កិច្ចប្រជុំពិនិត្យលើវឌ្ឍនភាពនៃការអនុវត្តគម្រោងលើកកម្ពស់ការផ្គត់ផ្គង់ទឹកស្អាតនិងអនាម័យ ក្រោមហិរញប្បទានឥណទានសម្បទានរបស់ធនាគារពិភពលោក ដោយពិភាក្សាទាក់ទងស្តង់ដារបច្ចេកទេស គុណភាពបញ្ចេញទឹកកខ្វក់ពីស្ថានីយប្រព្រឹត្តកម្ម យន្តការត្រួតពិនិត្យប្រព័ន្ធបណ្តាញលូបង្ហូរ និងការគ្រប់គ្រងកាកសំណល់រឹងឱ្យមានប្រសិទ្ធភាព។ ភ្នំពេញ៖ ថ្ងៃសុក្រ ១២កើត ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៧ ខែវិច្ឆិកា ឆ្នាំ ២០២០ ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន និងជាប្រធាន គ្រប់គ្រងគម្រោង បានអញ្ជើញដឹកនាំកិច្ចប្រជុំពិនិត្យមើលវឌ្ឍនភាពនៃការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក ដោយមានការ ចូលរួមពីថ្នាក់ដឹកនាំក្រសួង និងមន្ត្រីជំនាញបច្ចេកទេសពាក់ព័ន្ធ។ កិច្ចប្រជុំនេះធ្វើឡើងដើម្បីពិភាក្សាលើវឌ្ឍនភាពការងាររបស់គណៈកម្មការទទួលបន្ទុក និងជជែកពិភាក្សា លើរបៀបវារៈមួយចំនួនដែលជាគំនិតផ្តួចផ្តើមរួមគ្នារបស់ក្រសួងសាធារណការ និងដឹកជញ្ជូន ជាមួយ ដៃគូពាក់ព័ន្ធ ទាក់ទងនឹងស្តង់ដារបច្ចេកទេស គុណភាពបញ្ចេញទឹកកខ្វក់ពីស្ថានីយប្រព្រឹត្តកម្ម យន្តការត្រួតពិនិត្យប្រព័ន្ធបណ្តាញលូបង្ហូរ និងការគ្រប់គ្រងកាកសំណល់រឹងឱ្យមានប្រសិទ្ធភាព ស្របពេលដែល រាជរដ្ឋាភិបាល ប្រកាសត្រៀមបើកការដ្ឋានសាងសង់ផ្លូវចំនួន៣៨ខ្សែនៅក្រុងសៀមរាប។ ឯកឧត្ដមអនុរដ្ឋលេខាធិការបានមានប្រសាសន៍ថា៖ ដើម្បីធានាបាននូវសុខភាពសាធារណៈ និងអនាម័យ នៅក្នុងទីក្រុង និងដើម្បីបំពេញបន្ថែមលើការវិនិយោគដោយធនាគារអភិវឌ្ឍន៍អាស៊ី រាជរដ្ឋាភិបាលកម្ពុជា បានស្នើសុំការគាំទ្រពីធនាគារពិភពលោកសម្រាប់ការអភិវឌ្ឍ និងសាងសង់បណ្តាញលូខ្នែង និងខ្នែងរង នៅទូទាំងទីក្រុង ដើម្បីចូលរួមចំណែកធានាឱ្យបាននូវបរិស្ថានស្អាត សុខភាពអនាម័យ សាធារណៈល្អប្រសើរ និងលើកកម្ពស់ជីវភាពរស់នៅរបស់ប្រជាពលរដ្ឋប្រកបដោយសុខមាលភាព។ លើសពីនេះទៀត ឯកឧត្ដមអនុរដ្ឋលេខាធិការបានណែនាំឱ្យក្រុមការងារស្វែងយល់លើទីតាំងផ្ទាល់សំដៅ កាត់បន្ថយផលប៉ះពាល់ក្នុងការសាងសង់បណ្តាញលូ ស្ថានីយបូម និងស្ថានីយប្រព្រឹត្តកម្ម សហការ ជាមួយអាជ្ញាធរដែនដី បងប្អូនប្រជាពលរដ្ឋ សិក្សាដោះស្រាយប្រកបដោយការទទួលខុសត្រូវ និងមាន ភាពជាម្ចាស់ ដោយគោរពតាមច្បាប់ និងលិខិតបទដ្ឋានគតិយុត្តិជាធរមាន។ ជាទីបញ្ចប់ ឯកឧត្ដមអនុរដ្ឋលេខាធិការ បានសម្តែងនូវការកោតសរសើរ និងថ្លែងអំណរគុណយ៉ាងជ្រាល ជ្រៅចំពោះធនាគារពិភពលោកដែលជាដៃគូសហការយូរអង្វែងរបស់ក្រសួងសាធារណការ និងដឹកជញ្ជូន លើការផ្តល់ហិរញ្ញប្បទានសម្រាប់ការអភិវឌ្ឍវិស័យផ្គត់ផ្គង់ទឹកស្អាតជូនបងប្អូនប្រជាពលរដ្ឋ៕