រាជធានីភ្នំពេញ៖ ក្នុងឆ្នាំ២០២៤ សន្ទុះនៃការប្រើប្រាស់យានយន្តអគ្គិសនីនៅកម្ពុជា កើនឡើងខ្លាំងរហូតដល់ប្រមាណជាង៦០០ភាគរយ។ អ្នកនាំពាក្យក្រសួងសាធារណៈការ និងដឹកជញ្ជូន លោក ផន រឹម អះអាងថា នឹងព្យាយាមធ្វើឱ្យស្ថានីយសាកអាគុយមានចំនួនកាន់តែច្រើនដើម្បីឱ្យមានតុល្យភាព…។លោក ផន រឹម នៅថ្ងៃទី១៧មករា ឆ្នាំ២០២៥នេះ បានឱ្យដឹងតាមរយៈគណនីហ្វេសប៊ុកផ្ទាល់ខ្លួនថា ប្រជាពលរដ្ឋកម្ពុជាចាប់ផ្តើមមានចំណាប់អារម្មណ៍ និងយល់ដឹងពីសារសំខាន់នៃការប្រើប្រាស់យានយន្តអគ្គិសនី បើប្រៀបធៀបជាមួយការប្រើប្រាស់យានយន្តដើរដោយថាមពលប្រេងឥន្ទនៈចំហេះកាលពីពេលមុន។ លោក លើកឡើងថា ការប្រើប្រាស់យានយន្តអគ្គិសនី ត្រូវបានគេមើលឃើញថា អាចកាត់បន្ថយការចំណាយប្រចាំខែ មានផាសុភាព ជាពិសេសមានកម្រិតបំពុលដល់បរិយាកាសទៀបបំផុត។បើតាមលោក ផន រឹម ការប្រើប្រាស់រថយន្តអគ្គិសនីនៅឆ្នាំ២០២៤ កើនឡើងជាង៦០០ភាគរយ និងមាននិន្នាការកើនឡើងនាឆ្នាំបន្តបន្ទាប់ទៀត ប៉ុន្តែលោកពុំបានបញ្ជាក់ពីចំនួននៃការព្យាកកំណើនកើនឡើងនោះឡើយ។ ក្នុងឆ្នាំ២០២៤ មានរថយន្តអគ្គិសនី (EV) ចុះបញ្ជីសរុប២២៥៣គ្រឿង កើនលើសឆ្នាំ២០២៣ ចំនួន៦២០ភាគរយ ខណៈឆ្នាំ២០២៣ មានត្រឹមតែ៣១៣គ្រឿងប៉ុណ្ណោះ។ លោកអះអាងថា ចំពោះការកើនយ៉ាងខ្លាំងនេះ រាជរដ្ឋាភិបាលតាមរយៈក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធនានា នឹងប្រឹងប្រែងធ្វើឱ្យចំនួនស្ថានីយសាកអាគុយមានកាន់តែច្រើន និងលក្ខខណ្ឌអំណោយផលផ្សេងៗទៀតកាន់តែប្រសើរ។គួរបញ្ជាក់ថា បច្ចុប្បន្ន កម្ពុជាមានទីតាំងបញ្ចូលថាមពលអគ្គិសនីនៅទូទាំងប្រទេស មានចំនួន២១កន្លែង ខណៈមានទូបញ្ចូលថាមពលយានយន្តអគ្គិសនីលឿនខ្លាំងសរុបចំនួន២៧ទូ។ រដ្ឋមន្ត្រីក្រសួងសាធារណការ និងដឹកជញ្ជូន លោក ប៉េង ពោធិ៍នា ធ្លាប់លើកឡើងថា ការបង្កើនការប្រើប្រាស់យានយន្តអគ្គិសនី នឹងកាត់បន្ថយការបញ្ចេញឧស្ម័នពុលក្នុងសកលលោក ប្រមាណពាក់កណ្តាលនៅឆ្នាំ២០៥០ ធៀបនឹងបច្ចុប្បន្ន។ ការណ៍នេះ ធ្វើឱ្យកាត់បន្ថយការស្លាប់មុនអាយុពីប្រមាណជាង៥លាននាក់ នៅឆ្នាំ២០២០ មកត្រឹមជិត៣លាននាក់នៅឆ្នាំ២០៥០៕