កិច្ចប្រជុំពិភាក្សាលើសេចក្ដីព្រាងបឋម ច្បាប់ស្ដីពីការគ្រប់គ្រងទឹកកខ្វក់ និងប្រព័ន្ធលូ --- ថ្ងៃព្រហស្បតិ៍ ២កើត ខែពិសាខ ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី២៣ ខែមេសា ឆ្នាំ២០២០ នៅទីស្ដីការក្រសួង ឯកឧត្តម កឹម បូរី អនុរដ្ឋលេខាធិការនៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាលើសេចក្ដីព្រាងបឋម ច្បាប់ស្ដីពីការគ្រប់គ្រងទឹកកខ្វក់ និងប្រព័ន្ធលូ ដោយមានការអញ្ជើញចូលរួមពីសំណាក់ថ្នាក់ដឹកនាំក្រសួងពាក់ព័ន្ធ។ កិច្ចប្រជុំនេះធ្វើឡើងដើម្បីពិនិត្យលើរចនាបទ ខ្លឹមសារ និងការប្រើប្រាស់ភាសាគន្លឹះនានា ក៏ដូចជាដើម្បីប្រមូលធាតុចូលបន្ថែម សំដៅឱ្យច្បាប់នេះកាន់តែមានខ្លឹមសារគ្រប់ជ្រុងជ្រោយស្របតាមបទដ្ឋានគតិយុត្តនានារបស់ព្រះរាជាណាចក្រកម្ពុជា។ ឯកឧត្ដមអនុរដ្ឋលេខាធិការ បានឱ្យដឹងថា កិច្ចប្រជុំនេះគឺជាកិច្ចប្រជុំលើកទីមួយបន្ទាប់ពីពង្រាងច្បាប់នេះត្រូវបានក្រុមការងារជំនាញដាក់ជូនភាគីពាក់ព័ន្ធចូលរួមផ្ដល់ជាមតិយោបល់ ដើម្បីជាធាតុចូល។ ឯកឧត្ដមអនុរដ្ឋលេខាធិការបានបន្តថា ច្បាប់នេះត្រូវការរយៈពេលសមស្របមួយដើម្បីប្រជុំពិនិត្យ ពិភាក្សា និងប្រមូលធាតុចូលពីគ្រប់ស្ថាប័នពាក់ព័ន្ធ ទាំងស្ថាប័នសាធារណៈ ឯកជន ដៃគូអភិវឌ្ឍន៍ អង្គការសង្គមស៊ិវិលដើម្បីឱ្យច្បាប់នេះមានខ្លឹមសារ និងវិសាលភាពគ្របដណ្ដប់គ្រប់ជ្រុងជ្រោយ និងបម្រើប្រយោជន៍ជាតិមាតុភូមិ មុននឹងដាក់ជូនគណៈរដ្ឋមន្ត្រីពិនិត្យ។ ឯកឧត្ដមអនុរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះសមាជិកសមាជិការនៃអង្គប្រជុំដែលបានចូលរួមផ្ដល់មតិយោបល់យ៉ាងផុលផុសលើពង្រាងច្បាប់នេះ។ ជាមួយគ្នានេះដែរ ឯកឧត្ដមអនុរដ្ឋលេខាធិការ ស្នើឱ្យបង្កើតក្រុមការងារពិសេសមួយដើម្បីដឹកនាំប្រជុំពិនិត្យលើពង្រាងច្បាប់នេះឱ្យបានញឹកញាប់ ដើម្បីឱ្យការរៀបចំមានដំណើរការរលូន និងឆាប់រហ័ស៕