ខេត្តព្រះសីហនុ ៖ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានចេញសេចក្តីជូនដំណឹង ក្រើនរំលឹកដល់អ្នកបើកបរ និងអ្នករួមដំណើរទាំងអស់ឱ្យបង្កើនការយកចិត្តទុកដាក់ខ្ពស់លើសុវត្ថិភាពក្នុងការធ្វើដំណើរ ។ជាក់ស្តែង ផ្លូវល្បឿនលឿនភ្នំពេញ-ក្រុងព្រះសីហនុ បានប្រកាសនាព្រឹកថ្ងៃទី០១ ខែធ្នូ ឆ្នាំ២០២៥នេះថា ៖ សេចក្តីក្រើនរំលឹក ដើម្បីការពារសុវត្ថិភាពក្នុងការធ្វើដំណើរនៅលើផ្លូវល្បឿនលឿន ក្រុមហ៊ុន សូមធ្វើការក្រើនរំលឹកបន្ថែមអំពីចំណុចសំខាន់ៗមួយចំនួន ដែលអ្នកបើកបរ និងអ្នករួមដំណើរ គួរយល់ដឹង ។ដើម្បីចៀសវាងគ្រោះថ្នាក់ និងរក្សាសណ្តាប់ធ្នាប់ដងផ្លូវ ក្រុមហ៊ុនបានគូសបញ្ជាក់ពីចំណុចហាមឃាត់សំខាន់ៗចំនួន ៦ ដែលអ្នកបើកបរត្រូវអនុវត្តយ៉ាងម៉ឺងម៉ាត់ ៖ ១.ហាមបើកបរត្រឡប់ក្រោយ ២.ហាមបើកបរបញ្ច្រាសទិស ឬថយក្រោយ ៣.ហាមបើកបរលើសល្បឿនកំណត់ ៤.ហាមដឹកអ្នកដំណើរនៅក្រោយរថយន្តភីកអាប់ ៥.ហាមបោះសំរាមចោលតាមផ្លូវ ៦.ហាមឈប់លើគន្លងឈប់បន្ទាន់ ដោយគ្មានករណីអាសន្ន ។ ក្រុមហ៊ុនផ្លូវល្បឿនលឿន សង្ឃឹមយ៉ាងមុតមាំថា អ្នកបើកបរទាំងអស់នឹងចូលរួមសហការគោរពតាមការណែនាំនេះ ដើម្បីប្រែក្លាយការធ្វើដំណើររបស់លោកអ្នក ឱ្យប្រកបដោយភាពសប្បាយរីករាយ និងសុវត្ថិភាពដល់គោលដៅ ។ សូមបើកបរដោយការទទួលខុសត្រូវ ដើម្បីសុវត្ថិភាពទាំងអស់គ្នា៕