ព្រះសីហនុ៖ រាជរដ្ឋភិបាលកម្ពុជា បានអនុញ្ញាតឱ្យអ្នកដំណើរទេសចរណ៍ទាំងអស់ ចេញពីនាវាហើយ ដើម្បីឱ្យពួកគេបានបន្តដំណើរតាមយន្តហោះ ទៅមាតុប្រទេសពួកគេរៀងៗខ្លួន។ ការអនុញ្ញាតនេះ គឺក្រោយពីទទួលបានលទ្ធផលពីមន្ទីរពិសោធន៍នៃវិទ្យាស្ថាប៉ាស្ទ័រ ដែលបញ្ជាក់ថា មិនមានមេរោគកូរ៉ូណាវីរុសប្រភេទថ្មី ឬ COVID-19 លើអ្នកទេសចរចំនួន ២០នាក់ ដែលបង្ហាញរោគសញ្ញាលើកប៉ាល់ទេសចរណ៍ Westerdam។ ការអនុញ្ញាតឱ្យចាកចេញពីនាវាខ្នាតយក្ស ដែលមានផ្ទុកអ្នកទេសចរជាង ២ពាន់នាក់នោះ បន្ទាប់ពីមកដល់ប្រទេសកម្ពុជាអស់រយៈពេល១ថ្ងៃ និង១យប់រួចមក។ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានធ្វើដំណើរពីទីក្រុងភ្នំពេញ ឆ្ពោះទៅខេត្តព្រះសីហនុ ដើម្បីបានទទួលជួបអ្នកទេសចរទាំងអស់នោះដោយផ្ទាល់ នៅពេលពួកគេដើចេញពីនាវា នាព្រឹកព្រលឹមថ្ងៃទី១៤ ខែកម្ភៈ ឆ្នាំ២០២០ និងបានជូនបាច់ផ្កាដល់ពួកគេគ្រប់ៗគ្នាផងដែរ ដែលបញ្ជាក់ពីក្តីស្រឡាញ់ ដោយមិនមានការរើសអើងជាតិសាសន៍ណាមួយឡើយ។ មិនតែប៉ុណ្ណោះ ប្រមុខរាជរដ្ឋាភិបាលកម្ពុជា ក៏បានជូយសម្រួលការចេញទិដ្ឋាកា អនុញ្ញាតឱ្យអ្នកដំណើរទេសចរទាំងអស់ បានធ្វើដំណើរតាមរថយន្តក្រុងឆ្ពោះ ទៅអាកាសយាន្តដ្ឋានអន្តរជាតិក្រុងព្រះសីហនុ ដើម្បីបន្តជិះយន្តហោះត្រឡប់ទៅមាតុប្រទេសពួកគេរៀងៗខ្លួន និងបានជូនពរអ្នកកដំណើរទាំងអស់ ធ្វើដំណើរប្រកបដោយសុខភាព និងសុវត្ថិភាពផងដែរ។ សម្តេចតេជោ ហ៊ុន សែន បានអះអាងថា នៅពេលនេះមិនមែនជាពេលវេលាដែលត្រូវភ័យខ្លាច និងជាពេលវេលាត្រូវរើសអើងនោះទេ តែជាពេលត្រូវរួបរួមគ្នា សាមគ្គីគ្នា ដើម្បីដោះស្រាយបញ្ហាប្រឈមនានាលើសកលលោក។ សម្ដេចតេជោ ហ៊ុន សែន បានមានប្រសាសន៍ថា “គេនិយាយអំពីការភ័យខ្លាចកូរ៉ូណា ឬ Covid-19 ប៉ុន្ដែសម្រាប់ខ្ញុំ ខ្ញុំយល់ផ្សេងអ្នកដទៃ ឬប្រទេសដទៃអាចយល់ថា ចុះបើមានជំងឺកូរ៉ូណានេះនៅលើនាវា តើកម្ពុជាអនុញ្ញាតឱ្យចូលទេ? ខ្ញុំអាចឆ្លើយតបយ៉ាងច្បាស់ថា ប្រសិនមានអ្នកជំងឺនេះនៅលើនាវា ខ្ញុំនឹងឱ្យចូលយ៉ាងលឿនបំផុតតាមដែលអាចធ្វើទៅបាន។ មូលហេតុនៅត្រង់ថា ប្រសិនមានអ្នកជំងឺនៅលើនាវានេះ តើយើងទុកឱ្យអ្នកជំងឺនោះ ស្លាប់នៅលើនាវានេះ បន្ទាប់ទៅសាកសពតើត្រូវទម្លាក់ចោលក្នុងទឹកសមុទ្រ ឬក៏ត្រូវទុកនៅលើនាវា”។ សម្ដេចសង្កត់ធ្ងន់ថា កម្ពុជាយកការទទួលខុសត្រូវមួយនៅលើបញ្ហាគោរពសិទ្ធិមនុស្សជាចំបង ហើយដំបូងបំផុត ត្រូវគោរពដល់ការរស់រានមានជីវិតរបស់មនុស្ស ដែលមានជាង ២,២០០នាក់នៅលើនាវានេះ និងមានរហូតដល់៤១សញ្ជាតិ។ សូមបញ្ជាក់ថា នាវាទេសចរណ៍ដ៏ធំ របស់សហរដ្ឋអាមេរិក Westerdam ត្រូវបានប្រទេសចំនួន៦ រួមមាន ជប៉ុន កូរ៉េខាងត្បូង ហ្វីលីពីន តៃវ៉ាន់ និងកោះហ្គាម (Guam) ព្រមទាំងប្រទេសថៃ បានបដិសេធមិនឱ្យចូលចតឡើយ ដោយបារម្ភខ្លាចអ្នកទេសចរនៅលើកប៉ាល់មានផ្ទុកមេរោគកូរ៉ូណាថ្មី ឬ COVID-19។ សម្រាប់កម្ពុជា បានអនុញ្ញាតឱ្យចូលចត ដើម្បីចូលរួមសង្រ្គោះក្នុងកិច្ចការមនុស្សធម៌ និងបង្ហាញថា កម្ពុជាមិនរើសអើងជាតិសាសន៍ណាមួយឡើយ៕