ថ្ងៃសុក្រ ៥រោច ខែផល្គុន ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៣ ខែមីនា ឆ្នាំ២០២០ ឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្ដីពីវឌ្ឍនភាពនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទីបី ឆ្នាំ២០១៩ និងវគ្គបណ្ដុះបណ្ដាលស្ដីពីមូលដ្ឋានសម្រាប់ព្យាករណ៍ចំណូល និងការប្រើប្រាស់ប្រព័ន្ធNRMIS ព្រមទាំងការចុះបញ្ជីសារពើភណ្ឌទ្រព្យសម្បត្តិរដ្ឋតាមប្រព័ន្ធព័ត៌មានវិទ្យាដល់អង្គភាពប្រមូលចំណូល និងអង្គភាពក្រោមឱវាទក្រសួង ដោយមានការចូលរួមពីមន្ត្រីជាន់ខ្ពស់ក្រសួង អង្គភាពពាក់ព័ន្ធ មន្ត្រីនៃមន្ទីរសាធារណការ និងដឹកជញ្ជូន សរុបប្រមាណ ១០០នាក់។ សិក្ខាសាលានេះមានការចូលរួមធ្វើបទបង្ហាញពីមន្ត្រីជំនាញដែលអញ្ជើញមកពីនាយកដ្ឋានព័ត៌មានវិទ្យា និងទំនាក់ទំនងសាធារណៈ នាយកដ្ឋានហិរញ្ញវត្ថុ នាយកដ្ឋានដឹកជញ្ជូនផ្លូវគោក និងនាយកដ្ឋានដឹកជញ្ជូនផ្លូវទឹក ក្នុងគោលបំណងផ្សព្វផ្សាយឲ្យបានទូលំទូលាយ បង្កើនការចូលដឹង ការគាំទ្រនិងការចូលរួមចំណែកយ៉ាងសកម្មពីគ្រប់អង្គភាពក្រោមឱវាទក្រសួង។ សិក្ខាសាលានេះផ្ដោតជាសំខាន់លើការណែនាំអំពីរបៀប និងនីតិវិធីនៃការបំពេញការងារក្នុងការតាមដានវឌ្ឍនភាពការងារកំណែទម្រង់ហិរញ្ញវត្ថុសាធារណៈដំណាក់កាលទីបី សំដៅធ្វើរបាយការណ៍បូកសរុបជាកញ្ចប់។ ថ្លែងសន្ទរកថានៅក្នុងកម្មវិធីបើក ឯកឧត្តមរដ្ឋលេខាធិការបានសម្ដែងនូវមោទនភាពចំពោះវឌ្ឍនភាពការងារ និងសមិទ្ធផលសម្រេចបានក្នុងរយៈពេលប៉ុន្មានឆ្នាំចុងក្រោយរបស់ក្រសួងដែលក្នុងនោះរួមមានការប្រើប្រាស់ប្រព័ន្ធបច្ចេកវិទ្យាអនឡាញ ដើម្បីចុះបញ្ជីយានយន្ត និងពិនិត្យលក្ខណៈបច្ចេកទេសយានយន្ត ជាដើម។ ជាមួយគ្នានេះផងដែរ ឯកឧត្តមរដ្ឋលេខាធិការបានវាយតម្លៃខ្ពស់ចំពោះស្មារតីយកចិត្តទុកដាក់របស់មន្ត្រីក្រោមឱវាទក្រសួងទាំងអស់ដែលបានខិតខំប្រឹងប្រែងផ្ដល់សេវាសាធារណៈ និងសេវាចាំបាច់ជូនប្រជាពលរដ្ឋ ប្រកបដោយតម្លាភាព គណនេយ្យភាព ប្រសិទ្ធភាព និងស័ក្កិសិទ្ធភាពផងដែរ។ ឯកឧត្តមរដ្ឋលេខាធិការ បានជំរុញលើកទឹកចិត្តឲ្យអង្គសិក្ខាកាមទាំងអស់ខិតខំប្រឹងប្រែងយកចិត្តទុកដាក់ស្វែងយល់ និងពិភាក្សាឱ្យកាន់តែស៊ីជម្រៅ ដើម្បីទទួលបាននូវចំណេះដឹងថ្មីៗបន្ថែមទៀតសម្រាប់យកទៅអនុវត្តការងារក្នុងអង្គភាពរបស់ខ្លួនឲ្យកាន់តែមានភាពច្បាស់លាស់ និងជួយផ្សព្វផ្សាយទៅក្នុងអង្គភាពរបស់ខ្លួនឲ្យកាន់តែទូលំទូលាយផងដែរ។ សូមជម្រាបជូនថា ក្រសួងសាធារណការ និងដឹកជញ្ជូន បានដាក់ចេញនូវផែនការចំណូលដែលជាយន្តការមួយសម្រាប់តាមដាន គ្រប់គ្រង និងកត់ត្រានូវចំណូលដែលប្រមូលបាន និងពង្រីកការផ្ដល់សេវាសាធារណៈយ៉ាងមានតម្លាភាព គណនេយ្យភាព ប្រសិទ្ធភាព សន្សំសំចៃនិងទាន់ពេលវេលា៕