កិច្ចប្រជុំបូកសរុបលទ្ធផលនៃបេសកកម្មគាំទ្រការអនុវត្តនៃគម្រោងការពន្លឿនការផ្គត់ផ្គង់ទឹកស្អាត និងអនាម័យ (WASAC) និងគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) របស់ក្រុមការងារធនាគារពិភពលោក(WB) ភ្នំពេញ៖ នាថ្ងៃសុក្រ ទី២៤ ខែតុលា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំក្រុមការងារអនុវត្តគម្រោង ចូលរួមកិច្ចប្រជុំបូកសរុបលទ្ធផលនៃបេសកកម្ម ស្ដីអំពី "បេសកកម្មគាំទ្រការអនុវត្តនៃគម្រោងការពន្លឿនការផ្គត់ផ្គង់ទឹកស្អាត និងអនាម័យ (WASAC) និងគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP)” របស់ក្រុមការងារធនាគារពិភពលោក(WB) ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ និងសមាជិកអង្គភាពគ្រប់គ្រងគម្រោងនៃក្រសួងសាធារណការ និងដឹកជញ្ជូន តំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងក្រសួងសេដ្ឋកិច្ច និងហិរញ្ញវត្ថុ និងក្រុមការងារបេសកកម្មរបស់ធនាគារពិភពលោក (WB) ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យពិភាក្សា និងបូកសរុបលទ្ធផលនៃកិច្ចបេសកកម្មបច្ចេកទេសគាំទ្រការអនុវត្តគម្រោងដែលបានប្រព្រឹត្តទៅ ចាប់ពីថ្ងៃទី១៣ ដល់ថ្ងៃទី២៤ ខែតុលា ឆ្នាំ២០២៥ របស់ក្រុមការងារធនាគារពិភពលោក(WB) និងការវាយតម្លៃអំពីវឌ្ឍនភាពការងារដែលបានអនុវត្តនាពេលកន្លងមក ក្នុងការផ្ដល់នូវផែនការសកម្មភាពសំខាន់ៗសម្រាប់ពន្លឿន និងកែលម្អការអនុវត្តគម្រោងដើម្បីឆ្ពោះទៅសម្រេចបាននូវលទ្ធផលល្អប្រសើរ និងទាន់ពេលវេលាកំណត់នៃកិច្ចសន្យាគម្រោង៕