មានបងប្អូនមួយចំនួនតែងតែឆ្ងល់ថា នៅពេលដែលយើងមានបណ្ណបើកបរតើយើងអាចមានសិទ្ធិបើករថយន្តដល់អាយុប៉ុន្មាន? ជាមួយគ្នានោះដែរ នាពេលនេះក្រសួងសាធារណការ និងដឹកជញ្ជូនក៏បានបញ្ជាក់ថា អ្នកកាន់បណ្ណបើកបរគ្រប់ប្រភេទគឺមានសិទ្ធិបើកបរយានយន្តបានរហូតដល់អាយុ៦៥ឆ្នាំ។   បើយោងតាមច្បាប់ ស្តីពីចរាចរណ៍ផ្លូវគោកមាត្រា៤២ បានចែងថា ៖ អ្នកកាន់បណ្ណបើកបរគ្រប់ប្រភេទមានសិទ្ធិបើកបរយានយន្តបានរហូតដល់អាយុ៦៥(ហុកសិប ប្រាំ)ឆ្នាំ។ ចាប់ពីអាយុ៦៥(ហុកសិបប្រាំ)ឆ្នាំឡើងទៅ អ្នកកាន់បណ្ណបើកបរអាចអនុញ្ញាតឱ្យបើកបរបាន ប៉ុន្តែត្រូវ ពិនិត្យសុខភាព និងប្តូរបណ្ណបើកបរដែលមានសុពលភាពរយៈពេល២ (ពីរ) ឆ្នាំម្តង។   យ៉ាងណាមិញ សុពលភាពនៃប្រភេទបណ្ណបើកបរក ខ គ ឃ និងងមានរយៈពេល ដូចខាងក្រោម៖ ១. បណ្ណបើកបរប្រភេទក និងប្រភេទខ មានសុពលភាពរយៈពេល១០(ដប់)ឆ្នាំ។២. បណ្ណបើកបរប្រភេទគ ឃ និងង មានសុពលភាពរយៈពេល៥ (ប្រាំ)ឆ្នាំ។៣. អ្នកកាន់បណ្ណបើកបរ ត្រូវសុំប្តូរបណ្ណបើកបរមុនអស់សុពលភាពដោយភ្ជាប់មក ជាមួយនូវលិខិតពិនិត្យសុខភាពដែលបញ្ជាក់ថាអាចបើកបរបាន។ នៅក្នុងករណីអ្នកមិនបានមកប្តូរបណ្ណបើកបរថ្មី ត្រូវទទួលការពិន័យ ស្របតាមបទប្បញ្ញត្តិនៃច្បាប់នេះ។ ការពិនិត្យសុខភាពត្រូវមានលិខិតបញ្ជាក់ថាអាចបើកបរបានពីគ្រូពេទ្យនៅតាមមន្ទីរពេទ្យ ឬមណ្ឌល សុខភាពដែលត្រូវកំណត់ដោយក្រសួងសុខាភិបាល។ ព័ត៌មានលម្អិត៖ (Hotline) 1275៕