ច្បាប់ផ្លូវថ្នល់មានគោលបំណងគ្រប់គ្រង ការអភិវឌ្ឍវិស័យហេដ្ឋារចនាសម្ព័ន្ធផ្លូវថ្នល់ និង ធានាសុវត្ថិភាពចរាចរណ៍ នៅក្នុងព្រះរាជាណាចក្រកម្ពុជា។

ច្បាប់​នេះ​មាន​គោលដៅ​ដូចតទៅ ៖ - ការពារ​ទ្រព្យសម្បត្តិ​សាធារណៈ ការពារ​និងលើកកម្ពស់គុណភាពផ្លូវថ្នល់ រក្សា​សណ្ដាប់ធ្នាប់ ​សម្រួល​ការធ្វើដំណើរនិង​ការដឹកជញ្ជូនតាមផ្លូវ​គោក - កំណត់​គោលនយោបាយ យុទ្ធសាស្ត្រ និង​ផែនការ​អភិវឌ្ឍសម្រាប់​សាងសង់ ជួសជុលនិងថែទាំ​ហេដ្ឋារចនាសម្ព័ន្ធ​ផ្លូវថ្នល់ ព្រមទាំង​កំណត់​វិធាននិង​បទប្បញ្ញត្តិ​​​ បច្ចេកទេស - ជំរុញនិង​លើកទឹកចិត្ត​វិស័យ​ឯកជន​ចូលរួម​ក្នុងការសាងសង់ ការជួសជុល ការថែទាំ និង​ការអភិវឌ្ឍ​វិស័យហេដ្ឋារចនាសម្ព័ន្ធ​ផ្លូវថ្នល់ - ជំរុញ​កិច្ចសហប្រតិបត្ដិការនិង​សមាហរណកម្ម​ជាតិ តំបន់ អនុតំបន់ និង​អន្តរជាតិ លើ​វិស័យហេដ្ឋារចនាសម្ព័ន្ធ​ផ្លូវថ្នល់ - លើកទឹកចិត្ត​ចំពោះ​ការសិក្សា​ស្រាវជ្រាវ​បច្ចេកទេសនិង​ការផ្ទេរ​បច្ចេកវិជ្ជាថ្មីៗ ដល់​​​​ការអភិវឌ្ឍហេដ្ឋារចនាសម្ព័ន្ធ​ផ្លូវថ្នល់​នៅក្នុង​ព្រះរាជាណាចក្រ​កម្ពុជា - អភិវឌ្ឍ​ធនធានមនុស្ស​ក្នុង​វិស័យ​ហេដ្ឋារចនាសម្ព័ន្ធ​ផ្លូវថ្នល់ នៅក្នុង​ព្រះរាជា-​ណាចក្រ​កម្ពុជា។

ច្បាប់​នេះ​មាន​វិសាលភាព​អនុវត្តចំពោះរាល់​សកម្មភាព ពាក់ព័ន្ធនឹងវិស័យហេដ្ឋា រចនា​ សម្ព័ន្ធ​ផ្លូវថ្នល់ នៅក្នុង​ព្រះរាជាណាចក្រ​កម្ពុជា៖ - ការសាងសង់ផ្លូវថ្នល់ - ការជួសជុលថែទាំផ្លូវថ្នល់

សមត្ថកិច្ច​គ្រប់គ្រង​ផ្លូវថ្នល់ ត្រូវ​បានកំណត់​ដូចខាងក្រោម ៖ ១- ក្រសួង​សាធារណការនិង​ដឹកជញ្ជូន​មាន​សមត្ថកិច្ចគ្រប់គ្រងលើផ្លូវ​ល្បឿន លឿន ផ្លូវជាតិ ផ្លូវ​ខេត្ត និង​ផ្លូវ​ផ្សេងទៀត​ដែល​រាជរដ្ឋាភិបាល​ប្រគល់ឱ្យ។ ២- ក្រសួង​អភិវឌ្ឍន៍ជនបទមាន​សមត្ថកិច្ចគ្រប់គ្រង​លើផ្លូវ​ជនបទ និង​ផ្លូវ​ផ្សេង​ទៀត ដែល​រាជរដ្ឋាភិបាល​ប្រគល់ឱ្យ។ ៣- ​រដ្ឋបាល​ថ្នាក់ក្រោម​ជាតិ​មាន​សមត្ថកិច្ច​គ្រប់គ្រង​លើផ្លូវ​រាជធានី ផ្លូវ​ក្រុង ផ្លូវ​ទី​រួម​ស្រុក​ នៃ​ខេត្តនិងផ្លូវដែល​ធម្មតាស្ថិតក្រោមសមត្ថកិច្ចរបស់ក្រសួង​សាធារណការ និងដឹកជញ្ជូន និងក្រសួងអភិវឌ្ឍន៍ជនបទ ហើយដែលក្រសួងទាំងពីរខាងលើធ្វើប្រតិភូកម្មអំណាច ឬផ្ទេរមុខងារទៅឲ្យរដ្ឋបាលថ្នាក់ក្រោមជាតិ និងផ្លូវ​ផ្សេង ទៀត​ក្រោយពេលមានការសម្រេចឯកភាព​ពីរាជរដ្ឋាភិបាល​។ ៤- ការបែងចែកសមត្ថកិច្ចគ្រប់គ្រង់ផ្លូវថ្នល់ផ្សេងទៀត ត្រូវកំណត់ដោយរាជរដ្ឋាភិបាល។

រដ្ឋបាលថ្នាក់ក្រោមជាតិ មានសិទ្ធិក្នុងការគ្រប់គ្រងនិងចាត់ចែងផ្លូវថ្នល់ក្នុងដែន សមត្ថកិច្ចរបស់ខ្លួន មានសមត្ថកិច្ចគ្រប់គ្រងលើផ្លូវរាជធានី ផ្លូវក្រុង ផ្លូវទីរួមស្រុកនៃខេត្តនិងផ្លូវដែលស្ថិតក្រោមសមត្ថកិច្ចរបស់ក្រសួងសាធារណ ការនិងដឹកជញ្ជូននិងក្រសួងអភិវឌ្ឍន៍ជនបទ ហើយដែលក្រសួងទាំងពីរខាងលើ ធ្វើប្រតិភូកម្មអំណាចឬផ្ទេរមុខងារទៅឲ្យរដ្ឋបាលថ្នាក់ក្រោមជាតិ និងផ្លូវផ្សេងទៀតក្រោយពេលមានការសម្រេចឯកភាពពីរាជរដ្ឋាភិបាល។