ថ្ងៃព្រហស្បតិ៍ ៧កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៨ ខែឧសភា ឆ្នាំ២០២០ នៅទីស្ដីការក្រសួង ឯកឧត្តម កឹម បូរី អនុរដ្ឋលេខាធិការ នៃក្រសួងសាធារណការ និងដឹកជញ្ជូន និងជាប្រធានគ្រប់គ្រង និងសម្របសម្រួលគម្រោង បានអញ្ជើញដឹកនាំកិច្ចប្រជុំលើកដំបូង ស្ដីអំពីគម្រោងលើកកម្ពស់ការគ្រប់គង់ទឹកស្អាត និងអនាម័យសាធារណៈ ក្រោមឥណទានសម្បទានរបស់ធនាគាពិភពលោក ដោយមានការចូលរួមពីថ្នាក់ដឹកនាំក្រសួង មន្ត្រីជំនាញនៃអង្គភាពក្រោមឱវាទក្រសួង និងភាគីពាក់ព័ន្ធផងដែរ។ កិច្ចប្រជុំនេះផ្ដោតជាសំខាន់លើរបៀបវារៈមួយចំនួនរួមមាន៖ ការប្រកាសសុពលភាពមន្ត្រីអនុវត្តគម្រោង ការពិនិត្យវឌ្ឍនភាពការងារ បញ្ហាប្រឈម ការរៀបចំបេសកកម្ម សេចក្តីណែនាំ របៀបរបបធ្វើការ ការកំណត់របបប្រជុំ និងការពិនិត្យភារកិច្ចរបស់សមាជិក CMU/PSTជាមួយសមាជិកបេសកកកម្ម របស់ធនាគារពិភពលោក។ ឯកឧត្ដមអនុរដ្ឋលេខាធិការ និងជាប្រធានគ្រប់គ្រង និងសម្របសម្រួលគម្រោង បានផ្ដាំផ្ញើឱ្យសមាជិកសមាជិកានៃគណៈកម្មាធិការដឹកនាំដំណើរការអនុវត្តគម្រោងខិតខំប្រឹងប្រែងបំពេញការងារឱ្យអស់ពីសមត្ថភាព ប្រកបដោយប្រសិទ្ធភាព និងតម្លាភាព បង្កើនកិច្ចសហប្រតិបត្តិការល្អផ្ទៃក្នុងជាមួយភាគីពាក់ព័ន្ធ និងដៃគូអភិវឌ្ឍន៍នានា និងរិះរកគ្រប់មធ្យោបាយនិងយុទ្ធសាស្ត្រ ដើម្បីអភិវឌ្ឍវិស័យទឹកស្អាត និងអនាម័យ ដើម្បីសុខមាលភាពប្រជាពលរដ្ឋ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យបានមួយកម្រិតទៀត។ បច្ចុប្បន្នរាជរដ្ឋាភិបាល និងដៃគូអភិវឌ្ឍន៍បានខិតខំប្រឹងប្រែងបំពេញការងារយ៉ាងសកម្ម ដើម្បីអភិវឌ្ឍវិស័យទឹកស្អាត និងអនាម័យសាធារណៈឱ្យកាន់តែមានភាពប្រសើរជាងមុនក្រោមចក្ខុវិស័យវែងឆ្ងាយ។ សូមជម្រាបជូនថា៖ ប៉មចម្រោះទឹកស្អាតចំនួន៧ ដែលក្រុមហ៊ុនបានដំឡើងនៅកម្ពុជាកាលពីឆ្នាំ២០១៧ កន្លងទៅ បានផ្តល់ទឹកស្អាតចំនួន៤ ៦៨៧ ០០០ លីត្រ សម្រាប់ប្រជាសហគមន៍ចំនួនប្រមាណជាង២០ ០០០នាក់ តួលេខនេះត្រូវបានរំពឹងថា៖ នឹងកើនឡើងទ្វេដងក្នុងឆ្នាំនេះ តាមរយៈការដំឡើងប៉មចម្រោះទឹកស្អាតចំនួន៨បន្ថែមទៀតក្នុងឆ្នាំ២០១៨នេះ៕