ភ្នំពេញ៖ នៅកម្ពុជាមានសន្ទុះនៃការប្រើប្រាស់រថយន្តអគ្គិសនី បានកើតឡើងជាង ៦០០ ភាគរយ ក្នុងឆ្នាំ២០២៤ ។ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានលើកឡើងថា ការប្រើប្រាស់រថយន្តអគ្គិសនីមានភាពងាយស្រួល ដោយចំណាយប្រចាំថ្ងៃតិច ហើយមានផាសុភាព និងកម្រិតបំពុល ក្នុងបរិយាកាសទាបបំផុត។លោក ផន រឹម បានបញ្ជាក់ថា កាលពីឆ្នាំ២០២៤ មានរថយន្តអគ្គិសនី (EV) បានចុះបញ្ជីសរុប២,២៥៣ គ្រឿង នឹងកើនឡើង៦២០ភាគរយ បើធៀបឆ្នាំ ២០២៣ មានចំនួន ៣១៣ គ្រឿង។ ចំណែកត្រីចក្រយាន និងទោចក្រយានអគ្គិសនី ក៏កើនឡើងផងដែរ។ សម្រាប់អត្ថប្រយោជន៍នៃការប្រើប្រាស់រថយន្ត EVនេះ លោក ផន រឹម បានឱ្យដឹងថា វាជួយកាត់បន្ថយការចំណាយ និងសន្សំសំចៃប្រាក់បានខ្លះ បើធៀបនឹងការប្រើប្រាស់រថយន្ដប្រេងឥន្ធនៈ។ ម្យ៉ាងវិញទៀត ការប្រើប្រាស់រថយន្តអគ្គិសនីមានភាពងាយស្រួល ផាសុភាព សំឡេងស្ងាត់ល្អ និងកម្រិតបំពុលក្នុងបរិយាកាសទាបបំផុត។ ស្របពេលនិន្នាការបច្ចេកវិទ្យាថ្មីៗកើនឡើងនោះ រាជរដ្ឋាភិបាល បានផ្ដល់ជម្រើសច្រើន និងគាំពារសម្រាប់ការនាំចូល ក៏ដូចជាការប្រើប្រាស់រថយន្តអគ្គិសនី ដោយមានការបន្ធូរបន្ថយអត្រាពន្ធនាំចូល ដែលអាចឱ្យពលរដ្ឋមានកម្រិតជីវភាពសមរម្យ មានលទ្ធភាពប្រើប្រាស់បាន។ នេះបើតាមអ្នកនាំពាក្យក្រសួងសាធារណការ និងដឹកជញ្ជូន។ ជាមួយគ្នានេះ លោក ផន រឹម បានគូសបញ្ជាក់ថា ម៉ាករថយន្ត EV ពេញនិយមបំផុតនៅកម្ពុជា ហើយ រថយន្តម៉ាក BYD របស់ចិន បាននាំមុខគេក្នុងទីផ្សារ ។ បន្ទាប់មកគឺម៉ាក Toyota របស់ជប៉ុន និង Tesla របស់អាមេរិក។ គិតត្រឹមដំណាច់ឆ្នាំ២០២៤នេះ កម្ពុជាទទួលបានការចុះបញ្ជីឡាន និងម៉ូតូអគ្គិសនី នៅក្រសួងសាធារណការចំនួន ៣ ៥០៨ គ្រឿង។ ក្នុងនោះ ទោចក្រយានចំនួន ៩៤ គ្រឿង កើនឡើង ៣២ ភាគរយ, ត្រីចក្រយាន ១ ១៦១ គ្រឿង កើនបាន ២១១ ភាគរយ និងរថយន្ត ២ ២៥៣ គ្រឿង ដែលកើនឡើង ៦២០ ភាគរយ បើប្រៀបធៀបឆ្នាំ២០២៣។ តាមរបាយការណ៍គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី២០២៤-២០៣០ បានលើកទឹកចិត្ត ពន្ធសម្រាប់ការវិនិយោគដំឡើងរថយន្ត ទោចក្រយានយន្តនិង ត្រីចក្រយានយន្តក្នុងស្រុក ដោយបញ្ចុះអត្រាពន្ធអាករនាំចូលសរុប (ពន្ធគយ អាករ ពិសេស និងអាករលើតម្លៃបន្ថែម) ពី៥០ ភាគរយ ដល់ ៩០ ភាគរយ ព្រមទាំងបញ្ចុះពន្ធអាករនាំចូល សម្រាប់ការដំឡើងទោចក្រយានយន្ត និងត្រីចក្រយានយន្តប្រភេទអគ្គិសនីក្នុងស្រុកពី ៦០ ភាគរយ ដល់ ១០០ ភាគរយ តាមទម្រង់ CKD, IKD, IKD1 និង IKD2៕