[Kampuchea Thmey] - គ្រោងចំណាយថវិកាប្រមាណ ១៨០លានដុល្លារ លើការសាងសង់ផ្លូវលេខ ៣៣,៤១,៣១
2020-10-16
Go to the website published Kampuchea Thmey
រដ្ឋមន្ត្រីក្រសួងសាធារណការ និងដឹកជញ្ជូន រំពឹងថា ការបើកការដ្ឋានសាងសង់ផ្លូវលេខ ៣៣,៤១,៣១ អាចនឹងធ្វើឡើងនៅឆ្នាំ២០២១ខាងមុខ ខណៈការចរចាជាមួយភាគីចិន ត្រូវបានបញ្ចប់រួចរាល់ហើយ ហើយរង់ចាំតែការចុះកិច្ចព្រមព្រៀងប៉ុណ្ណោះ។
ការថ្លែងរបស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានធ្វើឡើងក្នុងឱកាសដែលលោកបានដឹកនាំមន្រ្តីចុះពិនិត្យផ្លូវលេខ៤១ ដែលរងការខូចខាតដោយទឹកជំនន់ នាព្រឹកថ្ងៃទី១៦ ខែតុលា ឆ្នាំ២០២០។
លោកទេសរដ្ឋមន្ត្រី ស៊ុន ចាន់ថុល បានមានប្រសាសន៍ថា ភាគីចិន បានឯកភាពអស់ហើយ លើការផ្ដល់ប្រាក់កម្ចីប្រមាណ១៨០លានដុល្លារ សាងសង់ផ្លូវទាំងបីខ្សែ តែរង់ចាំនូវនីតិវិធីមួយចំនួនប៉ុណ្ណោះ។ រដ្ឋមន្ត្រីក្រសួងសាធារណការ និងដឹកជញ្ជូន សង្ឃឹមថា នៅឆ្នាំ២០២១ខាងមុខ នឹងមានការបើកការដ្ឋានសាងសង់ផ្លូវទាំងបីកន្លែងខាងលើ។
កាលពីថ្ងៃទី ០៧ ខែតុលា ឆ្នាំ២០២០ ក្នុងឱកាសអញ្ជើញបើកសម្ពោធមជ្ឈមណ្ឌលកម្សាន្តព្រីនស៍ ម៉ាណ័រ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា សម្ដេចសម្រចបាននូវគម្រោង ៣ ដោយសុំខ្ចីលុយពីចិន សាងសង់ផ្លូវជាតិលេខ ៤១ តភ្ជាប់ផ្លូវជាតិលេខ ៤ ទៅកំពត ទី២ ផ្លូវជាតិលេខ ៣១ នៅកំពត និងទី៣ ផ្លូវជាតិលេខ៣៣ នៅខេត្តកំពត។
សម្ដេច បានមានប្រសាសន៍បញ្ជាក់ថា គម្រោងទាំងបីនេះ បានឯកភាពគ្នាហើយ និងបានប្រថាប់ត្រារួចហើយ ៕
