ការរៀបចំបំពង់ទុយោទឹកសម្រាប់ស្រោចស្រពសួនកណ្តាលពុះចែកទ្រូងផ្លូវ នៃផ្លូវល្បឿនលឿនភ្នំពេញ-ក្រុងព្រះសីហនុ ភ្នំពេញ៖ ដើម្បីកែលម្អការងារថែទាំសួនកណ្តាលពុះចែកទ្រូងផ្លូវនៃផ្លូវល្បឿនលឿនភ្នំពេញ-ក្រុងព្រះសីហនុ និងដើម្បីកាត់បន្ថយការរំខាន និងធានាសុវត្តិភាពអ្នកប្រើប្រាស់ផ្លូវ កាលពីថ្ងៃសុក្រ ទី២៤ ខែតុលា ឆ្នាំ ២០២៥ អង្គភាពគ្រប់គ្រងគម្រោង ដឹកនាំដោយ ឯកឧត្តម សួង ហេង រដ្ឋលេខាធិការ បានណែនាំឱ្យក្រុមហ៊ុនសិក្សាបណ្តាញប្រភពទឹកគ្រប់គ្រាន់ ដើម្បីធានាបានប្រសិទ្ធភាពនៃការថែទាំសួន និងការលូតលាស់ល្អ ជាពិសេសក្នុងរដូវប្រាំង និងដើម្បីលុបបំបាត់ការប្រើប្រាស់រថយន្តស៊ីទែនទឹកស្រោចស្រព ដែលបង្កការរំខាន និងបង្កហានិភ័យគ្រោះថ្នាក់ចរាចរណ៍ជាយថាហេតុ។ ជាលទ្ធផល ក្រុមហ៊ុនបានសម្រេចរៀបចំដាក់ទុយោទឹកទំហំ ៩០ម.ម ដល់១១០ ម.ម ដោយអនុវត្តបច្ចេកវិទ្យាប្រព័ន្ធស្វ័យប្រវត្តិកម្មឆ្លាតវៃតំណក់ទឹក (Drop-by-drop irrigation) ជួយសន្សំសំចៃទឹក កម្លាំងពលកម្ម សុវត្ថិភាព និងជួយឱ្យសួនមានទឹកគ្រប់គ្រាន់ក្នុងការដាំដុះ និងលូតលាស់បានល្អជាពិសេសនៅរដូវប្រាំង។ ទឹកដែលយកមកប្រើប្រាស់ក្នុងដំណើរការប្រព័ន្ធស្រោចស្រព បានមកពីការជីកអណ្ដូង និងឆ្លងកាត់ការចម្រោះ និងរក្សាទុកក្នុងអាងស្តុក មុននឹងបញ្ជូនតាមទុយោមេមកកាន់សួន។ ការសាងសង់ប្រព័ន្ធស្រោចស្រពនេះ បានចាប់ផ្ដើមអនុវត្តពីខែតុលា ឆ្នាំ២០២៥ គ្រោងនឹងបញ្ចប់នៅក្នុងខែមករា ឆ្នាំ២០២៦ ខាងមុខ។ ក្នុងរយៈពេលនៃការកែលម្អនេះ ក្រុមការងារបាន និងកំពុងរៀបចំដាក់ផ្លាកសញ្ញាសុវត្តិភាព ផ្ទាំងព័ត៌មាន និងនគរបាលចរាចរណ៍ ជួយសម្រួលចរាចរណ៍ផងដែរ ដូច្នេះសូមបងប្អូនប្រជាពលរដ្ឋដែលធ្វើដំណើរពី ទិសដៅភ្នំពេញ ទៅក្រុងព្រះសីហនុ បើកបរបដោយការប្រុងប្រយ័ត្ន និងមានសុខសុវត្ថិភាពទាំងអស់គ្នា៕