និស្សិតជ័យលាភីអាហារូបករណ៍រដ្ឋាភិបាលហុងគ្រី ទទួលអនុសាសន៍ផ្តាំផ្ញើល្អៗ មុនចេញដំណើរទៅបន្តការសិក្សា ទីស្តីការក្រសួង៖ នាថ្ងៃព្រហស្បតិ៍ ទី១០ ខែកក្កដា ឆ្នាំ២០២៥ ឯកឧត្តម ឈួន វិន រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាលជាមួយក្រុមនិសិ្សតជ័យលាភីអាហារូបករណ៍រដ្ឋាភិបាលហុងគ្រី សម្រាប់ឆ្នាំ២០២៥-២០២៦ មុនចេញដំណើរទៅសិក្សា ដោយមានការចូលរួមពីសំណាក់ថ្នាក់ដឹកនាំ និងមន្ត្រីពាក់ព័ន្ធផងដែរ។ ជំនួបនេះ ចែករំលែកបទពិសោធន៍ អនុសាសន៍ និងការអនុវត្តល្អៗ សម្រាប់និស្សិតយកទៅផ្សព្វផ្សាយបន្តអំពីការអភិវឌ្ឍជាតិ ក្នុងគោលបំណងឱ្យពិភពលោកបានដឹងបានយល់អំពីប្រទេសកម្ពុជាកាន់តែច្បាស់ថែមទៀត។ បន្ថែមពីលើនេះឯកឧត្តមរដ្ឋលេខាធិការ ក៏បានលើកឡើងអំពីសមិទ្ធផលសំខាន់ៗ និងការងារជាច្រើនដែលក្រសួង ក្នុងនាមជាសេនាធិការរបស់រាជរដ្ឋាភិបាល ដែលបាន និងកំពុងអនុវត្តលើវិស័យសាធារណការ និងដឹកជញ្ជូន នៅកម្ពុជាឱ្យកាន់តែមានភាពល្អប្រសើរជាបន្តបន្ទាប់ទៀតនៅទូទាំងប្រទេស។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានចូលរួមអបអរសាទរ កោតសរសើរចំពោះនិស្សិតជ័យលាភីទាំងអស់ និងបានពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ក៏ដូចជាជំរុញលើកទឹកចិត្តឱ្យនិស្សិតទាំងអស់ផ្ដោតសំខាន់លើការខិតខំប្រឹងប្រែងរៀនសូត្រទាំងនៅក្នុងសាលា និងស្វែងយល់ចំណេះដឹងបន្ថែម ពីមជ្ឈដ្ឋានខាងក្រៅឱ្យអស់ពីលទ្ធភាព និងសមត្ថភាពដែលខ្លួនមាន ដើម្បីទទួលបានលទ្ធផលល្អប្រសើរ ក្លាយជាទំពាំងដ៏ល្អ ដើម្បីចូលរួមកសាងប្រទេសជាតិជាមួយរាជរដ្ឋាភិបាលនៅពេលវិលត្រឡប់មកមាតុប្រទេសវិញ។ សូមជម្រាបដែរថា៖ និស្សិតជ័យលាភីអាហារូបករណ៍រដ្ឋាភិបាលហុងគ្រី ដែលជាមន្ត្រីរាជការមកពី ក្រសួង-ស្ថាប័ននានា និងក្រុមហ៊ុនវិស័យឯកជន នឹងត្រូវបន្ដការសិក្សាថ្នាក់បរិញ្ញាបត្រ៦រូប ថ្នាក់អនុបណ្ឌិត៦រូប និងថ្នាក់បណ្ឌិត៤រូប លើមុខជំនាញ រួមមានដូចជា៖ វិទ្យាសាស្ត្រអប់រំ វិទ្យាសាស្ត្រកុំព្យូទ័រ ស្ថាបត្យកម្ម វិស្វកម្មសំណង់ វេជ្ជសាស្ត្រ ទំនាក់ទំនងអន្តរជាតិ ទីផ្សារ និងបរិស្ថាន៕