រដ្ឋមន្រ្តី​ក្រសួង​សាធារណការ​និង​ដឹក​ជញ្ជូន​ ឯកឧត្តម​ស៊ុន ចាន់​ថុល បាន​លើក​ពី​ករណី​ប្តូរ​ប័ណ្ណ​កម្មសិទ្ធិ​យានយន្ត​គឺ​លែង​មាន​ភាព​ស្មុគស្មាញ និង​ចំណាយ​ពេល​តិច​ជាង​មុន។ ដោយសារ​មាន​ការ​សហការ​ជាមួយ​អង្គភាព​ពន្ធដារ នីតិវិធី​​ថ្មី​ប្រើ​ពេល​តែ ៣០ នាទី បង​ប្អូន​អាច​ប្តូរ​ប័ណ្ណ​កម្មសិទ្ធិ​យានយន្ត​យក​ទៅ​ប្រើប្រាស់​បាន។ លោក​រដ្ឋមន្រ្តី​បាន​បញ្ជាក់​ថា ក្រសួង​បាន​ខិតខំ​សម្រួលនីតិវិធីក្នុងការផ្ទេរកម្មសិទ្ធិយានយន្ត ក្នុងពេលតែមួយនៅទីតាំងផ្តល់សេវាតែមួយ ដើម្បីកាត់បន្ថយភាព​ស្មុគស្មាញ និងកាត់បន្ថយពេលវេលា និង​ការ​ចំណាយ​សេវា​ក្រៅ​ផ្លូវការ។ នីតិវិធីថ្មីនេះដូចជាការបង់ប្រាក់សេវា និងពន្ធប្រថាប់ត្រារួមគ្នាក្នុងវិក្កយបត្រតែមួយ។ លោក​ថា ឲ្យ​តែ​មាន​ឯកសារ​គ្រប់គ្រាន់ ការផ្ទេរកម្មសិទ្ធិយានយន្ត​ ប្រើ​ពេល​ត្រឹម ៣០ នាទី ប៉ុណ្ណោះ បង​ប្អូន​អាច​ទទួល​ប័ណ្ណ​កម្មសិទ្ធិ​ថ្មី​យក​ទៅ​ប្រើប្រាស់​បាន។ ឯកសារចាំបាច់​ដើម្បី​សុំផ្ទេរ​កម្មសិទ្ធិ​យានយន្ត​មាន៖ – ពាក្យសុំផ្ទេរកម្មសិទ្ធិ – លិខិតទិញលក់ – ប័ណ្ណសម្គាល់យានយន្តច្បាប់ដើម – អត្តសញ្ញាណប័ណ្ណរបស់ភាគីទាំងអ្នកលក់ និងអ្នកទិញ – វិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត