ភ្នំពេញ៖​ ក្នុងមហិច្ឆតាចង់ប្រមូលមេដាយឱ្យបានច្រើនក្នុងនាមជាម្ចាស់ផ្ទះនៃព្រឹត្តិការណ៍ប្រកួតកីឡាស៊ីហ្គេមលើកទី៣២ ឆ្នាំ២០២៣នោះ ប្រធានសហព័ន្ធកីឡាហែលទឹកស្ម័គ្រចិត្តកម្ពុជាបានប្រកាសក្ដែងៗថាខ្លួនមានគម្រោងបង្កើតឱ្យមានទីលានកីឡាហែលទឹកស្ដង់ដាអន្តរជាតិឱ្យគ្រប់ខេត្តក្រុងក្នុងប្រទេសដើម្បីប្រមែប្រមូលថ្នាល និងយុវជនដែលមានទេពកោសល្យមកចូលក្រុមជម្រើសជាតិ។ ប្រធានសហព័ន្ធកីឡាហែលទឹកកម្ពុជា លោក​ ស៊ុន ចាន់ថុល បានមានប្រសាសន៍បែបនេះថា នៅពេលឆាប់ៗខាងមុខនេះសហព័ន្ធខ្មែរកីឡាហែលទឹក និងបន្ថែមវិញ្ញាសាបាល់លេងក្នុងទឹកមួយទៀតដើម្បីបំពេញគ្រប់ស្តង់ដាប្រកួតលើឆាកអន្តរជាតិ។ ក្នុងនោះលោកក៏គ្រោងបង្កើតអាងហែលទឹកកម្រិតស្តង់ដានៅតាមបណ្តាខេត្តមួយចំនួនបន្ថែមទៀតដើម្បីត្រៀមការប្រកួតប្រជែងស៊ីហ្គេមឆ្នាំ២០២៣ តែបើសិនជាមានអ្នកឧបត្ថម្ភច្រើន នោះលោកគ្រោងបង្កើតឱ្យមានគ្រប់ខេត្តក្រុងតែម្ដង។ ទន្ទឹមនឹងនេះ សហព័ន្ធខ្មែរកីឡាហែលទឹកប្តេជ្ញាខិតខំគៀងគររកថវិកាសាងសង់អាងហែលទឹកកម្រិតស្តង់ដាអន្តរជាតិបន្ថែមទៀតនៅតាមបណ្តាខេត្តមួយចំនួនដើម្បីស្វែងរកធនធានកីឡាករ-ការិនីដែលមានសមត្ថភាពមកបណ្តុះបណ្តាលត្រៀមប្រជែងយកមេដាយជូនជាតិ។ លោកក៏បានជំរុញ​ព្រមទាំងលើកទឹកចិត្តឲ្យកីឡាករ កីឡាការិនីខិតខំប្រឹងប្រែងបន្ថែមទៀតដើម្បីបំប៉នសមត្ថភាពឆ្ពោះទៅប្រជែងដណ្តើមយកមេដាយលើឆាកអន្តរជាតិមកជូនកម្ពុជា និងត្រៀមខ្លួនប្រជែងនៅស៊ីហ្គេមឆ្នាំ២០២៣ ដើម្បីលើកកិ​ត្យានុពភាពកម្ពុជាលើឆាកអន្តរជាតិផងដែរ ៕