ពិធីចុះអនុស្សរណៈនៃការយោគយល់គ្នាស្តីពី “កិច្ចសហប្រតិបត្តិការលើការបណ្តុះបណ្តាល និងផ្សព្វផ្សាយច្បាប់ស្តីពីចរាចរណ៍ផ្លូវគោក និងសុវត្ថិភាពក្នុងការបើកបរ” ភ្នំពេញ៖ នាថ្ងៃអង្គារ ទី២៥ ខែមីនា ឆ្នាំ២០២៥ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គ.ស.ច.គ. បានអញ្ជើញជាអធិបតីភាព ក្នុងពិធីចុះអនុស្សរណៈនៃការយោគយល់គ្នាស្តីពី “កិច្ចសហប្រតិបត្តិការលើការបណ្តុះបណ្តាល និងផ្សព្វផ្សាយច្បាប់ស្តីពីចរាចរណ៍ផ្លូវគោក និងសុវត្ថិភាពក្នុងការបើកបរ” រវាងអគ្គលេខាធិការដ្ឋាន នៃគ.ស.ច.គ. និងក្រុមហ៊ុន អិន ស៊ី អិច នៅក្នុងពិធីនេះក៏មានការអញ្ជើញចូលរួមពី លោក ណាអូអាគិ អ៊ិស៊ីការវ៉ា នាយកប្រតិបត្តិទូទៅ ក្រុមហ៊ុន អិន ស៊ីអិច រួមទាំងថ្នាក់ដឹកនាំនាយកដ្ឋានសុវត្ថិភាពចរាចរណ៍ផ្លូវគោក និងមន្ត្រីពាក់ព័ន្ធមួយចំនួនផងដែរ។ គោលបំណងនៃអនុស្សរណៈនៃការយោគយល់គ្នានេះ គឺដើម្បីចូលរួមចំណែកក្នុងការបណ្តុះបណ្តាល ផ្សព្វផ្សាយ លើកកម្ពស់ការអប់រំការយល់ដឹងអំពីច្បាប់ស្តីពីចរាចរណ៍ផ្លូវគោក និងសុវត្ថិភាពក្នុងការបើកបរឱ្យកាន់តែទូលំទូលាយ និងបញ្ជ្រាបដល់ប្រជាពលរដ្ឋគ្រប់កម្រិត ក្នុងការកាត់បន្ថយគ្រោះថ្នាក់ចរាចរណ៍ និងដើម្បីគាំទ្រដល់ផែនការជាតិទសវត្សរ៍សកម្មភាពសុវត្ថិភាពចរាចរណ៍ផ្លូវគោក ឆ្នាំ២០២១-២០៣០ របស់រាជរដ្ឋាភិបាលកម្ពុជា។ អនុស្សរណៈនេះ មានរយៈពេល ៣ឆ្នាំ ដែលនឹងចូលជាធរមានចាប់ពីកាលបរិច្ឆេទនៃការចុះហត្ថលេខានេះតទៅ រហូតដល់ថ្ងៃទី២៤ ខែមីនា ឆ្នាំ២០២៨៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube