[Kampuchea Thmey] - ការសាងសង់ស្ពានស្ទឹងត្រង់-ក្រូចឆ្មារ សម្រេចបាន ៨៧ភាគរយ
2020-06-03
Go to the website published Kampuchea Thmey
កំពង់ចាម ៖ ស្ពានតភ្ជាប់ពីស្រុកស្ទឹងត្រង់ (ខេត្តកំពង់ចាម) ទៅស្រុកក្រូចឆ្មារ (ខេត្តត្បូងឃ្មុំ) សម្រេចការសាងសង់បាន៨៧,៥%។ គម្រោង នឹងស្ថាបនារួចរាល់មុនកាលកំណត់ គឺក្នុងខែមីនា ឆ្នាំ២០២១ (កាលកំណត់ក្នុងខែឧសភា ឆ្នាំ២០២១) ហើយស្ពាន អាចតភ្ជាប់រួចរាល់នៅខែធ្នូ ឆ្នាំ២០២០ ខាងមុខនេះ។
ក្រោយពីសាងសង់រួចរាល់ ស្ពាននេះ នឹងចូលរួមចំណែកយ៉ាងសំខាន់ ដើម្បីតភ្ជាប់ទំនាក់ទំនងការដឹកជញ្ជូន និងការធ្វើដំណើររបស់បងប្អូនប្រជាពលរដ្ឋខេត្តកំពង់ចាម និងខេត្តត្បូងឃ្មុំ ដែលរស់នៅយ៉ាងច្រើនកុះករ នៅត្រើយខាងកើត និងត្រើយខាងលិច ទន្លេមេគង្គ ឲ្យបានងាយស្រួល ឆាប់រហ័ស។
ស្ពាននេះ មានប្រវែងសរុប ១.១៣១ ម និង ទទឹង ១៣,៥០ ម ជាប្រភេទស្ពានបេតុងសរសៃដែក ហើយត្រូវបានបើកការដ្ឋាន កាលពីថ្ងៃទី៩ ខែកុម្ភៈ ឆ្នាំ២០១៨ ដោយគ្រោងចំណាយថវិកាសរុប ៥៦,៩៩៨ លានដុល្លារសហរដ្ឋអាមេរិក និងប្រើប្រាស់រយៈពេលសាងសង់ចំនួន៤២ខែ។
ការស្ថាបនាសាងសង់ស្ពានតភ្ជាប់ពីស្រុកស្ទឹងត្រង់ (ខេត្តកំពង់ចាម) ទៅស្រុកក្រូចឆ្មារ (ខេត្តត្បូងឃ្មុំ) ដែលបានបើកការដ្ឋានសាងសង់ កាលពីថ្ងៃទី៩ ខែកុម្ភៈ ឆ្នាំ២០១៨ នេះបើយោងប្រភពព័ត៌មានដែលទទួលបានពីក្រសួងសាធារណការ និង ដឹកជញ្ជូន។
ស្ពានមិត្តភាព កម្ពុជា ចិន ស្ទឹងត្រង់-ក្រូចឆ្មារ នេះ មានប្រវែងសរុប១.១៣១ម៉ែត្រ និង ទទឹង ១៣,៥០ម ជាប្រភេទស្ពានបេតុងសរសៃដែកគ្រោងចំណាយថវិកាសរុប ៥៦,៩៩៨ លានដុល្លារសហរដ្ឋអាមេរិក ជាហិរញ្ញប្បទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជាសម្រាប់ដោះស្រាយផលប៉ះពាល់ និងបោសសំអាតយុទ្ធភណ្ឌមិនទាន់ផ្ទុះ ។
ស្ពានស្ទឹងត្រង់-ក្រូចឆ្មារ នេះ មានទីតាំងស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ខេត្តកំពង់ចាម ឆ្លងកាត់ទន្លេមេគង្គទៅត្រើយខាងកើត ស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ។
គម្រោងស្ពាននេះ សាងសង់ឡើងដោយក្រុមហ៊ុនសំណង់ សៀង ហៃគ្រុប (Shanghai Construction Group) ត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេស ក្វាងចូវវ៉ានអាន។ តាមគ្រោងការស្ថាបនានេះ នឹងត្រូវចំណាយរយៈពេល ចំនួន៤២ខែ ចាប់ពីខែកុម្ភៈ ឆ្នាំ២០១៨៕
អត្ថបទ ៖ រ៉ាវុទ្ធ
