឡែកការដឹងជញ្ជូនទំនិញផ្សេងៗមិនអាចប្រើប្រាស់កំពង់ផែនេះបានឡើយ ព្រោះផែនេះមានទម្ងន់ផ្ទុកមិនអាចលើសពី ១៥តោននោះទេ ដោយមិនមែនជាប្រភេទផែធន់ធ្ងន់សម្រាប់បម្រើឲ្យការដឹកជញ្ជូននោះឡើយ។ លោកបញ្ជាក់ថា កំពង់ផែនេះ មានលទ្ធភាពអាចទទួលចតនាវាដែលអាចដឹកមនុស្សបានក្រោម ៣០០នាក់។ គួរបញ្ជាក់ថា បច្ចប្បន្នកំពង់ផែមួយនេះ ត្រូវបានរដ្ឋបាលខេត្តកែប ដាក់ជួលឲ្យទៅវិស័យឯកជនជាអ្នកគ្រប់គ្រង ដោយកាលពីថ្ងៃទី២៣ ខែវិច្ចិការ ឆ្នាំ២០២០ រដ្ឋបាលខេត្តកែប តាមរយៈមន្ទីរសេដ្ឋកិច្ច និងហិរញ្ញវត្ថុ បានបើកការដេញថ្លៃកំពង់ផែនេះ និងទីតាំងសំខាន់ៗរបស់ខេត្តចំនួន៣ទៀត ឲ្យទៅវិស័យឯកជន ដោយក្នុងនោះ លោកស្រី ខេង ស្រី ជាអ្នកដេញថ្លៃបានលើការគ្រប់គ្រងចំណតជលយានយន្ត ផែកែប កោះទន្សាយ ក្នុងតម្លៃ ១០ លាន៣០ម៉ឺនរៀល រយៈពេលពេញមួយឆ្នាំ៕