ភ្នំពេញៈ គ្រោះថ្នាក់ចរាចរណ៍បានសម្លាប់មនុស្សយ៉ាងហោចណាស់២៦នាក់ ក្នុងរយៈពេល៧ថ្ងៃ ខណៈដែលក្រសួងជំនាញពាក់ព័ន្ធកំពុងតែធ្វើការពិភាក្សាលើសេចក្តីព្រាងច្បាប់ ស្តីពីចរាចរណ៍ផ្លូវគោកថ្មី មុននឹងដាក់ឆ្លងក្នុងកិច្ចប្រជុំពេញអង្គគណៈរដ្ឋមន្រ្តីនាពេលខាងមុខ។ គ្រោះថ្នាក់ចរាចរណ៍ផ្លូវគោកនៅទូទាំងប្រទេសបានកើតឡើងចំនួន៣៦ករណី ក្នុងរយៈពេល៧ថ្ងៃ គិតចាប់ពីថ្ងៃទី១ រហូតដល់ថ្ងៃទី៧ ខែតុលានេះ។ ក្នុងនោះ បានបណ្តាលឱ្យមានមនុស្សស្លាប់ចំនួន២៦នាក់ និងរងរបួសធ្ងន់ស្រាលចំនួន៤៦នាក់។ នេះបើតាមលោក អ្នកនាំពាក្យរងក្រសួងមហាផ្ទៃ ទូច សុឃៈ នាថ្ងៃពុធនេះ។គ្រោះថ្នាក់ចរាចរណ៍ទាំងនោះ គឺបានកើតមានឡើងនៅក្នុង រាជធានីភ្នំពេញ ខេត្តកណ្តាល កំពង់ស្ពឺ ព្រះសីហនុ កែប កំពត តាកែវ កំពង់ឆ្នាំង បាត់ដំបង បន្ទាយមានជ័យ ព្រះវិហារ រតនគិរី ក្រចេះ ត្បូងឃ្មុំ កំពង់ចាម និងខេត្តព្រៃវែង។ ក្នុងឱកាសនៃពីធីកាន់បិណ្ឌ និងភ្ជុំបិណ្ឌប្រពៃណីជាតិខ្មែរកាលពីខែកញ្ញាកន្លងមក គ្រោះថ្នាក់ចរាចរណ៍ផ្លូវគោកនៅទូទាំងប្រទេសបានកើតឡើងចំនួន១០៣ករណី ដែលបណ្តាលឱ្យមានមនុស្សស្លាប់ចំនួន៦៨នាក់ និងរងរបួសធ្ងន់ស្រាល១៣៦នាក់។ក្រៅពីនេះ ក្នុងរយៈពេលត្រឹមតែ៦ថ្ងៃ គិតចាប់ពីថ្ងៃទី២៤ រហូតដល់ថ្ងៃទី២៩ ខែកញ្ញា ឆ្នាំ២០២៥ ក្រោយបញ្ចប់ពីធីបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរ គ្រោះថ្នាក់ចរាចរណ៍ផ្លូវគោកនៅទូទាំងប្រទេស បានបន្តកើតឡើងចំនួន៣១ករណីទៀត។ គ្រោះថ្នាក់នេះបានបណ្តាលឱ្យមានមនុស្សស្លាប់ចំនួន១៩នាក់ និងរងរបួសធ្ងន់ស្រាលចំនួន៤៤នាក់។ទាក់ទងនឹងបញ្ហាចរាចរណ៍នេះផងដែរ ក្រុមការងារតាក់តែងសេចក្តីព្រាងច្បាប់ស្តីពីចរាចរណ៍ផ្លូវគោក បាននិងកំពុងតែបន្តពិនិត្យ និងពិភាក្សាបន្ថែមលើមាត្រាមួយចំនួន នៃសេចក្តីព្រាងច្បាប់ស្តីពីចរាចរណ៍ផ្លូវគោកថ្មី ដើម្បីឱ្យមានភាពច្បាស់លាស់ ស្របតាមបច្ចេកទេស និងការវិវឌ្ឍរបស់សង្គម។ កិច្ចពិភាក្សាទាំងនោះ មានការចូលរួមពីតំណាងក្រសួងសាធារណការ និងដឹកជញ្ជូន ក្រសួងមហាផ្ទៃ និងក្រសួងយុត្តិធម៌ ដោយបានពិនិត្យ ដោយបានពិភាក្សា និងទទួលបានការផ្តល់យោបល់យ៉ាងផុលផុសផងដែរ។ ក្នុងពេលដឹកនាំប្រជុំកាលពីខែសីហាកន្លងមក លោកស្រីមឹន មាណវី រដ្ឋលេខាធិការក្រសួងសាធារណការ និងដឹកជញ្ជូន ក៏បានស្នើដល់តំណាងក្រសួងយុត្តិធម៌ ឱ្យពិនិត្យ និងផ្តល់យោបល់បន្ថែមលើមាត្រាមួយចំនួនពាក់ព័ន្ធនឹងករណីមានគ្រោះថ្នាក់ចរាចរណ៍ផ្លូវគោក និងបទល្មើសចរាចរណ៍ផ្លូវគោក។ លោកផន រីម អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងនាថ្ងៃពុធនេះថា ក្រុមការងារកំពុងតែបន្តប្រមូលធាតុចូល សិក្សា និងពិភាក្សាបន្ថែមជាមួយផ្នែកពាក់ព័ន្ធលើមាត្រាមួយចំនួន ដើម្បី ឱ្យមានភាពច្បាស់លាស់ ស្របតាមបច្ចេកទេស និងការវិវឌ្ឍរបស់សង្គមជាតិកម្ពុជា។ លោកបញ្ជាក់ដូច្នេះថា៖«បន្ទាប់ពីនេះ យើង[នឹង]បញ្ជូន[សេចក្រីព្រាងច្បាប់នេះ]ទៅ ក្រុមប្រឹក្សា អ្នកច្បាប់របស់ទីស្តីការគណៈរដ្ឋមន្ត្រី និងអន្តរក្រសួង ដើម្បីពិនិត្យ មុននឹងដាក់ឆ្លងក្នុងកិច្ចប្រជុំពេញអង្គគណៈរដ្ឋមន្រ្តីនាពេលខាងមុខ»៕