[Phnom Penh Post] - ផ្លូវអាកាសតម្លៃ $៤០០ លាន គ្រោងសាងសង់នៅឆ្នាំក្រោយ
2020-12-31
Go to the website published Phnom Penh Post
ភ្នំពេញៈ មន្ត្រីរដ្ឋាភិបាលបានអះអាងថា មិនទាន់ទទួលបានផែនការនៃគម្រោងសាងសង់ស្ពានអាកាសមួយចេញពីភ្នំពេញតភ្ជាប់ទៅកាន់ព្រលានយន្តហោះអន្តរជាតិថ្មីក្រោមតម្លៃវិនិយោគប្រហែល ៤០០ លានដុល្លារនៅឡើយទេ បើទោះបីម្ចាស់គម្រោងបានបញ្ចេញអំពីផែនការនេះនឹងចាប់ផ្តើមសាងសង់នៅក្នុងឆ្នាំ ២០២១។
OCIC ដែលជាម្ចាស់គម្រោងសាងសង់ព្រលានយន្តហោះអន្តជាតិភ្នំពេញថ្មី បានប្រកាសថា ក្នុងឆ្នាំ ២០២១ ខាងមុខខ្លួននឹងចាប់ផ្តើមសាងសង់ស្ពានអាកាសមួយចេញពីភ្នំពេញតភ្ជាប់ទៅកាន់ព្រលានយន្តហោះអន្តរជាតិថ្មី ក្រោមតម្លៃវិនិយោគប្រហែល ៤០០ លានដុល្លារ។
អគ្គនាយកក្រុមហ៊ុន OCIC លោក ពុង ឃាវសែ កាលពីពេលថ្មីៗនេះបានប្រាប់ទស្សនាវដ្តី Construction & Property ថា ក្រុមហ៊ុន OCIC មានផែនការនឹងសាងសង់ស្ពានអាកាសមួយខ្សែប្រវែង ២១,៥ គីឡូម៉ែត្រចេញពីភ្នំពេញឆ្ពោះទៅព្រលានយន្តហោះអន្តរជាតិភ្នំពេញថ្មីក្នុងឆ្នាំ ២០២១ ដោយគ្រោងនឹងចំណាយប្រាក់ប្រហែល ៤០០ លានដុល្លារ។
លោកថ្លែងថា៖ «យើងនឹងធ្វើជាស្ពានអាកាស គឺមិនមែនធ្វើដូចផ្លូវហាវវេទៅកំពង់សោម (ខេត្តព្រះសីហនុ) ទេ»។
លោកប្រាប់ទៀតថា ការសាងសង់ផ្លូវអាកាសនេះនឹងធ្វើឡើងជា ២ ដំណាក់កាលដោយដំណាក់កាលទី១ មានប្រវែងជាង ១០ គីឡូម៉ែត្រចេញពីផ្លូវលេខ ២៧១ (ក្បែរក្បាលថ្នល់) ឆ្ពោះទៅផ្លូវជាតិលេខ ២ និងដំណាក់កាលទី២ មានប្រវែងជាង ១១ គីឡូម៉ែត្រ ចេញពីផ្លូវជាតិលេខ ២ ឆ្ពោះទៅដល់ព្រលានយន្តហោះអន្តរជាតិភ្នំពេញថ្មី ដែលស្ថិតក្នុងស្រុកស្អាង ខេត្តកណ្តាល។
លោកបានបន្ថែមថា៖ «ការសាងសង់ដំណាក់កាលទី១ នឹងចាប់ផ្តើមក្នុងឆ្នាំ ២០២១ ហើយគ្រោងនឹងបញ្ចប់ក្រោយព្រលានយន្តហោះថ្មី (២០២៣) ដោយវាអាចអាស្រ័យទៅលើទុនវិនិយោគ»។
លោក ពុង ឃាវសែ ប្រាប់ទៀតថា ការសម្រេចសាងសង់ផ្លូវអាកាសនេះ ដោយសារនៅពេលព្រលានយន្តហោះអន្តរជាតិភ្នំពេញថ្មីបើកដំណើរការផ្លូវដែលមានបច្ចុប្បន្ននឹងមិនអាចរំដោះចរាចរណ៍បានល្អទេ។ លោកអះអាងថា៖ «នៅពេលស្ពានអាកាសនេះសាងសង់រួចការធ្វើដំណើរចេញពីផ្លូវ ២៧១ ទៅទីនោះ (ព្រលានយន្តហោះថ្មី) ចំណាយពេលប្រហែល ១៥ នាទីប៉ុណ្ណោះ»។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការអាកាសចរស៊ីវិលបានប្រាប់ភ្នំពេញប៉ុស្តិ៍កាលពីថ្ងៃពុធថា លោកមិនមានឯកសារផ្លូវការពីក្រុមហ៊ុនទាក់ទងនឹងគម្រោងសាងសង់ស្ពានអាកាសពីភ្នំពេញទៅកាន់ព្រលានយន្តហោះអន្តរជាតិភ្នំពេញថ្មីទេ ព្រោះរដ្ឋលេខាធិការដ្ឋានអាកាសចរស៊ីវិលទទួលខុសត្រូវតែលើដំណើរការសាងសង់ព្រលានតែប៉ុណ្ណោះ។
ប៉ុន្តែកន្លងមកលោកដឹងថា ក្រុមហ៊ុន OCIC មានផែនការសង់ផ្លូវ Expressways ពីភ្នំពេញទៅអាកាសយានដ្ឋានថ្មីមែន គ្រាន់តែលោកមិនដឹងលម្អិតថា គេនឹងចាប់ផ្តើមសាងសង់ពេលណា ចប់ពេលណា ចំណាយប្រាក់ប៉ុន្មាន និងមានប្រវែងប៉ុន្មាន។
លោកបន្ថែមថា៖ «ខ្ញុំធ្លាប់ឮព័ត៌មាននេះនៅពេលកិច្ចប្រជុំពិគ្រោះយោបល់ជាមួយក្រុមហ៊ុនទាក់ទងដំណើរការសាងសង់ Airport ដោយខាងក្រុមហ៊ុនថា នឹងមានកសាងផ្លូវ Expressways ពីភ្នំពេញទៅអាកាសយានដ្ឋានថ្មី ហើយនឹងកសាងផ្លូវបន្ទាប់បន្សំមួយចំនួនទៀតដើម្បីតភ្ជាប់ទៅផ្លូវក្រវាត់ក្រុងផងដែរ»។
លោកបន្ថែមថា ជាលក្ខណៈសត្យានុម័នការកសាងព្រលានយន្តហោះអន្តរជាតិគឺត្រូវការជាចាំបាច់ផ្លូវតភ្ជាប់សម្រាប់ការដឹកជញ្ជូនភ្ញៀវ និងទំនិញ។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូនបានស្វាគមន៍ចំពោះគម្រោងនេះ ប៉ុន្តែទោះយ៉ាងណានៅពេលនេះលោកមិនមានព័ត៌មានលម្អិតពីគម្រោងនេះឡើយ។ លោកនិយាយថា៖ «ខ្ញុំបានឃើញព័ត៌មាននៅតាមបណ្តាញផ្សព្វផ្សាយមួយចំនួន ប៉ុន្តែចំពោះព័ត៌មានពីក្រុមហ៊ុនសាងសង់គឺមិនមានទេ»។
ព្រលានយន្តហោះអន្តរជាតិភ្នំពេញថ្មី គឺជាគម្រោងវិនិយោគខ្នាតយក្សរបស់ក្រុមហ៊ុន OCIC នៅលើផ្ទៃដី ២ ៦០០ ហិកតា ក្នុងខេត្តកណ្តាល និងតាកែវ។ គម្រោងនេះគ្រោងបញ្ចប់ការសាងសង់ដំណាក់កាលទី១ ក្នុងឆ្នាំ ២០២៣ ក្នុងតម្លៃជាង ១,៥ ពាន់លានដុល្លារ៕
