ការងារអនុវត្តអនុគម្រោងសាងសង់ទីលានចាក់សំរាមក្នុងខេត្តព្រះសីហនុ គិតរហូតមកទល់ពេលនេះ សម្រេចបាន៦.៣៨%ហើយ ធៀបនឹងគោលដៅ៦.១៩% ថ្ងៃសុក្រ ១៥កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០២ ខែតុលា ឆ្នាំ២០២០ នៅទីស្ដី ការក្រសួង ឯកឧត្ដម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំ កិច្ចប្រជុំពិភាក្សាស្តីអំពីវឌ្ឍនភាពការងារអនុគម្រោងសាងសង់ទីលានចាក់សំរាមក្នុងខេត្តព្រះសីហនុ ក្នុង ក្របខណ្ឌថវិកាជាតិ រួមជាមួយធនាគារអភិវឌ្ឍអាស៊ី (ADB) និងដៃគូរអភិវឌ្ឍន៍ ដោយមានការចូលរួមពី សមាជិកសមាជិកានៃគណៈកម្មការគ្រប់គ្រងការងារអនុគម្រោងសាងសង់ទីលានចាក់សំរាមរបស់ក្រសួង សាធារណការ និងដឹកជញ្ជូន។ កិច្ចប្រជុំនេះធ្វើឡើងក្នុងគោលបំណងពិនិត្យមើលវឌ្ឍនភាពគម្រោងសាងសង់ទីលានចាក់សំរាមក្នុងខេត្ត ព្រះសីហនុ ដែលបានចុះកិច្ចសន្យាជាមួយក្រុមហ៊ុនសាងសង់Heng Sambat Co., Ltd Import Export Transportation and Construction គ្រោងចំណាយទឹកប្រាក់ប្រមាណ ៥.៣១៣.៤៦៣ ដុល្លារអាមេរិក និងចំណាយពេលសាងសង់១៧ខែ បច្ចុប្បន្នការងារសម្រេចបាន៦.៣៨%ហើយ ធៀបនឹងគោលដៅ ៦.១៩%។ អង្គប្រជុំទាំងមូលបានពិភាក្សាយ៉ាងយកចិត្តទុកលើកិច្ចសហការរកវិធានការដោះស្រាយបញ្ហារបស់បង ប្អូនប្រជាពលរដ្ឋដែលរងផលប៉ះពាល់ពីការអនុវត្តគម្រោងនេះ ដោយផ្អែកលើគោលការណ៍ឈ្នះ-ឈ្នះ និង ដំណោះស្រាយដែលអាចទទួលយកបានសមស្រប។ ថ្លែងក្នុងកិច្ចប្រជុំនាឱកាសនោះ ឯកឧត្ដមអនុរដ្ឋលេខាធិការបានឱ្យដឹងថា៖ រាជរដ្ឋាភិបាលបានសម្រេច បញ្ចេញកញ្ចប់ថវិការបស់ខ្លួនក្នុងការលើកកម្ពស់សមត្ថភាពគ្រប់គ្រងសំរាម ដើម្បីធ្វើឱ្យប្រសើរឡើងនូវ អនាម័យ សុខមាលភាពសាធារណៈ និងបរិស្ថានកាន់តែមានភាពប្រសើរឡើង ឆ្លើយតបទៅនឹងការរីក ចម្រើនយ៉ាងឆាប់រហ័សនៅក្នុងខេត្តនេះ។ ជាមួយគ្នានោះផងដែរ ឯកឧត្ដមអនុរដ្ឋលេខាធិការបានគូសបញ្ជាក់អំពីសារសំខាន់នៃការតាមដាន និង វាយតម្លៃផែនការសកម្មភាពឱ្យបានគ្រប់ជ្រុងជ្រោយដើម្បីសម្រេចគោលដៅតាមការគ្រោងទុក និងបាន ជំរុញលើកទឹកចិត្តឱ្យសមាជិកសមាជិកានៃគណៈកម្មការគ្រប់គ្រងការងារអនុគម្រោងសាងសង់បង្កើនកិច្ចខិតខំប្រឹងប្រែងក្នុងការបំពេញការងាររបស់ខ្លួនដើម្បីធានាឱ្យគម្រោងដំណើរការទៅប្រកបដោយភាពរលូន។ ឆ្លៀតក្នុងឱកាសនោះផងដែរ ឯកឧត្ដមអនុរដ្ឋលេខាធិការ បានជំរុញលើកទឹកចិត្តឱ្យសមាជិកសមាជិកានៃ គណៈកម្មការគ្រប់គ្រងការងារអនុគម្រោងសាងសង់ បន្តយកចិត្តទុកដាក់ខ្ពស់ប្រកបដោយការទទួលខុស ត្រូវក្នុងការប្រមូលធាតុចូលសំខាន់ៗបន្ថែមទៀតដើម្បីលើកទៅជជែកពិភាក្សារកវិធានការ និងដំណោះ ស្រាយជាមួយដៃគូអនុវត្តគម្រោង។ ឯកឧត្ដមអនុរដ្ឋលេខាធិការបានថ្លែងអំណរគុណ និងកោតសរសើរយ៉ាងជ្រាលជ្រៅដល់សមាជិកសមា ជិកាគណៈកម្មការ ដែលបានខិតខំប្រឹងប្រែងបំពេញភារកិច្ចរបស់ខ្លួនប្រកបដោយស្មារតីទទួលខុសត្រូវ ខ្ពស់ និងស្នើឱ្យធ្វើរបាយការណ៍វឌ្ឍនភាពគម្រោងប្រចាំខែឱ្យបានទៀងទាត់ផងដែរ។ គួរកត់សម្គាល់ថា៖ គម្រោងទីលានចាក់សំរាមថ្មីនេះ សាងសង់ឡើងដើម្បីបំពេញតម្រូវការរយៈពេល៥ឆ្នាំ ដំបូង មានសមត្ថភាពអាចផ្ទុកសំរាមបានចំនួន ៨៨៤.០៨៨ ម៉ែត្រគីប មានរណ្ដៅចំនួនបួន រណ្ដៅ នីមួយៗមានទទឹងគិតជាមធ្យម១៣០ ម៉ែត្រ និងបណ្ដោយ១៥០ម៉ែត្រ ជម្រៅចាប់ពី២-៤ម៉ែត្រ មានប្រព័ន្ធ រំដោះទឹកភ្លៀងចាប់ពីបាតរណ្ដៅ ប្រព័ន្ធប្រមូលទឹកកខ្វក់ពីរណ្ដៅចាក់សំរាម និងបំពង់បញ្ចេញឧស្ម័នពុល ផងដែរ៕