ក្រុមការងារ នៃអង្គភាពគ្រប់គ្រងគម្រោងចុះពិនិត្យទីតាំងគម្រោងអភិវឌ្ឍន៍ហេដ្ឋារចនាសម្ព័នទីក្រុង នៃគម្រោងសាង សង់ស្ថានីយចម្រោះទឹកកខ្វក់ ទីលានចាក់សំរាម និងទំនប់ការពារទឹកជំនន់ ក្នុងក្រុងដូនកែវ ខេត្តតាកែវ តាកែវ៖នាថ្ងៃចន្ទ ទី២៩ ខែកញ្ញា ឆ្នាំ២០២៥ ឯកឧត្តម ហេង ណន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ហេដ្ឋារចនាសម្ព័នទីក្រុង ក្រោមហិរញ្ញប្បទានពីធនាគារវិនិយោគហេដ្ឋារចនាសម្ព័នអាស៊ី (AIIB) បានដឹកនាំក្រុមការងារនៃអង្គភាពគ្រប់គ្រងចុះពិនិត្យទីតាំងគម្រោងអភិវឌ្ឍន៍ហេដ្ឋារចនាសម្ព័នទីក្រុង នៃគម្រោងសាងសង់ស្ថានីយចម្រោះទឹកកខ្វក់ ទីលានចាក់សំរាម និងទំនប់ការពារទឹកជំនន់ ក្នុងក្រុងដូនកែវ ខេត្តតាកែវ ដោយមានការចូលរួមពីថ្នាក់ដឹកនាំក្រសួង ឯកឧត្តមអភិបាល នៃគណៈអភិបាលខេត្តតាកែវ និងថ្នាក់ដឹកនាំមន្ទីរអង្គភាពពាក់ព័ន្ធចំណុះរដ្ឋបាលខេត្ត ជាច្រើនរូបផងដែរ។ បេសកកម្មចុះពិនិត្យនេះ ក្នុងគោលបំណងដើម្បីពិនិត្យ និងពិភាក្សាលើគម្រោងអភិវឌ្ឍន៍ហេដ្ឋារចនាសម្ព័នទីក្រុង និងសិក្សាពីទីតាំងលម្អិត នៃគម្រោងសាងសង់ស្ថានីយចម្រោះទឹកកខ្វក់ ទីលានចាក់សំរាម និងទំនប់ការពារទឹកជំនន់ ដែលស្ថិតនៅក្នុងក្រុងដូនកែវ ខេត្តតាកែវ ដែលនឹងត្រៀមរៀបចំនាពេលខាងមុខនេះ ដើម្បីធានាបាននូវការរៀបចំហេដ្ឋារចនាសម្ព័ន ប្រកបដោយប្រសិទ្ធភាព និងសោភណ្ឌភាពទីក្រុងស្អាតផងដែរ៕