វេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីគោលនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា នៅឃុំប៊ូស្រា ស្រុកពេជ្រាដា មណ្ឌលគិរី៖ នាថ្ងៃចន្ទ ទី១៩ ខែមករា ឆ្នាំ២០២៦ ឯកឧត្តម អ៊ីន តុងអាន អនុរដ្ឋលេខាធិការ ទីស្តីការគណៈរដ្ឋមន្ត្រី និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកពេជ្រាដា បានអញ្ជើញជាអធិបតីក្នុងវេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល សម្រាប់នីតិកាលទី៧ នៃរដ្ឋសភា។ វេទិកាសាធារណៈនេះ មានការអញ្ជើញចូលរួមពី ឯកឧត្តម ងិន សុវិមាន អភិបាលរងខេត្តមណ្ឌលគិរី និងលោក ខាំផង ជា អភិបាលរងស្រុកពេជ្រាដា មានសមាសភាពចូលរួមពី លោក លោកស្រី ជាសមាជិក ក្រុមការងារខេត្ត មន្ទីរ អង្គភាព ស្រុក ឃុំ និងសមត្ថកិច្ចពាក់ព័ន្ធក្នុងស្រុក និងប្រជាពលរដ្ឋជាច្រើនរូបផងដែរ ដោយប្រព្រឹត្តទៅនៅវត្តសុវណ្ណគិរី ហៅវត្តវ៉ារយោង ភូមិពូលុ ឃុំប៊ូស្រា ស្រុកពេជ្រាដា ខេត្តមណ្ឌលគិរី។ ក្រោមការដឹកនាំ និងសម្របសម្រួលពីឯកឧត្តមអនុប្រធាន វេទិកានេះបានជជែកពិភាក្សាយ៉ាងផលផុស លើការឆ្លើយតប និងស្វែងរកដំណោះស្រាយជូនប្រជាពលរដ្ឋមូលដ្ឋាន ក៏ដូចជាផ្សព្វផ្សាយគោលនយោបាយ និងសមិទ្ធផលសំខាន់ៗរបស់រាជរដ្ឋាភិបាល ដែលសម្រេចបាន និងកំពុងអនុវត្ត ដើម្បីឱ្យប្រជាពលរដ្ឋបានជ្រាបច្បាស់ ដោយក្នុងវេទិកានេះដែរ ប្រជាពលរដ្ឋបានលើកឡើងពីសំណើ សំណូមពរចំនួនលើវិស័យមួយចំនួន រួមមាន៖ វិស័យអប់រំ ធនធានទឹក ដីធ្លី អគ្គិសនី ការផ្តល់សេវា និងអភិបាលកិច្ច សាធារណការ និងវិស័យបរិស្ថាន៕