[BTV] - ឯកឧត្ដម ស៊ុន ចាន់ថុល ជួបសំណេះសំណាលជាមួយនាយ និងពលទាហាន នៅបញ្ជាការដ្ឋានអង្គរក្សទួលក្រសាំង
2020-09-07
Go to the website published BTV
ភ្នំពេញ៖ ថ្ងៃទី០៧ ខែកញ្ញានេះ ឯកឧត្ដម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការនិងដឹកជញ្ជូន បានមានប្រសាសន៍ថា បើគ្មានសម្ដេចតេជោ ហ៊ុន សែន គ្មាននយោបាយឈ្នះ ឈ្នះ គ្មានសុខសន្តិភាព គ្មានឱកាសកសាងប្រទេសជាតិមាតុភូមិយើងលើគ្រប់វិស័យទាំងអស់។ នេះជាប្រសាសន៍របស់ឯកឧត្ដមថ្លែងក្នុងពិធីសំណេះសំណាលជាមួយនាយនិងពលទាហាននៅបញ្ជាការដ្ឋានអង្គរក្សទួលក្រសាំង ក្នុងឱកាសរដូវបុណ្យភ្ជុំបិណ្ឌប្រពៃណីជាតិខ្មែរ។
ឯកឧត្ដម ទេសរដ្ឋមន្ត្រី ស៊ុន ចាន់ថុល បានបន្តថា ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានការរីកចម្រើនច្រើន អត្រាភាពក្រីក្របានថយចុះ បើយើងគិតកាលពីនៅឆ្នាំ១៩៧៩ គឺប្រជាជនក្រីក្រ១០០% បើគិតបច្ចុប្បន្ននេះ អត្រាភាពក្រីក្រនៅកម្ពុជាស្ថិតនៅក្រោម១១%ទៅ១២%តែប៉ុណ្ណោះ។
សេដ្ឋកិច្ចជាតិយើងមានការរីកចម្រើនក្នុងរង្វង់៧%ក្នុងរយៈពេល២០ឆ្នាំកន្លងមកនេះ។ ប្រព័ន្ធហេដ្ឋារចនាសម្ព័ន្ធក៏មានការរីកចំរើនច្រើន។ រាជរដ្ឋាភិបាលមានផែនការយុទ្ធសាស្ត្រច្បាស់លាស់ពង្រឹងគុណភាពផ្លូវ ដើម្បីជួយសម្រួលការដឹកជញ្ជូនប្រជាពលរដ្ឋ អ្នកទេសចរ និងការកកស្ទះចរាចរណ៍ដោយពង្រីកផ្លូវពី២គន្លងទៅ៤គន្លង ប្តូរគុណភាពផ្លូវពីកៅស៊ូស្ដើងទៅបេតុងកៅស៊ូ។ ក្រសួងសាធារណៈការ និងដឹកជញ្ជូនបានស្ថាបនាផ្លូវខ្វាត់ខ្វែងតភ្ជាប់តាមបណ្ដាខេត្តក្រុងជាសរសៃឈាមសេដ្ឋកិច្ចដោយខ្លួនឯង លែងពឹងផ្អែកការដកដង្ហើមដឹកជញ្ជូនសេដ្ឋកិច្ចពីប្រទេសគេទៀតហើយ ។
ឯកឧត្ដម ទេសរដ្ឋមន្ត្រី ស៊ុន ចាន់ថុល បានវាយតម្លៃនិងដឹងគុណកោតសរសើរចំពោះមេបញ្ជាការនាយ និងពលទាហាន នៃបញ្ជាការដ្ឋានអង្គរក្សសម្ដេចតេជោ ហ៊ុន សែន ទាំងអស់ដែលបានយកចិត្តទុកដាក់ទទួលខុសត្រូវខ្ពស់ក្នុងការការពារសន្តិសុខសណ្ដាប់ធ្នាប់សុខ សុវត្ថិភាព ជូនសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតព្រមទាំងគ្រួសារធ្វើឱ្យសម្ដេចមានលទ្ធភាពដឹកនាំប្រទេសឆ្ពោះទៅរកសុខសន្តិភាព និងការអភិវឌ្ឍលើគ្រប់វិស័យនិងការពារបូរណភាពទឹកដី។
ឯកឧត្ដម ឧត្ដម សេនីយ៍ឯក ឌៀង សារុន មេបញ្ជាការរងនៃបញ្ជាការដ្ឋានអង្គរក្សតំណាង ឯកឧត្ដមនាយឧត្ដមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរៈភូមិន្ទ និងជាមេបញ្ជាការ នៃបញ្ជាការដ្ឋានអង្គរក្ស បានឱ្យដឹងថា ក្រៅពីតួនាទីភារកិច្ចជាកងយោធពលខេមរៈភូមិន្ទបញ្ជាការអង្គរក្សមានតួនាទីនិងអភិក្រម ស្មោះត្រង់ការពារបម្រើ ការពារសន្តិសុខសុវត្ថិភាពជូនសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតព្រមទាំងគ្រួសារឱ្យបាន១០០%។
ក្រៅពីនេះ បញ្ជាការដ្ឋានអង្គរក្សបានចូលរួមធ្វើការងារសង្គមជាច្រើនជាកងអន្តរាគមន៍ចុះជួយដកស្ទួងច្រូតកាត់ បូមទឹកជូនប្រជាពលរដ្ឋដែលខ្វៈកម្លាំងពលកម្មជួយប្រទះការរាំងស្ងួត និងគ្រោះមហន្តរាយផ្សេងៗព្រមទាំងជាសេនាធិការឱ្យកាកបាទក្រហមកម្ពុជាជួយដឹកជញ្ជូនស្បៀងអាហារទៅចែកជូនប្រជាពលរដ្ឋរងគ្រោះដោយទឹកជំនន់ខ្យល់ព្យុះនិងធម្មជាតិផ្សេងៗនៅគ្រប់ខេត្តក្រុងទូទាំងប្រទេស៕
