កិច្ចប្រជុំពិគ្រោះយោបល់កម្រិតបច្ចេកទេស រវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ ដើម្បីប្រមូលធាតុចូលសម្រាប់ការត្រៀមរៀបចំគម្រោងថវិកា ឆ្នាំ២០២៦ ភ្នំពេញ៖ នាព្រឹកថ្ងៃសុក្រ ទី២១ ខែមីនា ឆ្នាំ ២០២៥ ឯកឧត្ដម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានដឹកនាំប្រតិភូក្រសួងសាធារណការ និងដឹកជញ្ជូន ដោយមានការចូលរួមពី ឯកឧត្ដមអគ្គនាយកនៃអគ្គនាយកដ្ឋានផែនការ និងគោលនយោបាយ និងឯកឧត្ដម លោកជំទាវ លោក លោកស្រីជាថ្នាក់ដឹកនាំ និងមន្ត្រីជំនាញនៃអង្គភាពថវិកាក្រោមឱវាទក្រសួង ចូលរួមកិច្ចប្រជុំពិគ្រោះយោបល់កម្រិតបច្ចេកទេស ដើម្បីប្រមូលធាតុចូលសម្រាប់ការត្រៀមរៀបចំគម្រោងថវិកា ឆ្នាំ២០២៦ ជាមួយប្រតិភូក្រសួងសេដ្ឋកិច្ច និងហិរញ្ញវត្ថុ ដឹកនាំដោយលោកជំទាវ ឈុន ដាលីន អគ្គនាយករងនៃអគ្គនាយកដ្ឋានថវិកា នៅទីស្ដីការក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំខាងលើនេះ ត្រូវបានរៀបចំឡើងក្នុងគោលបំណងពិនិត្យ និងពិភាក្សាលើរបៀបវារៈចំនួន៣ រួមមាន៖ ១)រចនាសម្ព័ន្ធកម្មវិធីដែលគ្រោងនៅឆ្នាំ២០២៦, ២)សូចនាករគន្លឹះគាំទ្រដល់គោលបំណងនៅតាមកម្មវិធីនីមួយៗ និង ៣)គោលនយោបាយថ្មីៗ (New Policy) និងកត្តាជំរុញតម្រូវការ (Demand Driver) សម្រាប់ត្រៀមរៀបចំក្របខណ្ឌហិរញ្ញវត្ថុសាធារណៈរយៈពេលមធ្យម (MTFF) ឆ្នាំ២០២៦–២០២៨ និងក្របខណ្ឌថវិការយៈពេលមធ្យម (MTBF) ឆ្នាំ២០២៦-២០២៨។ សូមជម្រាបជូនថា៖ កិច្ចប្រជុំខាងលើនេះ គឺជាការអនុវត្តស្របតាមសារាចរស្តីពីប្រតិទិនសម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០២៦ ដើម្បីឆ្លុះបញ្ចាំងអំពីទិដ្ឋភាពនៃការគ្រប់គ្រងការប្រមូលចំណូល ការសម្របសម្រួលចំណាយ និងការប្រើប្រាស់ថវិកាជាតិប្រកបដោយប្រសិទ្ធភាព និងគណនេយ្យភាព៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube