កិច្ចប្រជុំពិនិត្យតាមដានវឌ្ឍនភាពប្រចាំខែកញ្ញា ឆ្នាំ២០២០ ទាក់ទងនឹងគម្រោងលើកកម្ពស់ទឹកស្អាត និងសុខមាលភាព អនាម័យសាធារណៈ ក្រោមហិរញ្ញប្បទានឥណទានរបស់ធនាគារពិភពលោក ថ្ងៃសុក្រ ១៥កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០២ ខែតុលា ឆ្នាំ២០២០ ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រង និង សម្របសម្រួលគម្រោង បានអញ្ជើញដឹកនាំកិច្ចប្រជុំពិភាក្សាអំពីវឌ្ឍនភាពគម្រោងលើកកម្ពស់ ការផ្គត់ផ្គង់ទឹកស្អាត និងសុខមាលភាព អនាម័យសាធារណៈ ក្រោមហិរញប្បទានឥណទានសម្បទានរបស់ធនាគារពិភពលោក ដោយមានការចូលរួមពីអង្គភាពពាក់ព័ន្ធក្រោមឱវាទក្រសួង។ កិច្ចប្រជុំនេះធ្វើឡើងសំដៅពង្រឹង និងពិនិត្យលើវឌ្ឍនភាពគម្រោងរួមមានការរៀបចំឯកសារដេញថ្លៃ ការសាងសង់ ការងារទិញទំនិញ និងការជ្រើសរើសទីប្រឹក្សាបច្ចេកទេស។ ថ្លែងនៅក្នុងកិច្ចប្រជុំនាឱកាសនោះឯកឧត្តមអនុរដ្ឋលេខាធិការ បានជំរុញឱ្យក្រុមការងារបង្កើនប្រសិទ្ធភាពការងារដោយពន្លឿនការងាររៀបចំឯកសារដេញថ្លៃសាងសង់បណ្តាញលូខ្នែង និងខ្នែងរង និងការងារជួសជុលស្ថានីយបូម ឱ្យបានទាន់ពេលវេលា ដើម្បីធានាដល់ប្រយោជន៍សុខមាលភាពសាធារណៈ និងអនាម័យនៅក្នុងទីក្រុង ផ្តល់នូវបរិស្ថានស្អាត ទឹកស្អាត និង សុខភាព អនាម័យ និងលើកកម្ពស់ជីវភាពរស់របស់ប្រជាពលរដ្ឋឱ្យកាន់តែប្រសើរឡើង។ ជាទីបញ្ចប់ ឯកឧត្ដមអនុរដ្ឋលេខាធិការ បានសម្តែងនូវការកោតសរសើរនិងថ្លែងអំណរគុណយ៉ាងជ្រាលជ្រៅចំពោះធនាគារពិភពលោក ដែលជាដៃគូសហការយូរអង្វែងរបស់ក្រសួងសាធារណការ និងដឹកជញ្ជូន លើការផ្តល់ហិរញ្ញប្បទានសម្រាប់ការអភិវឌ្ឍវិស័យផ្គត់ផ្គង់ទឹកស្អាត និងក្រុមការងារដែលបានខិតខំប្រឹងប្រែងបំពេញការងារអស់ពីកម្លាំងកាយចិត្ត ដើម្បីបម្រើឧត្ដមប្រយោជន៍ជាតិ៕