ព្រះសីហនុ៖ អ្នកដំណើរក្នុងកប៉ាល់ទេសចរណ៍យក្ស Westerdam ដែលបាននឹងកំពុងសំចូលចតនៅកំពង់ផែ ខេត្តព្រះសីហនុ នឹងត្រូវចាកចេញពីប្រទេសកម្ពុជាវិញ តាមព្រលានយន្តហោះខេត្តព្រះសីហនុ និងព្រលានយន្តហោះអន្តរជាតិភ្នំពេញ។ ប៉ុន្តែពួកគេ ត្រូវឆ្លងកាត់ការត្រួតពិនិត្យសុខភាពជាមុនសិន ដើម្បីធានាថា មិនមានអ្នកផ្ទុកវីរុសកូរ៉ូណា ឬ Covid-19។ នេះបើតាមការចុះផ្សាយដោយសារព័ត៌មានក្នុងស្រុក នៅថ្ងៃទី១៣ ខែកុម្ភៈ ឆ្នាំ២០២០។ លោក ឃាង ភារម្យ អ្នកនាំពាក្យសាលាខេត្តព្រះសីហនុ បានឱ្យដឹងថា បន្ទាប់ពីពិនិត្យសុខភាពហើយ អ្នកដំណើរនឹងត្រូវបានដឹកជញ្ជូនមកកាន់ព្រលានយន្តហោះខេត្តព្រះសីហនុ មុននឹងហោះហើរមកកាន់ព្រលានយន្តហោះអន្តរជាតិភ្នំពេញ។ តែបច្ចុប្បន្ន ពួកគេកំពុងនៅលើកប៉ាល់ដើម្បីពិនិត្យសុខភាព។ ទន្ទឹមនឹងនោះ អាជ្ញាធរ បានបង្កើតក្រុមការងារចំពោះកិច្ច មានក្រុមគ្រូពេទ្យ មន្រ្តីអន្តោប្រវេសន៍ ហើយបានត្រៀមរថយន្តដឹកអ្នកដំណើរចំនួន ៣០គ្រឿង រថយន្តសង្គ្រោះចំនួន ៥គ្រឿង ឧត្ថម្ភាចក្រ ១គ្រឿង និងមធ្យោបាយផ្សេងៗទៀតផងដែរ។ លោក លូ គឹមឈុន ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ បានឱ្យដឹងថា មន្រ្តី នឹងពិនិត្យតាមដានសុខភាពអ្នកដំណើរទាំងអស់នោះ។ ប្រសិនបើពិនិត្យហើយមិនមានបញ្ហាអ្វីកើតឡើង អ្នកដំណើរ អាចនឹងចាកចេញពីកប៉ាល់នៅរសៀលថ្ងៃទី១៣ ខែកុម្ភៈនេះ។ តាមផែនការ អ្នកដំណើរចំនួន៦០០នាក់ នឹងត្រូវចាកចេញពីនាវា នៅថ្ងៃនេះ និង៨០០នាក់ទៀត នឹងចាកចេញនៅថ្ងៃស្អែក។ សូមបញ្ជាក់ថា នាវាទេសចរណ៍ដ៏ធំ របស់សហរដ្ឋអាមេរិក Westerdam ត្រូវបាន ប្រទេសចំនួន៦ រួមមាន ជប៉ុន កូរ៉េខាងត្បូង ហ្វីលីពីន តៃវ៉ាន់ និង ហ្គាម (Guam) បានបដិសេធមិនឱ្យកប៉ាល់នេះចូលចតឡើយ ដោយបារម្ភខ្លាចអ្នកទេសចរនៅលើកប៉ាល់មានផ្ទុកមេរោគ កូរ៉ូណាថ្មី ឬ COVID-19។ សម្រាប់កម្ពុជា បានអនុញ្ញាតឱ្យចូលចត ដើម្បីចូលរួមសង្រ្គោះក្នុងកិច្ចការមនុស្សធម៌ និងបង្ហាញថា កម្ពុជាមិនរើសអើងជាតិសាសន៍ណាមួយឡើយ។ កប៉ាល់ទេសចរណ៍អាមេរិក Westerdam បានធ្វើដំណើរពីទីក្រុងហុងកុង កាលពីថ្ងៃទី១ ខែកុម្ភៈ ដែលមានផ្ទុកអ្នកដំណើរប្រមាណ ១៤៥៥នាក់ និងបុគ្គលិកបម្រើការងារក្នុងនោះចំនួន ៨០២នាក់ មកពី ៤១ជាតិសាសន៍។ បើតាមការបញ្ជាក់ដោយឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក Patrick Murphy បានឱ្យដឹងថា នាវាដែលមានពលរដ្ឋអាមេរិកនោះ មិនមានរបាយការណ៍ទាក់ទងនឹងករណីជំងឺរលាកសួត COVID-19 ទេ ហើយនៅក្នុងនាវានោះ មានក្រុមការងារពេទ្យដែលកំពុងតាមដានពិនិត្យយ៉ាងដិតដល់។ មន្រ្តី និងក្រុមពេទ្យ នឹងធ្វើការជាមួយនឹងអាជ្ញាធរកម្ពុជា ដើម្បីជួយដល់ពលរដ្ឋអាមេរិក និងការផ្លាស់ប្តូរគោលដៅរបស់ពួកគេ៕