(ភ្នំពេញ)៖ នាព្រឹកថ្ងៃពុធ ទី០១ ខែមេសា ឆ្នាំ២០២០នេះ ឯកឧត្ដម ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញ និងអាជ្ញាធរមូលដ្ឋានចុះពិនិត្យការងារស្ថាបនាការងារស្ដារប្រឡាយនិងការងារដាក់លូស្ថិតក្នុងខណ្ឌពោធិ៍សែនជ័យ និង ខណ្ឌសែនសុខ ភាគខាងលិចរាជធានីភ្នំពេញ គោលបំណងរៀបចំឱ្យបានរួចរាល់សម្រាប់រំដោះជំនន់ទឹកភ្លៀង មុនពេលដែលរដូវវស្សាចូលមកដល់។ សម្រាប់ការងារស្ថាបនាស្ដារប្រឡាយនិងការងារដាក់លូក្នុង ខណ្ឌពោធិ៍សែនជ័យ និង ខណ្ឌសែនសុខ នេះ បែងចែកជា ២ជំហាន ៖ - ជំហានទី១ គឺការស្ថាបនាការងារស្ដារប្រឡាយនិងការងារដាក់លូមូលភ្លោះ លើប្រឡាយត្រពាំងជ្រៃ ការងារដាក់លូជ្រុងភ្លោះ លើប្រឡាយចំការឪឡឹក ការងារដាក់លូជ្រុងភ្លោះ ចាប់ពីចុងប្រឡាយចំការឪឡឹក ដល់កែងផ្លូវលេខ105K ការងារដាក់លូជ្រុងភ្លោះ ឆ្លងកាត់ផ្លូវរថភ្លើង ការងារដាក់លូមូលភ្លោះ ឆ្លងកាត់បុរីឃិតឈឿន ការងារចាក់បេតុងឆ្អឹងដែកពីលើគន្លងដាក់លូមូល លូជ្រុងភ្លោះ និងការជួសជុលផ្លូវរថភ្លើងឡើងវិញ ដែលមានផ្ទៃក្រឡាសរុប ៧,៤៧៤ម៉ែត្រការ៉េ។ - ជំហានទី២ ការងារការស្ដារប្រព័ន្ធបង្ហូរទឹកផ្នែកខាងជើងមហាវិថីសហព័ន្ធរុស្ស៊ី ដោយចាប់ពីប្រឡាយត្រពាំងជ្រៃ ប្រឡាយចំការឪឡឹក ប្រឡាយតាបែន ប្រឡាយទួលសំពៅ និងប្រឡាយអូរអាគុជ សរុបផ្ទៃក្រឡា ១៣,៦៥០ម៉ែត្រការ៉េ និងការងារសាងសង់ស្ពានបេតុងមួយ ឆ្លងកាត់ប្រឡាយទួលសំពៅ ( ស្ពានឱកាសខ្ញុំ ) ស្ថិតក្នុងសង្កាត់កាកាបទី១ សង្កាត់កាកាបទី២ ខណ្ឌពោធិ៍សែនជ័យ និងសង្កាត់គោកឃ្លាង សង្កាត់ឃ្មួញ ខណ្ឌសែនសុខរាជធានីភ្នំពេញ។ នាឱកាសនោះ ឯកឧត្ដម ឃួង ស្រេង អភិបាលរាជធានីភ្នំពេញ បានជំរុញឲ្យមន្ត្រីជំនាញនិងអាជ្ញាធរមូលដ្ឋានធ្វើយ៉ាងណាសហការពន្លឿនការងារបំពាក់ប្រព័ន្ធលូ និងស្តាប្រឡាយលូ នៅភាគខាងលិចរាជធានីភ្នំពេញនេះ ឲ្យបានឆាប់រួសរាន់ ធ្វើយ៉ាងណាឱ្យរួចរាល់មុនពេលដែល រដូវវស្សាចូលមកដល់ ដើម្បីធានាបាននូវការរំដោះជំនន់ទឹកភ្លៀង៕