ថ្ងៃព្រហស្បតិ៍ ៥រោច ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៣ ខែកុម្ភៈ ឆ្នាំ២០២០ លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ លើសេចក្ដីព្រាងរបាយការណ៍ដើម្បីបង្កើតលិខិតបទដ្ឋានគតិយុត្តក្នុងវិស័យភស្ដុភារកម្ម ដោយមានការចូលរួមពីតំណាងក្រសួង-ស្ថាប័នពាក់ព័ន្ធ ក្រុមហ៊ុនឯកជន និងដៃគូអភិវឌ្ឍន៍ផងដែរ។ សិក្ខាសាលានេះរៀបចំឡើងក្នុងគោលបំណង ចែករំលែកសេចក្ដីព្រាងរបាយការណ៍ដែលបានមកពីការសិក្សាកន្លងមក និងពិគ្រោះយោបល់លើការបង្កើតលិខិតបទដ្ឋានគិតិយុត្តក្នុងវិស័យភស្តុភារកម្មនៅកម្ពុជាទាក់ទងនឹងប្រធានបទសំខាន់ៗចំនួន៣ គឺ ១)ការចុះបញ្ជីអាជីវកម្មភស្តុភារកម្ម ២)ការគ្រប់គ្រងអាជីវកម្មឃ្លាំង និង ៣)មជ្ឈមណ្ឌលភស្តុភារកម្ម សំដៅឱ្យការបង្កើតលិខិតបទដ្ឋានគតិយុត្តទាំងនេះមានលក្ខណៈកាន់តែប្រសើរឡើង គ្រប់ជ្រុងជ្រោយ និងបម្រើប្រយោជន៍រួម។ ថ្លែងក្នុងពិធីនោះ លោកជំទាវរដ្ឋលេខាធិការ បានគូសបញ្ជាក់ថាលិខិតបទដ្ឋានគតិយុត្តដើរតួនាទីយ៉ាងសំខាន់ក្នុងវិស័យភស្តុភារកម្ម ដែលមិនអាចចៀសវាងបាន ដោយហេតុថាជាក្រិតក្រមសម្រាប់ឱ្យអ្នកធ្វើប្រតិបត្តិការទាំងអស់អនុវត្តតាម ប្រកបដោយទំនុកចិត្ត និងស្មារតីទទួលខុសត្រូវខ្ពស់។ លោកជំទាវបានបន្តថា ដើម្បីឱ្យការអនុវត្តលិខិតបទដ្ឋានគតិយុត្តទាំងនេះមានប្រសិទ្ធភាពខ្ពស់ គ្រប់ក្រសួងស្ថាប័ន និងភាគីពាក់ព័ន្ធទាំងអស់ត្រូវសហការ និងប្ដេជ្ញាចិត្តខ្ពស់ក្នុងការគាំទ្រ ជាពិសេសត្រូវអនុវត្តច្បាប់ទាំងនោះឱ្យបានខ្ជាប់ខ្ជួន និងម៉ឺងម៉ាត់បំផុត។ លោកជំទាវរដ្ឋលេខាធិការបានសម្ដែងនូវអំណរគុណយ៉ាងជ្រាលជ្រៅចំពោះទីភ្នាក់ងារសហប្រតិបត្តិការអន្តរជាតិជប៉ុន “JICA” ក្រុមជំនាញការជប៉ុន អង្គការដៃគូអភិវឌ្ឍន៍ ភាគីពាក់ព័ន្ធ និងមន្ត្រីទាំងអស់ដែលបានសហការ និងផ្ដល់ការគាំទ្រ ក្នុងការអភិវឌ្ឍវិស័យភស្តុភារកម្មនៅកម្ពុជា ព្រមទាំងបានផ្ដាំផ្ញើ និងលើកទឹកចិត្តឱ្យសិក្ខាកាមទាំងអស់ចូលរួមយ៉ាងសកម្មក្នុងការផ្ដល់ធាតុចូលសំខាន់ៗ ផ្លាស់ប្ដូរយោបល់ និងបទពិសោធន៍ ដើម្បីឱ្យការបង្កើតលិខិតបទដ្ឋានគតិយុត្តក្នុងវិស័យនេះ មានលក្ខណៈកាន់តែគ្រប់ជ្រុងជ្រោយថែមទៀត៕